Mateo 22 - Lagano da Isambi

Lusona lwa mndewa

¹ Yesu kedika kawalongela kabili kwa mizungu yolonga:

² “Undewa wa kuulanga ulumba na Mndewa imonga yamtendele mwanage lusona lwa kusola mwehe.

³ Kawatuma nyakadala zake, wawakeme wagonekwe weze halusona; ahewo walema ukwiza.

⁴ Kawatuma kabili nyakadala wayagwe, yolonga, ‘Walongeleni waja wagonekwe, loleni nika goya mandiya gangu, mikambaku ya ngʼombe zangu na vinonile visikigwa, na vyose vimala kwikigwa goya; izoni halusona!ʼ

⁵ Bali hawasinhuke, wachola na zawo, imonga kumgunda wake, iyagwe kuchuluzi wake.

⁶ Awaja wasigale wawagoga nyakadala zake, wawatowa, imala wawakoma.

⁷ Baho yuja imndewa kagwa lusango, kagala minyalinyali yake, kawakoma wandumu waja, kadisoma diwambo jawo.

⁸ Yomala kawalongela nyakadala zake, ‘Imwali kalawa, bali waja wagonekwe hawandakane mulusona.

⁹ Avo choleni kunzila mhanda, na waja wose wonda mwone wakemeni halusona!ʼ

¹⁰ Nyakadala walawa wachola kunzila nghulu, wawalundiza wose wawawene, wehile wanogile; lusona lumema wahenza.

¹¹ Viyengile yuja mndewa giladi yawalole wahenza zake, kamona muja munhu imonga, havalile kihambo cha lusona.

¹² Kamuuza, ‘Mbwiga, wingileze muno, na gweye kwabule ikihambo cha lusona? Na heyo kabule ya ukulonga.

¹³ Mndewa kawalongela wasanghani, Mdazeni imikono na imigulu, msoleni mkamwase kunze mdiziza, kuko kondakuwe ndilo na kugegeda gameno.

¹⁴ Kilumbo wakemigwe bwando, komu wasaguligwe wadodo.”

Kumulavila mtawala kodi

¹⁵ Baho Mafariseo wachola na zawo, watenda mzengwe wa kumsepa Yesu muna ulonzi.

¹⁶ Wawagala kumwake wanahina zawo hamonga na wanhu wa Herode, walonga, “Mkulufunzi, tukutanga kamba gweye kwa munhu wa ihoko, kolanguliza nzila za Mulungu mwihoko hata hudumba ukulu wa munhu, kilumbo hulola vihanga vya wanhu.

¹⁷ Avo tulongele kokonaze. Vyandakana kumulavila kodi Mtawala wa iisi, hebu si vivo?”

¹⁸ Yesu kautanga wihilo uwali nawo, kalonga, “Habali mungeza mweye wazenzeleganye? Ndagusileni mhiya za kodi.” Na hewo wamgalila lobo.

¹⁹ Kawauza, “Cha nani kihanga kino na utango uno?”

²⁰ Wamulongela, “Uno wa Mtawala Kaisari.”

²¹ Kawalongela, “Muliheni Mtawala gali gake, na Mulungu gali gake Mulungu!”

²² Vuwahulike wakanganya, wamuleka, wachola na zawo.

Kuzuka kwa wafile

²³ Disiku didija Masadukeo, wanhu walongaga kamba haduhu kuzuka, wamgendela Yesu wamuuze mbuli.

²⁴ Walonga, “Mkulufunzi, Mose kalonga munhu yahafa yahawa bule wana, ndugu yake yamwingilile yuja disano jake, giladi yamlelele ndugu yake wana.

²⁵ Avo kumwetu kukala wandugu saba. Imulongozi kasola kadanganika, halelile wana, kamulekela ndugu yake dija disano.

²⁶ Waikabili na heyo vivo, na wekadatu mpaka saba wose.

²⁷ Vuwamalile wose, yuja imtwanzi na heyo kadanganika.

²⁸ Aho hali disiku ja ukuzuka kokuwa sano ja yalihi muna iwanhu waja saba, kilumbo wose wakala nayo?”

²⁹ Yesu kedika kawalongela, “Mokwaga, kilumbo hamgatanga gandikigwe, na mhiko za Mulungu hamzitanga.

³⁰ Kilumbo hana ukuzuka hawasola wala hawasoligwa, bali wogalamka kamba malaika kuulanga.

³¹ Kabili muna mbuli za kuzuka kwa wafile, hamnadisoma Longa dilongigwe na Mulungu:

³² Niye na Mulungu wa Abrahamu na Mulungu wa Isaka na Mulungu wa Yakobo? Mulungu si Mulungu wawo wafile bali wali na upile.”

³³ Wanhu vuwahulike wakanganya kilumbo cha malangulizo gake.

Ndagizi nghulu iyo ilihi

³⁴ Na hewo Mafariseo vuwahulike kamba kawaziba imilomo waja Wasadukeo, weka zundo hamonga.

³⁵ Na imonga miyawo, mwana-Nhaguso kamuuza yomgeza,

³⁶ “Mkulufunzi, muna zinzuma ndagizi inghulu ilihi?”

³⁷ Kamulongela, “Mnogele Mndewa Mulungu wako kwa moyo wako wose, kwa iloho yako yose na kwa fiyuko zako zose!

³⁸ Ino iyo ndagizi inghulu, ayo iyo ilongole.

³⁹ Ija yekabili ilingana nayo, iyo ino: Mnogele yukala nayo habehi, kamba vuwinogele mwenyecho!

⁴⁰ Ndagizo zino mbili ziduganya Nzuma ngima na Walaguzi.”

Mwanage Daudi yuyo bwana wake

⁴¹ Mafariseo vuwelundize, Yesu kawauza,

⁴² kalonga, “Mokonaze kwa kilumbo cha Kristo, heyo mwanage nani?” Wamulongela, “Mwanage Daudi.”

⁴³ Kawauza, “Vokuwaze amba Daudi muna Iloho kamkema Mndewa wake, yolonga,

⁴⁴ Bwana Mulungu kamulongela Mndewa wangu, Ukale mkono wangu wa ukulume mpaka vondaniweke wandumu wako wawe hasi ya migulu yako!

⁴⁵ Avo Daudi yahamkema Mndewa wake, vokuwaze yawe mwanage?”

⁴⁶ Basi haduhu munhu yadahile kumwidika mbuli; kabili habwaduke munhu yoyose kumuuza mbuli lulawile isiku ija.