Mateo 1 - Lagano da Isambi

Lukolo lwa Yesu

¹ Kitabu cha lukolo lwa Yesu Kristo, mwanage Daudi, mwanage Abrahamu.

² Abrahamu kamulela Isaka, Isaka kamulela Yakobo, Yakobo kamulela Yuda na wandugu zake,

³ Yuda kamulela Perese na Zera kumwake Tamari, Perese kamulela Esromu, Esromu kamulela Aramu,

⁴ Aramu kamulela Aminadabu, Aminadabu kamulela Nashoni, Nashoni kamulela Salmoni,

⁵ Salmoni kamulela Boazi kumwake Rahabu, Boazi kamulela Obedi kumwake Ruti, Obedi kamulela Yese,

⁶ Yese kamulela Mndewa Daudi. Daudi kamulela Solomoni kwa ija sano jake Uria,

⁷ Solomoni kamulela Rehoboamu, Rehoboamu kamulela Abiya, Abiya kamulela Asa,

⁸ Asa kamulela Yehoshafati, Yehoshafati kamulela Yoramu, Yoramu kamulela Uzia,

⁹ Uzia kamulela Yotamu, Yotamu kamulela Ahazi, Ahazi kamulela Hezekia,

¹⁰ Hezekia kamulela Manase, Manase kamulela Amoni, Amoni kamulela Yosia,

¹¹ Yosia kamulela Yekonia na wandugu zake kikomo cha kuhamizwa Babeli.

¹² Lulawile kuhamizwa Babeli, Yekonia kamulela Shealtieli, Shealtieli kamulela Zerubabeli,

¹³ Zerubabeli kamulela Abihudi, Abihudi kamulela Eliakimu, Eliakimu kamulela Azori,

¹⁴ Azori kamulela Sadoki, Sadoki kamulela Akimu, Akimu kamulela Eliudi,

¹⁵ Eliudi kamulela Eleazari, Eleazari kamulela Matani, Matani kamulela Yakobo,

¹⁶ Yakobo kamulela Yosefu mbigalo wake Maria yamulelile Yesu yokemigwa Kristo.

¹⁷ Basi kulawa Abrahamu kuvikila Daudi, ngholo ziduganya longo dimwe na ne, kulawa Daudi kuvikila kuhamizwa Babeli ngholo ziduganya longo dimwe na ne, kulawa kuhamizwa Babeli kumvikila Kristo ngholo ziduganya longo dimwe na ne.

Kuleligwa kwa Yesu

¹⁸ Kuleligwa kwake Yesu Kristo kukala vino. Maria mamaake viyakalile yasoligwe na Yosefu, kikomo hawanakwitinghanila koneka yali na inda kwa mhiko za Loho Yangʼalile.

¹⁹ Aheyo Yosefu mchumba wake viyali munhu wa ihoko, halondile kumgela kinyala, kagelegeza kumuleka kinyele.

²⁰ Viyakalile yogelegeza higo, lola malaika wa Mulungu kamulawila muna zinzozi yolonga, “Yosefu, mwana wa Daudi, sukuudumbe kumsola Maria sano jako, kilumbo inda yake iza na mhiko za Loho Yangʼalile.

²¹ Na heyo kolela mwana, na gweye komkema tagwa jake Yesu, kilumbo heyo yuyo Yondayawahonye wanhu wake mmatozo gao.”

²² Higo gose gagalamuka giladi divikizwe longa dija dilongigwe na Mulungu muusenga wa Mtulandagu yolonga:

²³ “Lola mhambe kosola inda, kolela mwana, na hewo womkema twaga jake Imanueli” (kihindukizo chake, Mulungu kahamonga na tweye).

²⁴ Yosefu viyalamuke muutulo kasanghana kamba malaika wa Bwana viyamulagize, kamsola sano jake.

²⁵ Bali hamtangile mpaka viyamulelile mwanage; kamkema twaga jake Yesu.