Mateo 18 - Lagano da Isambi

Mgaluke muwe vinghele

¹ Kimilo kikija iwanahina wamgendela Yesu walonga, “Mkulu muundewa wa Mulungu yuyo yalihi?”

² Kakema mwana imonga, kamwika hagatigati jawo.

³ Kalonga, “Kingongongo nomulongelani, muhaleka kugaluka mgalamke wana wadodo, hondamwingile mundewa wa Mulungu ngʼo.

⁴ Kilumbo yondayesanghane mwenyecho kamba mwana mdodo yuno, yuyo yali mkulu mundewa wa Mulungu.

⁵ Na yoyose yondayambokele mwana imonga yalingane kamba yuno mtagwa jangu, kambokela niye.

⁶ Bali yondayamwagize imonga wawo iwadodo wano wangogile niye, vomnogela yakotelezwe mugosi dibwe kulu ja kusagila, na kudidimizwa hali inghuta ya ibahali.

Nghwalo zidumilizwa

⁷ Amba kimu cha nghwalo, isi baye yojona; kilumbo hondazileke kwiza mbuli za kwikwala, bali leka kojona munhu yuja yavigalile vikwangwazo!

⁸ Kamba mkono bule mgulu wako uhakuhonza, ukanhe uwase kutali nagwe; vonoga goya wingila muupile, kuno uhungukilwe na mkono bule mgulu, kamba kukala na mikono mibili au migulu mibili, imala wasigwe muna umoto wa digunge.

⁹ Kamba siso jako dihakuhonza, dingʼole ujase kutali nagwe; vonoga goya wingila muupile na siso dimonga, kamba kukala na meso mabili, imala wasigwe muna umoto wa digunge.

Kukihonya chagile

¹⁰ Teganyeni sikumbeze miyawo imonga wa iwadodo wano, kwa mzoko nomulongelani, malaika zawo kuulanga siku zose wokilola ikihanga cha Tata wangu yali kuulanga.

¹¹ Kilumbo Mwanage Munhu keza kukihonya chagile.

¹² Mokonaze munhu yahawa na nghondolo muzo umonga, imonga yahaga, avo hawaleka waja milongo kenda na kenda, yachole mvigongo yakamzahile yuja yagile?

¹³ Vondayamone, togola nomulongelani, komdenghelela hiyo nghani kubanza waja milongo kenda na kenda hawagile.

¹⁴ Avo havimnogele Tata wenu yali kuulanga, kamba imonga wa wadodo wano yage.

Ndugu yako yahakutozela

¹⁵ Kamba ndugu yako yahakutozela, genda umzume muli yeka; yahakuhulika, mwilumba na ndugu yako.

¹⁶ Kamba hakuhulike, msole mgale ha munhu imonga hebu wabili, giladi imbuli ikale goya kwa milomo ya wasindi wabili bule wadatu.

¹⁷ Kamba hawahulike hiwo, dilongele dale ja wanahina; kamba haditegeleze dale da wanahina, umtende kumwako kamba munhu yungwa na muwila kodi.

¹⁸ Togola nomulongelani, gosegose gondamgahindile mulumwengu, gohindilwa kwa Mulungu, na higo gose gondamgavugulile mulumwengu, govugulilwa kwa Mulungu.

¹⁹ Kabili nomulongelani: wabili wenu mana wokitogoza mulumwengu muna imbuli yose yondawapule, wogwelelwa na Tata wangu yali kuulanga.

²⁰ Kilumbo hawali wabili wadatu welundiza mditagwa jangu, na niye nabahano hagatigati jawo.”

Wene denyi wabili

²¹ Yomala Petro kamgendela Yesu kamuuza, “Mndewa, ndugu yangu yahanhozela miyanza mingahi, na niye nimulekesele; ivike miyanza Saba?”

²² Yesu kamulongela, “Sikulongele ivike miyanza saba aka, bali miyanza saba kubweleza milongo saba.

²³ Kileka hivo Undewa wa Kuulanga ulingana na mndewa imonga yalondile kupeta mhiya zake na nyakadala zake.

²⁴ Viyasongile kuitenda, kagalilwa munhu imonga yowiligwa mhiya talanta elfu kumi.

²⁵ Na heyo viyakalile bule cha ukuliha, mndewa wake kalagiza yagaligwe heyo na sano jake na iwanage na vinhu vyose viyali navyo, dikalihigwe dija didenyi.

²⁶ Bali ija nyakadala kagwa hasi, kamfugamila mavindi, yomuhembekeza yolonga, Mndewa, ndekesa, na niye nokuliha gose gomala.

²⁷ Mndewa wa nyakadala yuja kamonela bazi, kamdohola, kamulekela dija didenyi.

²⁸ Nyakadala yuja kalawa, kamona miyage imonga wa unyakadala wawo, yakalile yomuwila mhiya muzo umonga; kamgoga yomfida dimelo yolonga, Ndiha chunghopile!

²⁹ Bali nyakadala miyage kamgwila hamigulu yake, kamuhembekeza yomulongela, Ndekesa, na niye nokuliha gose higo!

³⁰ Bali hatogole, kagenda kamgela mkifungo, mpaka vondayailihe ija idenyi.

³¹ Nyakadala wayage vuwagawene gatendigwe, wagwa lusango nghani, wagenda wampetela mndewa wawo gose gatendigwe.

³² Baho mndewa wake kamkema, kamulongela, Gweye nyakadala wihile umoyo, nikulekesa gweye denyi dija jose vumhembekeze.

³³ Agweye havikunogele kumonela bazi nyakadala miyago, kamba niye vinikonele bazi gweye?

³⁴ Mndewa wake kona lusango, kamgala kuwagazaga iwanhu, mpaka vondayadilihe didenyi dija jose.

³⁵ Vivo na Tata wangu wa Kuulanga vondayamtendeleni mweye, muhaleka kulekesela mmoyo munhu na ndugu yake.”