Marko 4 - Lagano da Isambi

Hanhu hane hahandigwe

¹ Kasonga kabili kulangukiza mumngwazo wa ibahali; dale da wanhu bwando wammemela, kengila mngalawa kakala, na wanhu wose wakala muufuko behi na igamazi.

² Kuwalangukiza kuno yolava mizungu bwando, kawalongela muna gamalangukizo gake,

³ “Tegelezeni, lola muhanda mbeyu kalawa kugenda kumiza mbeyu.

⁴ Viyakalile yomiza, ziyagwe zigwila mnzila, ndege weza wazija.

⁵ Ziyagwe zigwila mmabwe, hali bule ludongo bwando; kota zimana kota mbwisa, kilumbo luja uludongo ludodo.

⁶ Komu zuwa vidilawile nghani, zinyala kwa mzoko zabule mizizi.

⁷ Ziyagwe zigwila hana imizomola; aija imizomola viyotile izifinga, hazilelile.

⁸ Ziyagwe zigwila haludongo lunogile, zikungʼunha zikula zilela nghani na kulava nzele kamba milongo midatu, milongo sita zivika muzo.”

⁹ Kalonga, “Mwene magwiti gakuhulika, nayahulike!”

¹⁰ Viyakalile yaliyeka, wanahina zake hamonga na waja umulongo umwe na wabili wamuuza mzoko wa hala dijo.

¹¹ Kawalongela, “Mweye mgwelelwa kutambula nyongʼonyo ya Undewa wa Mulungu, bali waja wali kunze wolongelwa gano gose kwa mizungu.

¹² Giladi wabunhule bali hawalola; wategeleze nghani, bali hawatanga mzoko; sukuweze kumhindukila, niwasegezele matozo gawo.”

¹³ Kawalongela, “Kamba hamditangile hala dino, mogatangaze mahala gose?

¹⁴ Mwene kumiza komiza Usenga Unogile.

¹⁵ Komu zija zili mnzila iwo wawo wadihulike, Longa vidikutulwe kumwawo, imalabaho Satani kokwiza, kodisegeza Longa dikutulwe mmwawo.

¹⁶ Avo vivo zija zimizigwe hana gamabwe, iwo wawo wadihulike Longa, wadibokela mbwisa na ndenghelelo.

¹⁷ Komu wabule ngogelo mmiyoyo, wodigoga kipigiti kidodo; kamba uhalawilila mgaduko hebu msawato kilumbo cha dilonga, mhunde wokikwala.

¹⁸ Azija ziyagwe zigwile mmizomola iwo wadihulike Longa,

¹⁹ komu mzahizahi wa ulumwengu uno, na uzenzeleganye wa igamali na dongho ziyagwe ziwengila, zofinga dija dilonga, hadilela mujo.

²⁰ Azija zigwile hana uludongo unogile iwo wawo wadihulike Longa na kudibokela, wolela mujo kamba milongo milongo midatu, milongo sita kuvika miyanza muzo.”

Mzungu wa Taa na ningo

²¹ Kawalongela, “Haduhu taa igaligwa kuno ikigwe mkigelo hebu muluvungu lwa ulusazi; nyagiza ikagwa hachana hamulango!

²² Kilumbo kuduhu difisigwe kwiza aho hamwande dileke koneka, hebu haduhu mzengwe uleke kulawilila chalinze.

²³ Munhu yahawa na magwiti gakuhulika, nayahulike!”

²⁴ Kawalongela, “Teganyeni vija vumuhulika! iningo imulingila wayagwe, iyo yonda mulingilwe namweye, kabili mokongezelwa.

²⁵ Kilumbo mwene mali kogwelelwa, komu yali bule kinhu kobokigwa na kija chayali nacho.”

Mbeyu zokota zenyego

²⁶ Kalonga, “Undewa wa Mulungu ugalamka kamba munhu yomiza mbeyu mumgunda.

²⁷ Imala kowasa na kulamuka ikilo na imisi, azija zimbeyu zokota na kunyusuka.

²⁸ Mwenyecho havitanga, aluja uludongo lolela lwenyego; zosonga kukungʼunha, imalabaho kungwi, imalabaho muhunga womema muna dikungwi.

²⁹ Komu zinzele zihahela, mwenyecho mhunde kogala wene sengo, kilumbo mahuno gavika.” Kibeyu cha haradali

³⁰ Kalonga, “Undewa wa Mulungu tuugambe na kilihi; hebu tuupete na mzungu ulihi?

³¹ Wigamba na kibeyu cha haradali, kihandigwe mumgunda, icho kidodo kubanza mbeyu zose zili muno muisi.

³² Kihamala kuhandwa, chokula choselela kubanza miboga yose kwa kuzuka mitambi mikulu, hata ndege wa uchana wokwiza kuhumula mmbeho yake.”

³³ Kawalongela Longa dija kwa mizungu bwando igambile uno, kamba vuwatangile nzewele zawo; kabili hawalongele mbuli ili bule mizungu.

³⁴ Komu wanahina wake kawatobolela gose, vuwakalile waliyeka.

Nyukwanyukwa ya mbahali

³⁵ Viivikile ichungulo siku iija kawalongela, “Tuloke tuchole umwambu wa ikabili.”

³⁶ Wadileka didale ja wanhu, wamsola vivo viyakalile mngalawa, na ngalawa ziyagwe zikala hamonga.

³⁷ Kukala na nyukwanyukwa kulu da beho; mimazi ikenhakenha ingalawa, kuno ngalawa isonga kumema mazi.

³⁸ Na heyo kakala mngalawa kuchugu, kawasa utulo mmsegamo; mhunde wamulamusa womulongela, “Mkulufunzi, hona usungu vutulonda kudidimila?”

³⁹ Kenuka kadikomhokela dibeho, na kuilongela bahali, “Vudala wituze!” Mhunde baho dibeho dinyamala, kukala pozii.

⁴⁰ Imala kawalongela, “Habali mdumba hivo? Habali hamnhamanila?”

⁴¹ Wengililwa na bwembwe kulu, waiuzagiza wenyego kwa wenyego, “Yuno munhu wa vilihi, beho na bahali vizomdu-mba?”