Mateo 13 - Lagano da Isambi

Hanhu hane hahandigwe

¹ Siku didija Yesu kalawa mngʼanda, kakala hasi behibehi na ibahali.

² Wamulundila matinghanilo bwando, na heyo kakwena mngalawa kakala; auja umtinghanilo wose wema wima muufuko.

³ Kawalongela mbuli bwando mmafumbo, yolonga, “Lola mlimi kalawa kagenda kuhanda.

⁴ Aluja luyakalile yohanda, mbegu zimonga zigwila behi-behi na inzila, ndege weza wazija.

⁵ Ziyagwe zigwila hana gamabwe, hali na ludongo ludodo, mhunde zota, kilumbo didongo dodo;

⁶ avija zuwa vidilawile zilukula, kilumbo zabule mizizi, zifa.

⁷ Ziyagwe zigwila hana imizomola; aija imizomola ikula, ikasesela.

⁸ Ziyagwe zigwila haludongo lunogile, zilela, imonga muzo, imonga milongo sita, imonga milongo midatu.

⁹ Mwene magutwi nayahulike!”

Nyongʼonyo za Undewa

¹⁰ Weza iwanahina wamuuza, “Habali gweye ulonga nawo mmafumbo?”

¹¹ Kedika kawalongela, “Mweye mmota kuzitanga nyongʼonyo zili mundewa wa Kuulanga, bali hewo hawamonile.

¹² Kilumbo munhu yahawa na kinhu, kogwelelwa imala kongezelwa, kimeme dubwa; bali munhu yahawa bule kinhu, mpaka kija kiyali nacho kobokigwa.

¹³ Kileka hivo nilonga nawo kuno nifumba, kilumbo wahalola hawavona, hebu wotegeleza hawahulika, kabili hawavitanga.

¹⁴ Avo longa ja mtula ndagu Yesaya dovikizwa kumwawo dilonga: ‘Kuhulika mohulika, hondamvitange. Kulola molola, hondamvone.

¹⁵ Kumbe miyoyo ya wanhu wano midala, na magutwi gawo hawahulika goya, na meso gawo wafimiliza, sikuweze walole na meso gawo, bule kuhulika na magwiti gawo, bule kuvimanya na miyoyo yawo, sikuwagaluke niwahonye.ʼ

¹⁶ Bali gamota meso genu, kilumbo golola, na magwiti genu kilumbo gohulika.

¹⁷ Kingongongo nomulongelani, walaguzi bwando na wene ihoko wagalonda kugona gomkona mweye, hawagawene, hebu kuhulika gomuhulika mweye, hawagahulike.

Hala ja mlimi jofumbulwa

¹⁸ Avo tegelezeni hala ja mlimi.

¹⁹ Ayuja imunhu yohulika Longa ja Undewa, bali hadigoga, kokwiza yuja Imndumu, kodisola dija dihandigwe mmoyo mmwake, ayo yuyo yahandigwe behibehi na nzila.

²⁰ Ayuja yahandigwe hali gamabwe, yuyo yodihulika dija dilonga, kadibokela mbwisa na kudenghelela.

²¹ Bali kabule mizizi mmoyo mmwake, kokala najo mhunde; zihalawilila zihilo hebu sonza muna inzila iija ya dilonga, mhunde hehilwa.

²² Ayuja yahandigwe hali mizomola, hiyo yuyo yadihulike Longa, bali mzahizahi wa ulumwengu hamonga na uzenzeleganye wa mali usongezela dija Longa, dokula bule, hadilela.

²³ Ayuja yahandigwe haludongo lunogile, hiyo yuyo yadihulike Longa na kudikolela, ayo yuyo yolela umujo, yuno mzo, yuno milongo sita, ayuno milongo midatu.”

Milolo hagati ya umuhunga

²⁴ Kawalavila lugano luyagwe yolonga, “Undewa wa Mulungu ulingana na munhu yahandile mbegu inogile mumgunda wake.

²⁵ Avija wanhu vuwawasile, keza mndumu wake, kahanda milolo hagatigati ya umuhunga, yomala kachola.

²⁶ Imala baho umuhunga vukulile na kukungʼunha, yoneka na imijani.

²⁷ Nyakadala wa mwene ngʼanda wagenda, wa-mulongela, Mndewa, huhandile mbegu inogile mumgunda wako? Kumbe izaze imilolo?

²⁸ Kawalongela, Mndumu yuyo yasanghane hivo. Baho nyakadala wamulongele, Avo kolonda tuchole, tukaingʼole?

²⁹ Kalonga, ‘Aka, sukumwisegeze mijani, bule kwiza moungʼola na muhunga!

³⁰ ilekeni vyose vikule mpaka ikikomo cha ukuhuna; avo ikikomo hicho nowalongela waja wohuna: Isegezeni tanhu imijani, mwibande vikinza vikinza mkavisome; bali umuhunga ulundizeni kukano jangu!”

Mbeyu ya mvule

³¹ Kawalavila lugano luyagwe yolonga, “Undewa wa Mulungu ulingana na mbeyu ya mvule, yaisolile munhu kaihanda mumgunda wake.

³² Na hiyo ndodo kubanza mbegu zose, bali vimalile kukula, igalamka nghulu kubanza vyotile vyose; igalamka biki, hata ndege wa uchana wokwiza na kukala muna imitambi yake.”

Mhumba

³³ Kawalongela hala diyagwe, “Undewa wa Mulungu ulingana na mhumba, yaisolile mtwanzi, kaihanganya hamonga na mhishi ndatu za usage, ilawa baho usasa wose hamonga.”

Kugesa fumbo

³⁴ Ago gose Yesu kakala yowalanguliza wanhu, kuno yofumba, kabili hawalongele mbuli ili bule lugano.

³⁵ Giladi divikizwe longa dilongigwe na mtula-Ndagu yolonga: “Nounanula mlomo wangu ndave mahala, ngalonge gafisigwe lulawile ichanduso.”

Milolo igamba choni

³⁶ Yomala Yesu kawapoza matinghanilo, kengila mngʼanda. Wanahina zake wamgendela wolonga, “Tupetele hala dija ja milolo ya mumgunda.”

³⁷ Kedika kalonga, “Yazihandile mbegu zinogile yuyo Mwanage Munhu.

³⁸ Auja umgunda uwo ulumwengu. Azija zimbegu zinogile wawo iwana wa Undewa. Aija imilolo wawo iwana wa yuja Imndumu.

³⁹ Aija imndumu yazihandile yuyo Mwenembago; ukuhuna kicho kimambukizo cha ulumwengu; awaja wohuna wawo iwamalaika.

⁴⁰ Avo vija imilolo vilundizwa, imala isomigwa hamoto, vivo vondaviwe haikimambukizo cha ulumwengu.

⁴¹ Mwanage Munhu kowatuma malaika zake, na hewo wolundiza mundewa wake gehile gose na awo watendile gehile.

⁴² Wokwasigwa mditundu ja umoto, kwiza kokuwa na ndilo na kugegeda gameno.

⁴³ Baho wene ihoko vondawangʼale kamba zuwa mundewa wa Tata wawo. Mwene magutwi nayahulike!

Bikilo dili mumgunda

⁴⁴ Kabili undewa wa Mulungu ugalamka bikilo diifisile mumgunda; avija munhu viyadiwene, kadifisa kuno yodenghelela, kachola kaviguliza viyali navyo vyose, kaugula umgunda uja.

Lulu inogile

⁴⁵ Kabili Undewa wa Mulungu ugalamka munhu mchuluzi, mwene kuzahila lulu zinogile.

⁴⁶ Na heyo viyaiwene lulu imonga ina mhiya bwando, kachola kaviguliza viyali navyo vyose, kaigula ija ilulu.

Lwavu lutegwa

⁴⁷ Kabili Undewa wa Mulungu ugalamka lwavu lutegelwe mbahali, lulundiza vyosevyose.

⁴⁸ Vulumemile, walubululila muufuko; wakala wasagula waja wanogile muna iviya, bali waja wehile wawasa.

⁴⁹ Vivo vondaviwe haikimambukizo cha ulumwengu. Malaika kwiza wolawa, wowabagula wehile mgati ja wene ihoko.

⁵⁰ Wokwasigwa mditundu ja umoto; kuko kondakuwe ndilo na kugegeda gameno.”

⁵¹ Yesu kawauza, “Mgamanya higo gose?” Wamulongela, “Wona.”

⁵² Kawalongela, “Avo mwana-Nzuma yoyose yalangukizwe Undewa wa Mulungu, kagalamka mwene ngʼanda, yolava vinhu vya sambi na vya umwaka mdibikilo jake.”

Yesu ukaye Nazareti

⁵³ Avija Yesu viyamambukize gamahala higo, kasegela hiko.

⁵⁴ Viyavikile hakiwambo chake Nazareti kuyakulile, kawalanguliza mdingʼanda ja nhambiko, na hewo wakanganya walonga, “Yuno kaipata kwahi fiyuko ino na malolomboto gano?

⁵⁵ Yuno siyo mwanage msongola mibiki? Na mamaake si ija yokemigwa Maria, na ndugu zake kina Yakobo, Yosefu, Simoni na Yuda?

⁵⁶ Na walumbu zake wose hawali bahano hamwetu? Chei kagapata kwahi gano gose?”

⁵⁷ Wehilwa nayo. Yesu kawalongela, “Mlaguzi habezigwa haulilingwa, komu kukiwambo chake hebu mulukolo lwake mwenyecho.” Avo hatendile vilolomboto bwando hiko, kwa vija vuwalekile kumtogola.