Marko 16 - Lagano da Isambi

Yesu viyazukile Pasaka

¹ Siku ya ukuhumula viimalile, baho Maria Magdalena na Maria mamo wa Yakobo, na Salome wagula mavuta ganogile, giladi waubake mtufi wa Yesu.

² Siku ilongole ya juma imitondo nghani waidamuka, wachola kuna dikabuli, zuwa hadinasomoza.

³ Walonga wawo kwa wawo, “Yalihi yonda yadibimbilise dija idibwe kulawa hali umulango wa idikabuli?”

⁴ Vuwalolile wajona dibwe dimala kubimbiliswa; najo dikala kulu nghani.

⁵ Vuwengile muna dikabuli, wamona mmhale yakalile haukulume, yavalile nguwo nzelu; wengilwa na kidumbo.

⁶ Na heyo kawalongela, “Sukumdumbe; momzahila Yesu wa Nazareti yawambigwe mdibiki; kazuswa, kamduhu muno; haloleni ihanhu hayatambalikwe!

⁷ Komu gendeni mkawalongele wanahina wake na Petro, kamba kowalongolela mweye kuchola Galilea; ako kuko konda mmone, kamba viyawalongele.”

⁸ Wahalawa hali dikabuli wakimbila, kilumbo wagogigwa na kingwaya na mkanganyo; kileka hawamulongele munhu mbuli, kilumbo wadumba.

Yesu kawalawilila wanahina

⁹ Yesu viyamalile kuzuka imitondo nghani, siku ilongole ya ijuma, kasonga kumulawila Maria Magdalena yuja iya-mulavile mizuka saba.

¹⁰ Heyo kachola kawasimulila waja wayagwe wakalile hamonga na heyo, na hewo waiyalala nghani walila.

¹¹ Komu vuwahulike kamba Yesu mpile na kamba Maria kamona, hawatogole.

¹² Imalabaho kawalawilila wayawo wabili wotembela kuchola kumgunda, kuno yagaluke lukuli.

¹³ Na hewo wachola kuwasimulila wayawo wayagwe, komu na hewo hawawatogole.

¹⁴ Ikimambukizo kawalawila waja umulongo umwe na imwe, vuwakalile mngʼanda woja, kawakomhokela kilumbo walemelwa kumtamanila, na kwa mzoko wa ugaga wa miyoyo yawo, vuwalekile kuwatogola waja wamonile kamba heyo kazuka.

¹⁵ Kawalagiza yolonga, “Gendeni muisi zose za ulumwengu, muwabwililisile wose waumbigwe Usenga Unogile!

¹⁶ Mwene kumtamanila Mulungu yahabatizwa, kohona; komu yolema kumtamanila kwiza kotaguswa.

¹⁷ Na hewo womtamanila, vilolomboto vonda viwawinze ivo vino, Mditwaga jangu woiwinga mizuka, wolonga ulonzi wa isambi.

¹⁸ Wahagoga nyoka hebu kungʼwa uhawi, honda uwakome ngʼo; wahawagelekela watamu makono, baho wohona.”

Yesu kakwela kuulanga

¹⁹ Mndewa Yesu viyamalile kulonga nawo, kasoligwa uchana, kawela kuulanga, kakala ukulume kwa Mulungu.

²⁰ Imala waja walawa, wapeta Usenga Unogile hanhu hose, na heyo Mndewa kasanghana hamonga na hewo, kadigela Longa jake mhiko za vilolomboto ziiduganye na dija Dilonga.