Marko 15 - Lagano da Isambi

Yesu ha ikitala cha Pilato

¹ Vuuchele imitondo, Watambika Wakulu weka zundo hamonga na Wavyele na Wananzuma na uluhengo lose lwa nhaguso; wamdaza Yesu, wamgala kwa Pilato.

² Pilato kamuuza, “Gweye gwegwe mndewa wa Wayuda?” Yesu kamwidika kalonga, “Ona vivo vuulonga.”

³ Na Watambika Wakulu wamkengemeka nghani.

⁴ Baho Pilato kamuuza kabili, “Hwidika mbuli? Tegeleza gose gowokukengemeka!”

⁵ Bali Yesu halongile mbuli, avo Pilato kakangawala.

⁶ Na kwa kizowe cha sikunghulu kawafungulilaga mfungigwa yumwe iwolonda.

⁷ Kukala munhu twaga jake Baraba, kafungigwa hamonga na wanhu wene kwinula nghondo ya kukoma wanhu.

⁸ Avo wanhu bwando wachola hakitala wolonda, Pilato yawatendele kamba viyazowele.

⁹ Na heyo kawedika kalonga, “Molonda niwafungulile mndewa wa Wayuda?”

¹⁰ Kilumbo kavimanya kamba Watambika Wakulu wamulava kwa kumonela migongo.

¹¹ Komu Watambika Wakulu wadiswagiza dale ja wanhu, giladi yawafungulile Baraba.

¹² Pilato kedika kabili kawalongela, “Avo nimtendeze yuno imkemaga mndewa wa Wayuda?”

¹³ Watowa nyangi, kuno wolonga, “Muwambe mbiki!”

¹⁴ Pilato kawauza, “Wiho ulihi uyatendile?” Wabasiliza nyangi nghani wolonga, “Muwambe mdibiki!”

¹⁵ Pilato kalonda kuwanogeza wanhu, yomana kuwafungulila Baraba; komu Yesu kamulava, yatowigwe vibongho, imala yawambigwe mumsalaba.

Sanzagala da misonga

¹⁶ Na ija minjolinjoli imgala, imwingiza kunzingo ya idiboma, wadikema dale jose ja iminjolinjoli weilundize.

¹⁷ Wamvaza nguwo ndunghu, waluka sanzagala da misonga, wamvaza mditwi.

¹⁸ Wandusa kumulamusa, “Hongelaga Mndewa wa Wayuda!”

¹⁹ Imala wamsuna mditwi na mulanzi, wamtemela mizite, wamfugamila mavindi kuno womgwila.

²⁰ Vuwamalile kumfyosa, wamvula ija inguwo indunghu na kumvaza nguwo zake; wamgala kunze giladi wamuwambe mumsalaba.

Yesu kawambwa mdibiki hiko Golgota; Yesu viyadanganike

²¹ Wamgoga munhu yobita kulawa kumgunda, yuyo Simoni wa Kirene, iyo tata wawo Aleksandro na Rufo; wamdodoheza yamgalile biki jake.

²² Wamgala hanhu hakemagwa Golgota, kihindukizo chake, Zege da Pala.

²³ Wamwingha ugimbi uhanganywe na mahoka, bali heyo hangʼwele.

²⁴ Vuwamalile kumuwamba mdibiki, wazigola nguwo zake, wazitendela kibafuti, chondayasole kula munhu.

²⁵ Ikala saa ndatu vuwamuwambile mdibiki.

²⁶ Hachana hake hakala na jandiko ja nhaguso yake digamba, “Yuno yuyo Mndewa wa Wayu da.”

²⁷ Na mibazazi mibili wawambigwa hamonga na heyo, imonga ukulume na imonga ukumoso.

²⁸ Baho divikizwe dija dilonga, “Kapetigwa kamba miyawo waja iwabananzi.”

²⁹ Na wenekubita nzila wamuliga, kuno wotigisa matwi gawo wolonga, “Gweye mwene kuditula dingʼanda da Mulungu na kudizenga viyagwe kwa siku ndatu!

³⁰ Iihonye mwenyecho, uhulumuke mbiki!”

³¹ Vivo na waja Watambika Wakulu wamfyosa hamonga na Wananzuma, wolonga, “Wayagwe kawahonya, bali mwenyecho hadaha kwihonya.

³² Yuno yahawa Kristo mndewa wa Israeli, nayahulumuke sambi baha mumsalaba, tumone giladi tumtamanile!” Na waja wawambigwe mmibiki hamonga na heyo, wamuliga.

³³ Viivikile saa sita, hakala na ziza kulu muisi yose kuvikila saa kenda.

³⁴ Na saa kenda Yesu kalava nyangi yolonga, “Eloi, Eloi, lama sabaktani,” kihindukizo chake, “Mulungu wangu, Mulungu wangu, vilihi vuunyasa?”

³⁵ Wayagwe wemile iho vuwagahulike, walonga, “Tegelezeni, komkema Elia!”

³⁶ Imonga wawo kakimbila mbwisa, kachufika mwani msiki, kaunanika hasota ya mulanzi, kamwinghiza kalonga, “Lekeni tulole kamba Elia kokwiza kumuhulumusa!”

³⁷ Imala Yesu kalava dizwi kulu, na mhumuzi imulawa.

³⁸ Baho guwo kulu ja hekalu didegeka kulawa uchana kuvika hasi, nyenza mbili.

³⁹ Komu yuja mkulu wa minjolinjoli yemile ula kwa ula bahaja, viyawene mhumuzi viimulawile vija, kalonga, “Baye nhogola, munhu yuno kakala Mwana wa Mulungu.”

⁴⁰ Hakala baho watwanzi, wemile kutali wolola; mmwanza wawo yuyo Maria Magdalena, Salome na Maria iyagwe, mama wawo Yakobo Mdodo na Yose.

⁴¹ Iwo wawo wamkoleleze, wakala womsanghanila viyakalile hiko Galilea; na watwanzi wayagwe bwando, wanenu hamonga na heyo kuchola Yerusalemu.

Yesu viyazikigwe

⁴² Viivikile ichungulo siku hiyo, wakala okisasala kilumbo cha sikunghulu.

⁴³ Keza Yosefu wa Arimatia yakalile imonga wa uluhengo wa nhaguso, na heyo mwenyecho kakala youbeta undewa wa Mulungu; kaitopa mmoyo, kamgendela Pilato, kampula yagolelwe mtufi wa Yesu.

⁴⁴ Pilato kakanganya viyahulike kamba kaziga kudanganika; kamkema imkulu wa minjolinjoli, kamuuza kamba kadanganika kweli?

⁴⁵ Viyalongelwe na yuja imkulu, kamwingha Yosefu mtufi wake. Na heyo kaugulila sanda, kauhulumusa mumsalaba, kaugela muna isanda, kautambalika muna dikabuli disongoligwe mdibwe; kabimbilisa dibwe, kaugubika umulango wa dipanga.

⁴⁶ Na waja kina Maria Magdalena na Maria mamo wake Yose walola hayekigwe.