Mateo 11 - Lagano da Isambi

Nyongea ya Yohana msingula wanhu

¹ Aluja Yesu luyamalile kuwalagiza wanahina zake umulongo umwe na wabili, kakulawa hiko, kachola kuwalanguliza na kupeta mbuli muna iviwambo vyawo.

² Na heyo Yohana viyahulike hiko kuyafungigwe manzonza gake Kristo, kawagala wanahina zake kumuuza,

³ “Gweye yuyo Yuja Yokwiza hebu tumbete iyagwe?”

⁴ Yesu kedika kawalongela, “Gendeni mkampetele Yohana gomuhulika na gomkona!

⁵ Vimbugumbugu wolola, mbetembete wochola, wene dikulu wohonyigwa, watulike gamagutwi wohulika, wafile wozusigwa, awo iwakiwa wopetelwa Mbuli Inogile.

⁶ Vyemela kamota imunhu yalekile kwihilwa na niye!”

Ulaguzi wa Yohana msingula wanhu

⁷ Ahewo vuwacholile kumwawo, Yesu kasonga kuwapetela iwanhu simulizi za Yohana yolonga, “Mweye mlawa mgenda kuluwala kulola choni? Misanze itigiswa na beho?

⁸ Hebu mlawa mgenda kulola choni? Munhu yavazigwe miguwo imitali? Lola wanhu wovala miguwo imitali wamumo mzingʼanda zawo watawala.

⁹ Bali hiyo, habali mlawile? Kumulola mlaguzi? Ona, nomulongelani, aheyo yobanza mlaguzi!

¹⁰ Hiyo yuyo yandikilwe: Lola nomgala msenga wangu hakihanga chako, yondayaigolose nzila yako hakihanga chako.

¹¹ Amini nomulongelani, hanalawilila munhu yaleligwe na mtwanzi yawe mkulu kubanza Yohana Msingulawanhu; komu yali imdodo muundewa wa Mulungu, yuyo mkulu kubita heyo.

¹² Lulawile milongo ya Yohana Msingula-wanhu kuzigila sambi, Undewa wa Mulungu wokwingilwa na mhiko; awo wene zimhiko woubokonya.

¹³ Kilumbo walaguzi wose na Inzuma yenyecho walagulila kikomo cha Yohana.

¹⁴ Avo muhalonda kuvumila, heyo yuyo Eliya yondayeze.

¹⁵ Mwene magutwi nayahulike!

¹⁶ Noulinganiza na choni mlelo uno? Ulingana na wana wokala hagulilo, wowakema wayawo wolonga:

¹⁷ Tumtowelani vifyengwe bali hamvinile; twiyalala bali hamulilile!

¹⁸ Kwa mzoko Yohana keza, hadile wala hangʼwile ugimbi, wamulonga, Kana mizuka.

¹⁹ Mwanage Munhu keza, yoja, yongʼwa ugimbi, na hewo womulonga, Mja vihile yuno, kabili mngʼwa ugimbi, mbwiga wawo wawila kodi na wene matozo. Na nghungwe ya Mulungu yohuma mkitala yogamba mzihoko kwa sanghano zake!”

Kuwakomhokela watatali

²⁰ Baho yandusile kuikomhokela imiwambo ija ikalile itendigwa malolomboto gake bwando, kilumbo haigaluke.

²¹ “Leka kojona, gweye Korazini! leka kojona Betisaida! Kilumbo vilolomboto vija visanghanilwe kumwako, maza kamba visanghanwe muiisi ya Tiro na Sidoni, wahagaluke mwaka na kuvala magunia na kubakala mitozi!

²² Bali heyo nomulongelani, vokuwa vibuhile Tiro na Sidoni kwazaganya usungu wawo disiku ja ukutaguswa kubita mweye.

²³ Nagwe Kapernaumu kokitopa kamba ‘kukwenezwa mpaka kuulanga; kohumuluswa mpaka kuzimu.ʼ Kilumbo vilolomboto vija visanghanilwe kumwako maza kamba visanghanwe muiisi ya Sodomu, dihakalile baho wambo hijo na lelo!

²⁴ Bali heyo nomulongelani, vokuwa vibuhile isi ya Sodomu kwazaganya usungu wake disiku ja ukutaguswa kubita gweye.”

Kuhumuza wene mitwalo

²⁵ Kikomo kikija Yesu kedika kalonga, “Nokutuniza Tata, Mndewa wa Ulanga na isi, kilumbo manzonza gano kuwafisa wene fiyuko na ngelegeza, kuwagubulila ivinghele.

²⁶ Ona Tata, vivo vikunogele gwegwe.

²⁷ Vyose ngwelelwa na Tata wangu, avo haduhu yamtangile Mwana bali Tata, kabili haduhu yamtangile Tata bali Mwana, na yoyose yondayamnogele Imwana kumgubulila.

²⁸ Izoni kumwangu amweye mose mgaya, na wene kupotwa na mizigo, na niye nomuhumuzani.

²⁹ Soleni kwangwazi jangu, mwilangulize kumwangu, kilumbo niye mhola na moyo wangu uhola, na mweye mopata mhumulo mmiyoyo mmwenu.

³⁰ Kilumbo kwangwazi jangu dilegela, na mtwalo wangu ubuha.”