Mateo 16 - Lagano da Isambi

Kutambula milongo ya Yesu

¹ Wamwizila Mafariseo na Masadukeo wamgeze, wampula yawalagile kilolomboto kulawa kuulanga.

² Kedika kawalongela, “Kuhawa ichungulo, molonga, Kokuwa na kiyanga, kilumbo ulanga mdunghu.

³ Na imitondo molonga, Lelo kokuwa na bidabida, kilumbo ulanga mdunghu na mtitu. Mweye wazenzeleganye, mvitanga kutambula kihanga cha ulanga, habali vilolomboto vya milongo ino hamdaha kuvitambula?

⁴ Mlelo wihile na wa ugoni wolonda kilolomboto; bali hondaugwelelwe komu kilolomboto cha Yona.” Kawaleka, kachola na zake.

Mhumba ya Mafariseo

⁵ Na hewo iwanahina waloka umwambu uyagwe, wesemweza kusola imigate.

⁶ Yesu kawalongela, “Teganyeni mwituze na mhumba ya Mafariseo na Masadukeo!”

⁷ Webamilila wenyego kwa wenyego wolonga, “Mmanye vutulekile kusola migate!”

⁸ Aheyo Yesu kavitanga kawalongela, “Habali mkibamilila mwemwe kwa mwemwe, mweye wene nhamanilo ndodo, kilumbo mwabule migate?

⁹ Hamnavitanga, kabili hamkumbukila ija imigate mitano na waja wanhu elfu tano; vigelo vingahi vumdondole?

¹⁰ Kabili ija migate saba na waja wanhu elfu ne, na vigelo vingahi vumdondole?

¹¹ Vokuwaze mleka kuvitanga, niye silongile mbuli ya migate? Bali ituzeni na mhumba ya Mafariseo na Masadukeo!”

¹² Baho wavitanga kamba kawalongela wateganye malangulizo ga Mafariseo na Masadukeo, si mhumba ya migate.

Petro viyamtogole Yesu na kukemigwa dibwe

¹³ Imala Yesu kachola isi ya Kaisaria-Filipi, kawauza wanahina zake yolonga, “Wanhu wolonga Mwanage Munhu yuyo yalihi?”

¹⁴ Wamulongela, “Wayagwe wokulonga kwa Yohana Msingula wanhu, wayagwe Eliya, wayagwe Yeremia bule imonga wa Watula-Ndagu.”

¹⁵ Kawauza, “Na mweye mononga niye kamba nili yalihi?”

¹⁶ Simoni Petro kedika kalonga, “Gweye gwegwe Kristo Mesia, mwanage Mulungu yali Mpile.”

¹⁷ Yesu kedika kamulongela, “Kumota gweye Simoni Bar-Yona! Kilumbo lukuli na mulopa havikugubulile dino, bali Tata wangu yali kuulanga.

¹⁸ Na niye nokulongela: Gweye gwegwe Petro, na uchana mdibwe dino nodizenga didale jangu, na nyivi za kuzimu hondazidihume.

¹⁹ Na niye nokugwelela mvugulilo za undewa wa Mulungu; jojose jondaudihindile mulumwengu, na kwa Mulungu johindilwa, najo jose jondaudivugulile mulumwengu, na kwa Mulungu dovugulilwa.”

²⁰ Baho yawagomesele nghani wanahina zake, sikuwamulongele munhu hata imonga kamba heyo yuyo Kristo Mesia.

Migazo ya Yesu; kwihonya hebu kwibela

²¹ Kulawa kipigiti kicho Yesu kasonga kuwalanguliza wanahina zake, kamba vimwandakana kuchola Yerusalemu na kugazwa nghani na Walala, wakulu wa nhambiko na wana-Nzuma, na kudanganika na siku jekadatu kuzuka.

²² Petro kamsola, kandusa kumkomhokela yolonga, “Sivivo, Mndewa, higo hondagakuwandame.”

²³ Kahinduka kamulongela Petro, “Segela kukisogo changu, Kinyamkela! Gweye kwa nghwalo kumwangu, kilumbo hugelegeza ga Mulungu, komu ga wanhu.”

²⁴ Kikomo hicho Yesu kawalongela wanahina zake, “Munhu yahalonda kungholeleza, yanduse kwibela mwenyecho, yedwike biki ja kudanganika heyo, avo yangholeleze.

²⁵ Kilumbo munhu yolonda kwihonya loho yake, koyagiza; bali yondayagize loho yake kwa kunonda niye, koihonya.

²⁶ Bule kopata choni munhu yahaupata ulumwengu wose, kamba yahamala kuyasa loho yake? Bule kolava choni cha kuikombola loho yake?

²⁷ Kilumbo Mwanage Munhu kokwiza na iyenzi ya Tata wake hamonga na malaika zake, baho komuliha kila munhu ningo ya masanghano gake.

²⁸ Ihoko nomulongelani, bahano hana wanhu wemile, na hewo hondawailanze ifa ngʼo, mpaka vondawamone Mwanage Munhu yokwiza mundewa wake.”