Marko 6 - Lagano da Isambi

Yesu kavika ukaye Nazareti

¹ Kakulawa kuja, Kavika kumwawo Nazareti kwiyakulile, na wanahina wake wamkoleleza.

² Viivikile siku ja ukuhumula, kandusa kulangukiza mngʼanda yawo ya nhambiko; bwando wamuhulika, wakanganya walonga, “Yuno kagapata kwahi gano; ubala uno wa nghungwe kagwelelwa na yalihi; na zino mhiko zisanghanwa na mikono yake zolawa kwahi?

³ Yuno si msongola mibiki, mwanage Maria, si ndugu yawo waja kina Yakobo, Yosefu, Yuda na Simoni? Na walumbu zake hawali kukuno kumwetu?” Weihilwa kumwake.

⁴ Yesu kawalongela, “Mulaguzi habezigwa haulilingwa, komu hamwake hayakulile, na kwa ndugu zake na mngʼanda yake.”

⁵ Avo kalemelwa kutenda kiloto cha mhiko hata kimwe, komu walunyondenyonde wayagwe kawekila mikono, kawahonya.

⁶ Kanyululuka mmoyo kilumbo vija vuwalekile kumtamanila.

Lwamu lwa watumigwa

⁷ Imalabaho kavizungulukila viwambo vya mmambwegambwega, kawalangukiza; kawakema waja umulongo umwe na wabili, kasonga kuwatuma wabili wabili, kawengha mhiko za kuwinga mizuka michapalisi.

⁸ Kawalagiza wagoge fimbo iyeka, sukuwasole chakuja cha mnzila hebu mkoba, hebu mhiya mumkwizi.

⁹ Choleni mvalile vilatu, komu sukumvale nguwo mbili!

¹⁰ Kawalongela, Vonda mwingile mngʼanda, kaleni himo, kikomo vonda mlawe kabili.

¹¹ Na kamba hawambokeleni hebu kuwategeleza, halaweni iho, na kukungʼunha timbwisi dinanahile mmagulu genu, dize dinisindile kumwao!

¹² Baho walawa, wagenda na kubwililisa Usenga, wanhu waipupule; waiwinga mizuka bwando.

¹³ Wabakaza mavuta bwando waja wadodile, wawahonya.

Yohana Msingula wanhu viyakemigwe

¹⁴ Mndewa Herode kagahulika, kwa mzoko twaga jake didinhila, wanhu vuwolonga, “Yohana Msingula wanhu kazuka muna ikifo, avo mhiko hizo zizo yosanghanila yuno.”

¹⁵ Wayagwe walonga, “Yuyo Eliya.” Kabili wayagwe walonga, “Yuyo Mlaguzi miyawo wa umwaka.”

¹⁶ Komu Herode viyagahulike kalonga, “Yuyo Yohana, inghanhile iditwi, kwali kazuka.”

¹⁷ Kilumbo Herode mwenyecho kawatuma wanhu wamgoge Yohana na kumgela mkifungo, kwa kilumbo cha Herodiya, sano ja ndugu yake Filipo yuja yambokile.

¹⁸ Kwa mzoko Yohana kamulongela Herode, “Havilingane gweye kusola sano ja ndugu yako!”

¹⁹ Avo Herodiya kakala yogelegeza nzila ya kumkoma, komu hadahile.

²⁰ Kilumbo Herode kamdumba Yohana kwa vija viyamtangile kamba munhu wa ihoko yangʼalile, kamwika goya; na heyo viyamuhulike baho kwa baho, kahila nago nghani mmoyo, kabili kanogelwa na kumtegeleza.

²¹ Sikunghulu ya kuleligwa Herode viivikile, iyo siku ya ulegeho; kawagomela chakuja watawala wa iviwambo vyake, wakulugenzi wa asikali na iwakuluwakulu wa Galilea.

²² Na biti Herodiya kengila, kavina ngoma, kamnogeza Herode na waja wakalile hamonga na heyo haichakuja; baho Mtawala kamulongela yuja mmhale, Nipule kinhu kiulonda, nokwingha;

²³ imalabaho kaiduwila, Chochose chonda umhule nokwingha, na igambe nusu ya undewa wangu.

²⁴ Yuja mmhale kachola kamuuza mamo wake, “Hampule choni?” Na heyo kamulongela, “Ditwi ja Yohana Msingula wanhu.”

²⁵ Mhunde baho kengila chambwisa kwa Mtawala, kampula yolonga, “Nolonda uninghe muna ulungo sambisambi ditwi ja Yohana Msingula wanhu!”

²⁶ Mtawala kanyunguwala nghani, komu kwa vija viyaiduwile na kilumbo cha waja wakalile hali ichakuja halondile kumwima.

²⁷ Baho Herode kamtuma asikali kamulagiza yagale dija iditwi jake Yohana. Yuja kachola, kadikanha ditwi ja Yohana muja mkifungo,

²⁸ imala kadigala muna ulungo, kamwingha immhale; na heyo immhale kamwingha mamo wake.

²⁹ Wanahina wake vuwagahulike, weza wausola umtufi, wauzika mkabuli.

Wanahina wahumule, wataze nghondolo wali bule mchunga; Kuwegusa wanhu elfu nhano

³⁰ Waja watumigwe na Yesu wabwela weilundiza kumwake, wampetela magweka gose gawasanghane na gawalangukize.

³¹ Kawalongela, “Izoni mwiyeka, tuchole hanhu ha kifiso, muhumule hadodo. Kilumbo wanhu bwando wakala wokwiza kuno wochola, avo walemelwa na ukuja.”

³² Wahalawa, wengila mngalawa waiyeka, wavika kuluwala.

³³ Wanhu vuwawawene, wolawa, na bwando wavitanga, wawakoleleza kukuja kwa migulu, kulawa mviwambo vyose, walongola kuvika.

³⁴ Viyalawile mngalawa, kawona wanhu bwando nghani, kawonela bazi, kilumbo wagalamuka kamba nghondolo wali bule mchunga, kasonga kuwalanguliza bwando.

³⁵ Viivikile ichungulo, wanahina wake weza wamulongela, “Hano hatuli twa haluwala, na ichungulo ingila.

³⁶ Wapoze wanhu wagende na zawo mmigunda na mviwambo ako mmambwegambwega, wakagule mandiya.”

³⁷ Heyo kedika yowalongela, “Wengheni mweye mandiya!” Wamulongela, “Che, tugende tukagule migate ya dinari mizo mibili, tuwenghe waje?”

³⁸ Kawauza, “Muna migate mingahi? Gendeni mkalole.” Vuwaimanyile walonga, “Mitano, na visomba vibili.”

³⁹ Kawalagiza wose wakale hasi vidonzi vidonzi muna imilolo.

⁴⁰ Wakala vidonzi kwa vidonzi, hayagwe muzo na hayagwe milongo mitano.

⁴¹ Kaisola ija imigate mitano na vija visomba vibili, kalola uchana kuulanga, kavilombokezela na kuwamegelamegela ija migate; kawengha wanahina wawagolela, na vija ivisomba vibili vivija kawagwelela wose.

⁴² Awaja wose waja, weiguta.

⁴³ Imala wadondoleza upakapaka wa migate usigale, wamemeza vigelo mulongo umwe na vibili, hamonga na upakapaka wa iwasomba.

⁴⁴ Na waja wadile imigate wavika kichinyha elfu tano, wambigalo yeka.

Yesu kachola uchana mmazi

⁴⁵ Mhunde baho kawananahiza wanahina wake wengile mngalawa, walongole wachole mwambu wa Betsaida, na heyo tanhu yadipoze dale da wanhu.

⁴⁶ Viyamalile kuwapoza, kahalawa kagenda kudigongo kumpula Tata wake.

⁴⁷ Zuwa vidiswele, ngalawa ivika hagatigati ya bahali, na heyo mwenyecho kema yaiyeka muufuko.

⁴⁸ Kawona vuwogaduka, hawadaha kugendelela, kilumbo beho diwakimila kuulongozi; vikivikile kimilo chaikane cha ikilo, kawezila yochola uchana kwa uchana mbahali, kalonda kuwabita.

⁴⁹ Na hewo vuwamuwene viyochola uchana mmazi, wagiza zezeta, watowa nyangi.

⁵⁰ Kilumbo wose wamona, wagudema. Mhunde baho kalonga nawo yowalongela, “Gangamaleni, nene hiyo, siku-mdumbe!”

⁵¹ Na viyengile mngalawa, beho dinyamala; wabanza kusinhuka na kukangawala nghani.

⁵² Kilumbo wabule lutondo lwa ija imigate, na miyoyo yawo ikala midala.

Kugela kizimbiza Genezareti

⁵³ Vuwamalile kuloka wavika isi ya Genezareti, aho wagela kizimbiza.

⁵⁴ Na hewo vuwalawile mngalawa, mhunde baho wanhu wamtanga.

⁵⁵ Wachola mbwisa wabiduka iisi yose, wasonga kuwasola watamu mzisazi, wawagale kose kwawamuhulike kamba kakuko.

⁵⁶ Na muja moyokwingila mzikaye, mvibuga hebu mmigunda, wawagala watamu hagulilo, kuno wompembela, wamkwase umusa wa nghanju yake iyeka; na waja wose waikwasile wahona.