Mateo 17 - Lagano da Isambi

Yesu kagaluka lukuli kudigongo

¹ Vizibitile siku sita, Yesu kawasola Petro, Yakobo na Yohana ndugu yake, kawagala uchana kudigongo tali hakifiso.

² Kagaluka lukuli lwake bahaja hawali; kihanga chake kingʼala kamba zuwa, nghanzu yake igaluka nzelu kuno yomelemeta.

³ Na lola walawililwa na Mose na Eliya, wolongelela nayo.

⁴ Petro kedika kamulongela Yesu, “Mndewa, vinoga tweye tukala bahano; uhalonda novizenga hano vingʼanda vidatu, kimonga chako gweye, kimonga cha Mose na kimonga cha Eliya.”

⁵ Viyakalile yolonga, lola wingu zelu diwagela kiziza; bahaja kulawa dizwi dilawa mdiwingu dilonga, “Yuno yuyo mwanangu inogelwe nayo, mtegelezeni yuyo!”

⁶ Awaja iwanahina vuwahulike, wagwa kingubanguba, wadumba nghani.

⁷ Yesu keza kawakwasa kalonga, “Inukeni, sikumdumbe!”

⁸ Wenula meso gawo, hawamuwene munhu komu Yesu yali yeka.

Eliya kamala kwiza

⁹ Aluja luwakalile wohumuluka hakigongo, Yesu kawalagiza yolonga, “Sikumumpetele munhu wowose gamuwene, mpaka Mwanage Munhu vondayazuke kulawa kwa wafile!”

¹⁰ Wanahina zake wamuuza, “Kumbe habali wana-Nzuma wolonga kamba Eliya vimwandakana kwiza lumosi?”

¹¹ Na heyo kedika, “Ihoko Eliya kokwiza lumosi yasanghane goya gose.

¹² Bali nomulongelani kamba Eliya kalongola, hawamtangile bule, vilema wamtendela gose gawalondile; avo vivo Mwanage Munhu na heyo kogenda kugazwa kumwawo.”

¹³ Kileka wanahina baho wavitangile kamba kalonga na hewo mbuli za Yohana Msingula wanhu.

Mwana mwene chokamuhogo

¹⁴ Vuwauvikile mtinghano, munhu imonga kamwizila, kamfugamila mavindi yolonga,

¹⁵ “Mndewa, umonele bazi mwanangu, kilumbo kana chokamuhogo, kogazwa vihile; miyanza bwando kogwila hamoto, na miyana bwando mmazi.

¹⁶ Nimgala kwa wanahina zako, hawamuhonyile.”

¹⁷ Yesu kedika, “Mweye lukolo lupweteke ukugoga! Nokala hamonga na mweye mpaka kwahi?

¹⁸ Nokilongoza namwe mpaka kwahi? Mgaleni kuno kumwangu!” Yesu kaukomhokela umzuka, na hiwo umulawa; yuja imhale kahona kimilo kikija.

¹⁹ Womala iwanahina wamgendela Yesu hamtimbeho walonga, “Habali tweye hatudahile kuulava?”

²⁰ Yesu kawalongela, “Kileka hivo muhungukilwa kungoga. Amba hivo kingongongo nomulongelani, muhawa na kugoga kulingane na kibegu cha mvule, modilongela digongo dino, Segela hano, ugende kuja, na hijo josegela; kabili hondaiwe mbuli ileka kudahika kumwenu.

²¹ Bali lukolo kamba luno halulawa komu muna ukupula na ukuleka kuja.”

Migazo ya Yesu, langulizo jekabili

²² Na hewo vuwakalile wokala Galilea, Yesu kawalongela, “Mwanage Munhu kogenda kugeligwa mmikono ya wanhu.

²³ Na hewo womkoma, imala siku jekadatu kozuka.” Wagwa kizumbo nghani.

Kuliha kodi ya Hekalu

²⁴ Vuwavikile Kapernaumu, waja wawila kodi ya hekalu wamgendela Petro wamuuza, “Chei, avija mkulufunzi wenu halavaga kodi?”

²⁵ Kalonga, “Kalavaga.” Na heyo viyengile mngʼanda, Yesu kalongola kumuuza yolonga, “Kovo-naze, Simoni, wandewa wa isi wasolaga kodi bule nyongeza mwa wanhu walihi? Mwa iwanawo hebu mwa iwahenza?”

²⁶ Na heyo viyalongile, “Mwa iwahenza.” Yesu kedika, “Avo iwana wagolo.

²⁷ Bali sukutugombe nawo, genda muna ibahali, ukagele indiwano, ukasole isomba yuja yonamata ikilongozi; vondaumnanazule mulomo wake, kokona mhiya, isole hiyo ukawenghe, undavile niye hamonga na gweye.”