Mateo 15 - Lagano da Isambi

Zimbokezi za iwanhu

¹ Baho Mafariseo hamonga na wana-Nzuma walawa Yerusalemu, wamgendela Yesu walonga,

² “Habali wanahina zako wozibananga mbila za wahenga, kilumbo hawanawa mikono kikomo cha kuja mandiya?”

³ Kedika kawalongela, “Habali mweye moibananga mbila ya Mulungu mzimbokezi zenu?

⁴ Kilumbo Mulungu kalonga: Wahulike tata wako na mamaako, na Yomuliga tataake bule mamaake, kodanganika.

⁵ Bali mweye molonga, Yondayamulongele tataake bule mamaake, chochose kikunogele kutazwa na niye, acho cha Mulungu,

⁶ avo sekeyamtaze tata wake hebu mamaake. Na mweye mwibeza ndagizo ya Mulungu muna zimbokezi zenu.

⁷ Mweye wazenzeleganyi! Vinoga viyalagule Yesaya kumwenu yolonga:

⁸ Wanhu wano wonhogola mmilomo, komu miyoyo yawo yakutali na niye.

⁹ Na hewo wonhambikila yamba, wolanguliza malangulizo gali ndagizi za wanhu.”

Vilawaga mmulomo vyene uchapalisi

¹⁰ Kawakema matinghanilo kawalongela, “Tegelezeni, mvimanye!

¹¹ Si kija kimwingila munhu mumlomo, kimgelaga uchapalisi, bali kija kilawaga mumlomo kicho kimgela munhu uchapalisi.”

¹² Baho wanahina zake wamgendela, wamulongela, “Kuvitanga kamba Mafariseo vuwahulike mbuli ija, wehilwa?”

¹³ Kedika kalonga, “Ndigwa haihandile Tata wangu wa kuulanga, yongʼoligwa.

¹⁴ Walekeni vivo, awo vimbugumbugu wolongoza vimbugumbugu; kamba kimbugumbugu yahamulongoza kimbugumbugu miyage, wokwingila mkolongo wose wabili.”

¹⁵ Baho Petro yedike yomulongela, “Tupetele hala hijo!”

¹⁶ Yesu kalonga, “Mwemwe na mweye tanhu mwabule lutondo?

¹⁷ Hamvitanga kamba kinhu kihengila mumlomo, chobita mmunda, chogenda kwasigwa kucholo?

¹⁸ Bali vilawaga mumlomo, volawa mmoyo; hivovivo vimgelaga munhu uchapalisi.

¹⁹ Kilumbo muna umoyo molawa ngelegeza zihile, kukoma, ugoni, ufutuzi wa watwanzi, ubavi, ukalangama wa uvwizi, na maligo.

²⁰ Ago gago gamgelaga munhu uchapalisi; kamba ukuja na dikwe mmikono hunanawa, hakumgela munhu uchapalisi.”

Mtwanzi mkananeo

²¹ Yesu kakulawa hiko, kagenda lwenza lwa Tiro na Sidoni.

²² Baho mtwanzi Mkananeo yali muiisi ija kalawilila, kamtowela lwangi yolonga, “Umbonele bazi, Mndewa mwanage Daudi. Biti wangu kavagalwa nghani na mizuka.”

²³ Bali Yesu hamwidike mbuli. Na wanahina zake wamgendela, wampula wolonga, “Muleke yachole, kilumbo kotudesela kukisogo chetu.”

²⁴ Kedika kalonga, “Sigaligwe hengine komu muna iwanghondolo wagile wali mngʼanda ya Israeli.”

²⁵ Ija mtwanzi keza kamfugamila mavindi yolonga, “Mndewa, nhaza!”

²⁶ Kedika kalonga, “Havinogile kusola mandiya ga iwana na kuwasila ngʼangʼa.”

²⁷ Kalonga, “Ona Mndewa, bali mpaka ngʼangʼa wajaga upakapaka ulagale mkiya cha bwana wawo.”

²⁸ Baho Yesu yedike yomulongela, “Mama, kutogola kwako kukulu! Na viwe kumwako kamba vulonda.” Kahona biti wake lulawile ikimilo kikija.

Watamu kiyeka kiyeka wahona

²⁹ Yesu kakulawa hiko, kavika hangwazo ha ibahali ya Galilea, kakwena hakigongo, kakala hasi.

³⁰ Wamgendela matinghanilo bwando, wamgalila vimbetembete, vimbugumbugu, mibubuwi, wabanangike na wayagwe wayagwe bwando, waweka hamigulu yake, kawahonya.

³¹ Uja umtinghanilo wakanganya vuwawene mibubuwi yolonga, wabanangike wogalamka wagima, vimbetembete wochola na vimbugumbugu wolola, wamtuniza Mulungu wa Israeli.

Wanhu elfu ne weguta

³² Yesu kawakema wanahina wake kalonga, “Nowonela bazi matinghanilo, kilumbo dopata siku jekadatu wokala ha-monga na niye, na hewo wabule kinhu cha ukuja; komu kuwapoza wasindile na inzala ndema, sikuweze wasindukile mnzila.”

³³ Wanahina wamulongela, “Toipata halihi migate bwando hano haluwala, tuweguse mtinghano mkulu kamba uno?”

³⁴ Yesu kawauza, “Migate mingahi yumuli nayo?” Walonga, “Saba, na visomba vidododo.”

³⁵ Kawalagiza wanhu wakale hasi.

³⁶ Kaisola ija imigate saba na vija visomba vidododo, kamtogola Mulungu, kavimega kawengha wanahina zake, na hewo iwanahina wawengha matinghanilo.

³⁷ Waja wose weguta; walundiza visigale vya imigate, vigelo saba vimema.

³⁸ Awo wadile wakala wambigalo elfu ne, uhaleka kupeta watwanzi na iwana.

³⁹ Kawapoza madala, kengila mngalawa, kagenda umwambu wa Magadani.