Mateo 23 - Lagano da Isambi

Walangulizi wolonda nhunizo weha

¹ Yomala Yesu kawalongela matinghanilo na wanahina zake, yolonga,

² “Iwana-Nzuma na Mafariseo wolanguliza magweka ga Mose.

³ Gose basi gondawamulongeleni, mgagoge na kusanghana; bali sikumgakole gowotenda, kilumbo wolonga hawagasanghana.

⁴ Hewo wokaka mitwalo mizito wowadwika iwanhu mmayega gawo; wenyego hawalonda kuikwasa na kidole chawo.

⁵ Kabili masanghano gawogose wogasanghana giladi walolwe na wanhu, kilumbo hicho woigazula mibindo yawo ya ukupulila, wokongezela mitamvua ya nguwo zawo.

⁶ Wosagula vigoda vya kuulongozi muna zisona, na kukemigwa na wanhu ‘Rabbiʼ (mkulufunzi).

⁸ Bali mweye sukumkemigwe Rabbi, kilumbo mkulufunzi wenu Imonga, na mweye mose mwandugu.

⁹ Kabili sukumkeme munhu tata mulumwengu, kilumbo Tata wenu yuyo Imonga yali kuulanga.

¹⁰ Kabili sukumkemigwe Vilongozi, kilumbo kilongozi wenu yuyo Imonga, na heyo yuyo Kristo.

¹¹ Avo yali mkulu wenu, kokuwa yomtumikilani mweye.

¹² Na yoyose yokitenda mkulu, kohunguzwa; ayo yondayaibweze hasi, kotunizwa.

Mojona wazenzeleganye; Kuvwizila Mulungu na wanhu

¹³ Mojona mweye wana-Nzuma na mweye Mafariseo, wazenzeleganye! Kilumbo mowakimila wanhu Undewa wa Mulungu; wenyego hamwingila, awaja wokwingila, hamuwaleka wengile.

¹⁴ Mojona mweye wana-Nzuma na mweye Mafariseo, wazenzeleganye! Kilumbo mjaga ngʼanda za wagane, kuno momtambikila Mulungu nghani na malonga bwando ga uzenzeleganye; avo kwiza motaguswa nghani.

¹⁵ Mojona mweye wana-Nzuma na mweye Mafariseo, wazenzeleganye! Kilumbo mozunguluka hose mbahali na mwiisi inyalile, kwa mzoko wa munhu imonga yawe Muyuda miyenu; yahamala kuhindulwa, momsanghana mwana wa mmoto miyanza mibili na managa kubanza mweye wenyego.

¹⁶ Mojona, vilongozi vimbugumbugu! mweye mulongaga, Munhu yondayeduwile dingʼanda ja hekalu, si mbuli; bali munhu yeduwile muna ivihambo vya zahabu zikigwe mdihekalu, kaikakaliza.

¹⁷ Mwa miloge mweye na vimbugumbugu! Ayo ilihi ili nghulu, zija zizahabu hebu ija ngʼanda ya Mulungu ingʼaza zizahabu?

¹⁸ Kabili molonga, Munhu yondayeduwilile hanhu ha ukulavila vinhu vya nhambiko, haduhu mbuli, bali yeduwile muna ivinhu vya nhambiko vili uchana, kaitatiza.

¹⁹ Vimbugumbugu mweye! avo ilihi nghulu, vija ivinhu vilavigwe hebu haja ihanhu hangʼazaga ivinhu?

²⁰ Avo hiyo yokiduwila hana gamazbahu kokiduwilila mazbahu na vija vikigwe uchana.

²¹ Na heyo yokiduwila dihekalu, kokiduwilila hijo na Hiyo Yokala mgati mmwake.

²² Na heyo yokiduwilila ulanga, kokiduwila na kigoda cha iyenzi cha Mulungu na Yuja Yokala kuko uchana.

²³ Mojona mweye wana-Nzuma na mweye Mafariseo, wazenzeleganye! Kilumbo molava fungu da kumi ja vinhu vidodo kamba bwasi, nhunguja na ludaha, bali muleka manzonza makulu ga Inzuma: kitala cha Mulungu, bazi na kutogola. Gano mwandakana kugasanghana, sikumgaleke gaja.

²⁴ Vilongozi vimbugumbugu mweye! wene kwerula nzuguni, kuno momeza ngamiya!

²⁵ Mojona mweye wana-Nzuma na mweye Mafariseo, wazenzeleganye! Kilumbo mosunha kunze vikasi na mikungu, bali himo mgati mmema ubokonyo na kwidengheza.

²⁶ Gweye Fariseo kimbugumbugu! Sunha tanhu mgati ja ikikasi, giladi kunze na hiko kungʼale.

²⁷ Mojona mweye wana-Nzuma na mweye Mafariseo, wazenzeleganye! Kilumbo mlingana na mapanga gabakazwe dongojasi, gokoneka kunze ganoga, bali mgati gamema mizege ya wafile na ubweto wose.

²⁸ Vivo na mwemwe mokoneka na wanhu kunze wene ihoko, kumbe mgati mmema uzenzeleganye na kulema ihoko.

²⁹ Mojona mweye wana-Nzuma na mweye Mafariseo, wazenzeleganye! Kilumbo mogazenga mapanga ga walaguzi, na kunogeza mapanga ga wene ihoko.

³⁰ Kuno molonga, Kamba tweye tukalile baho milongo ya tata zetu, hisambi twiduganye hamonga na hewo mumlopa wa walaguzi.

³¹ Avo mokisindila wenyego kamba mwa wanawo wawakomile walaguzi.

³² Imemezeni vivo ningo ya tata zenu!

Yerusalemu ukomaga walaguzi

³³ Mweye mizoka, mizana ya mizoka, moukimbilaze mtaguso wa moto?

³⁴ Vilemelaga hivo loleni, niye nowagala kumwenu walaguzi na wene fiyuko na wana-Nzuma; wayagwe mweye mowakoma na kuwawamba mmibiki, wayagwe mowatowa mzingʼanda zenu za nhambiko, na kuwawinga viwambo na viwambo.

³⁵ Giladi wize mmwenu uchana mulopa wose wa ihoko witike muna iisi, kulawa mulopa wa Abeli yuja mwene ihoko mpaka mulopa wa Zekaria mwanage Barakia yumkomile mngʼanda ja Mulungu behibehi na mazbahu.

³⁶ Ihoko nomulongelani, manzonza higo gose gokwiza mulukolo luno.

³⁷ Yerusalemu, Yerusalemu gweye, ukomaga iwalaguzi, na kutowa na mabwe waja watumigwe kumwako! Miyanza mingahi inondile kuwalundiza wanago hamonga, kamba vija nguku viyolundizaga vyanage hamonga, hasi mmabawa gake, komu hamvilondile.

³⁸ Loleni! Hekalu jenu molekelwa nghiwa.

³⁹ Vilemelaga nomulongelani, hondambone ngʼono kulawa lelo mpaka vondamulonge, ‘Yatunizwe Yokwiza kwa Tagwa ja Bwanaʼ!”