Marko 9 - Lagano da Isambi

Yesu kagaluswa lukuli kudigongo

¹ Kawalongela, “Ihoko nomulongelani, bahano hana wanhu wemile, na hewo honda wailanze ifa ngʼo, kikomo vonda wawone undewa wa Mulungu uhamala kwiza na mhiko.”

² Vizibitile siku sita, Yesu kamsola Petro, Yakobo na Yohana, kakwela hamonga nawo kudigongo tali waliyeka hakifiso.

³ Kagaluka lukuli lwake hameso gawo; zija nguwo zake zikala nzelu nghani, zomelemeta, haduhu galu muisi yonda yadahe kuzisunha zingʼale kamba vija.

⁴ Walawilwa na Eliya hamonga na Mose, wakala walongelela na Yesu.

⁵ Petro kananula mulomo, kamulongela Yesu, “Mkulufunzi, hano hanoga kukala tweye; na tuzenge vibanda vidatu, kimonga chako, kimonga cha Mose, na kimonga cha Eliya.”

⁶ Na heyo hamanyile diyalongile, kilumbo wengilwa na kingwaya kikulu.

⁷ Imalabaho hakala na wingu, diwagela kiziza, na dizwi dilawa muna diwingu dilonga, “Yuno yuyo Mwanangu inogele, mtegelezeni yuyo!”

⁸ Mhunde vuwalolile kuno na kuno, hawawene munhu komu Yesu yaiyeka hamonga na hewo. Eliya kamala koneka

⁹ Vuwakalile wohulumuka kudigongo, kawagomesa sukuwampetele munhu wowose gawawene, komu aho Mwana wa Munhu vondayamale kuzuswa kulawa kwa wafile.

¹⁰ Wadigoga longa dino na kwiuzagiza wawo kwa wawo, “Ako kuzuswa kulawa kwa wafile, mzoko wake choni?”

¹¹ Wamuuza walonga, “Wana Nzuma wolongaze, imwandama Eliya yalongole kwiza tanhu?”

¹² Kawalongela, “Wona, Eliya kolongola kwiza yavihindule vyose viwe vya sambi; komu Mwana wa Munhu kandikilwaze, kamba yagaduswe nghani na kulemwa?

¹³ Avo nomulongelani, Eliya keza kamala, na hewo wamsanghanila gose gawatendile, kamba viyandikilwe.”

Mmhale yavagalwe

¹⁴ Vuwezile kwa iwanahina, wajona dale da wanhu bwando diwabiduke; na hewo Wananzuma wakala baho, wokibamilila nawo.

¹⁵ Mhunde dale jose vidimonile, wasinhuka, wamgendelela mbwisa, wamulamusa.

¹⁶ Kawauza, “Mokibamilila choni?”

¹⁷ Imonga wa waja iwanhu kamwidika, “Mkulufunzi, nimgala mwanangu kumwako, kana mzuka wa bubuwi.

¹⁸ Na kamba uhamgoga, womkunhizakunhiza kwa mhiko, na heyo kolava hovu na kugegeda meno, imala lukuli lwake lonyala; na niye niwapembela wanahina wako wauwinge uno mzuka, komu hawadahile.”

¹⁹ Yesu kawedika, “Mweye wa ulelwa ulekile kumgoga Mulungu! Nokala hamonga na mweye vino na kwahi? Niwazaganye vino na kwahi? Mgaleni hano hanili!”

²⁰ Wamgala hamwake. Na heyo viyamonile, mhunde umzuka umvagala, umbwanha hasi, kagalagala yolawa hovu.

²¹ Yesu kamuuza itata wa ija mmhale, “Hivo kasonga zuwaki?” Kalonga, “Kulawa unghele wake.

²² Miyanza bwando umbwanha hamoto hebu mmazi, giladi umkome; komu uhadaha kinhu, tutaze utonele bazi!”

²³ Yesu kamulongela, “Uhadaha kunhamanila; gose godahika kumwake yonhamanila.”

²⁴ Mhunde baho tata wa ija immhale kalila kuno yolonga, “Notamanila, unhaze niye nili bule nhamanilo!”

²⁵ Yesu viyawene wanhu bwando vuwommemela chambwisa, kaukomhokela uja umzuka imchapalisi, kaulongela, “Gweye mzuka wa bubuwi na kihuli, nokulagiza umulawe yuno, sukuumwingile kabili!”

²⁶ Baho yagutile, umkenhezakenheza kwa mhiko, umulawa; na heyo koneka kamba kafa, avo wanhu bwando walonga, “Kadanganika.”

²⁷ Komu Yesu kamgoga mkono, kamnyagamula; baho kema wima.

²⁸ Yesu viyengile mngʼanda, wanahina wake wamuuza vu-wakalile waliyeka, “Habali tweye hatudahile kuwinga mzuka uja?”

²⁹ Kawalongela, “Mizuka igambile uja haidahika kulavigwa komu kwa mhiko za kupula na kuleka kuja.”

Migazo ya Kristo, langulizo lwekabili

³⁰ Wahalawa haja, watembela mgatigati ya Galilea.

³¹ Na heyo halondile munhu yavimanye kakwahi; kilumbo kakala yowalangukiza wanahina, kawalongela, “Mwana wa Munhu kogeligwa mmakono ga iwanhu, na hewo womkoma; komu yahamala kukomigwa, zihabita siku ndatu kozuka.”

³² Na hewo hawadimanyile longa dino, kabili wadumba kumuuza.

Kuwinza ukulu

³³ Vuwavikile Kapernaumu na kwingila mngʼanda, kawauza, “Mnzila mkala mkibamilila choni?”

³⁴ Wanyamala, kwa mzoko wakala wokibamilila mnzila wawo kwa wawo, kamba yalihi yondayawe mkulu?

³⁵ Kakala hasi, kawakema waja umulongo umwe na wabili, kawalongela, “Munhu yahalonda yawe kilanja, vigamba yaibweze kuchugu kwa wayage wose, yawasanghanile.”

³⁶ Imalabaho kasola chana, kakimiza wima hagatigati yawo, kamfagatila, kawalongela,

³⁷ “Munhu yonda yambokele chana kimonga kigambile kamba kino kwa kilumbo changu, avo kambokela niye; na munhu yahambokela niye, hambokele niye bule, kambokela Yuja Yangalile.”

Kugomesa munhu lilingwa

³⁸ Baho Yohana kamulongela, “Mkulufunzi, tumona munhu yowinga mizuka kwa twaga jako, komu hailongoza na tweye, na tweye tumgomesa, kilumbo haikoleleza na tweye.”

³⁹ Yesu kalonga, “Sukumumgomese, kilumbo haduhu mwene kutenda mhiko kwa twaga jangu, imala mhunde yadahe kunilonga gehile.

⁴⁰ Kilumbo munhu yalekile kwihasanya na tweye, kaiduganya na tweye.

⁴¹ Na munhu yonda yamngʼwezeni mweye kikata cha mazi kilumbo mwa wanahina, ihoko nomulongelani, kitumetume chake honda chage ngʼo.

⁴² Bali munhu yonda yamuhonze imonga wa wano iwadodo wonhamanila, vokuwa goya nghani yahabasikwa muugosi dibwe kulu da kusagila, imalabaho yakutuligwe mbahali.

⁴³ Kamba mkono wako uhakuhonza, uukanhe; kilumbo vonoga kumwako kwingila hali uugima, kuno ulemale, sembuse uhawa na mikono mibili, kwiza wingile hali umoto hauvuvuwalaga.

⁴⁵ Na mgulu wako uhakuhonza, ukanhe, kilumbo vonoga kumwako kwingila hali ugima uli bulugwa, sembuse uhawa na migulu mibili, kwiza wasigwe mkolongo da umoto.

⁴⁶ Aho mngʼonyo mwene kulumiza hafaga, kabili aho umoto hauvuvuwalaga.

⁴⁷ Na siso jako dihakuhonza, dingʼole ujase kutali, kilumbo vonoga kumwako kwingila muundewa wa Mulungu mwene gele, sembuse uhawa na meso gako mabili, kwiza wasigwe mkolongo da umoto.

⁴⁸ Aho mngʼonyo mwene kulumiza hafaga, kabili aho umoto hauvuvuwalaga.

⁴⁹ Kilumbo mkele wa kumkolela munhu wowose (kamba nhosa) uwo umoto.

⁵⁰ Mkele unoga; komu mkele uhawa bule ukolelo, chogeligwa choni, kileka ukolele? Muwe na mkele mmiyoyo yenu; mwange sesa, mkale na tindiwalo!”