Marko 14 - Lagano da Isambi

Maria kamwitila Yesu narde

¹ Vizisigale siku mbili kuvika sikunghulu ya Pasaka na ya migate ilibule usasu, Watambika Wakulu na Wananzuma wazahila kumgoga kwa ubala giladi wamkome.

² Komu walonga, “Tanhu isikunghulu ibite, wanhu sikuweze kutenda kizagala!”

³ Na heyo viyakalile Betania mngʼanda ya Simoni mwene Dikulu, kakala hana gamandiya; kamwizila mtwanzi mwene kichupa kizelu cha ubwe, kimemile mavuta ga maluwa gakemagwa Nardo, gaguligwe mhiya bwando, ganogile nghani; kaditula kija kichupa, kamwitila Yesu mditwi jake.

⁴ Wayagwe wehilwa mmoyo walonga, “Wachoni ubananzi uno wa mavuta ganogile kamba vino?

⁵ Kilumbo mavuta gano kamba gagulizwe, gahavikile silingi mizo midatu hebu kubanza aho, wagolelwe iwakiwa.” Avo wamfokela nghani yuja mtwanzi.

⁶ Komu Yesu kalonga, “Mulekeni; vilihi vumumgela kinyanyagazi? kanhendela mbuli inogile.

⁷ Kwa mzoko wakiwa munawo kumwenu mazuwa gose, na kamba muhalonda, modaha kuwasanghanila ganogile; bali niye sili namwe mazuwa gose.

⁸ Kasanghana viyadahile; kasonga kubakaza lukuli lwangu mavuta gano, yautunduwile mkuzikwa.

⁹ Ihoko nomulongelani, hohose muna ulumwengu wose, vonda usimulilwe Usenga Unogile, na dino diyatendile yuno mtwanzi, dosimulilwa giladi na heyo yagelegezwe.”

Yuda Iskariote

¹⁰ Imala Yuda Iskariote yakalile miyawo waja umulongo umwe na wabili, kachola kwa Watambika Wakulu giladi yamgele Yesu mmakono mmwawo.

¹¹ Na hewo vuwagahulike wemozamoza, walagana nayo kumwingha mhiya; baho hayazahile ulegeho unogile yamulave.

Pasaka itunduwilwa

¹² Siku ya ichanduso ya ukuja migate ilibule usasu, wanhu vuwasikile nghondolo za Pasaka, wanahina wake wamuuza, “Kwahi kuulonda tukakutunduwilile goya, wije nghondolo ya Ipasaka?”

¹³ Kawatuma wanahina wake wabili, kawalongela, “Gendeni mdiwambo, baho moitinghana na munhu yasolile nongo ya mazi, mkolelezeni!

¹⁴ Muja muyokwingila, mulongeleni mwene ngʼanda, Mkulufunzi kokuuza, dili kwahi digati ja kukala niye, kileka ndiye nghondolo wa Pasaka hamonga na wanahina wangu?

¹⁵ Baho mwenyecho komlagilani gati kulu dimalile kutunduwilwa goya; himo tusanghanileni!”

¹⁶ Waja iwanahina wachola, wengila mdiwambo, wavona kamba viyawalongele, waitunduwila goya nghondolo wa Pasaka.

Mandiya ga ikilo ga kwihoza

¹⁷ Viivikile ichungulo, keza hamonga na waja umulongo umwe na wabili.

¹⁸ Vuwakalile woja, Yesu kalonga, “Ihoko nomulongelani, miyenu imonga yoja hamonga na niye, konihimbila.”

¹⁹ Wandusa kunyunguwala na kumuuza imonga imonga, “Iyo nene?”

²⁰ Na heyo kawalongela, “Miyenu mwemwe umulongo umwe na wabili, yazanhike hamwe na niye mumkungu yuyo.

²¹ Mwana wa Munhu kochola na nzila yake kamba viyandikilwe; bali yuja munhu igambile Mwanage Munhu kahimbilwa na heyo, gehile gomvika; munhu yuja vihawile goya kamba hisambi yaleligwe.”

²² Vuwakalile woja, kausola mgate, kamtuniza Mulungu, kaumega kawagwelela yolonga, “Soleni, luno lulo lukuli lwangu.”

²³ Imala kasola kiya cha kungʼwela, kamtuniza Mulungu kawengha, wangʼwa wose himo.

²⁴ Kawalongela, “Uno uwo mulopa wangu wa Lagano ja Isambi, uvavanha kwa kilumbo cha wanhu bwando.

²⁵ Ihoko nomulongelani, lulawile vino hondaningʼwe kabili umujo wa mitongoni, kuvikila siku hiyo vondaningʼwe wa isambi muna Undewa wa Mulungu.”

Petro kagangamala kwigesa vihile

²⁶ Vuwamalile kwimba, walawa wachola kuli digongo ja michekele.

²⁷ Yesu kawalongela, “Mose mokikwala, kilumbo yandikwa, Nomsuna imchunga, nghondolo wopwililika.

²⁸ Bali nihaziga kuzuswa, nomulongolelani kuchola Galilea.”

²⁹ Baho Petro kamulongela, “Viyemela wose na waikwale, niye namduhu.”

³⁰ Yesu kamulongela, “Ihoko nokulongela, ikilo iino inzogolo tanhu hanakwika, na gweye kwiza kombela miyanza midatu.”

³¹ Na heyo kagangamiza nghani kalonga, “Viyemela vihanyandama kukomigwa hamonga na gweye, honda nikubele ngʼo.” Na waja wose walonga vivo.

Nghondo ya Getsemane

³² Vuwavikile hanhu hakemagwa Getisemane, kawalongela wanahina wake, “Kaleni hano, kikomo nihamala kupula.”

³³ Kamsola Petro, Yakobo na Yohana, kachola nawo, kasonga kwingilwa na kingudemo na kusangayagaya.

³⁴ Kawalongela, “Loho yangu yosaganhika nghani na manyulunyulu, isigale hadodo kudanganika; kaleni meso bahano!”

³⁵ Kakwenhuka hatali mhunde, kagwa mavindi, kapula, kamba vihadahika, gahavika higo, kipigiti hicho kimbite kutali.

³⁶ Kalonga, “Aba, Tata, gose godahika kumwako; avo kibitize kingʼwelo kino sekenikingʼwe; komu sekegasanghanwe gonigesa niye, bali goulonda gweye.”

³⁷ Viyezile kwa wanahina, kawavika wawasile utulo, kamulongela Petro, “Simoni gweye, kuwasa utulo? Hudahile kukala mangweda saa imonga iyeka?

³⁸ Kaleni meso na kupula, sukumwingile mkugezwa; iloho yolonda kwidikila, komu lukuli lunyeka.”

³⁹ Kachola lwekabili, kapula kuno yolonga malonga gagaja.

⁴⁰ Viyezile vivo, kawavika wawasile utulo, kilumbo meso gawo gakala kamvu kamvu, wahila kumwidika.

⁴¹ Na viyezile mwanza wekadatu, kawalongela, “Muhalibasiliza kuwasa utulo, uudonhi uwalawe? Havikizwa; kipigiti kivika; loleni Mwana wa Munhu kogeligwa mmakono ga wabananzi.

⁴² Gandamukeni tuchole; loleni mwene kunihimbila kabahano behi!” Yesu viyagogigwe na iwandumu

⁴³ Viyakalile yolonga, mhunde baho keza Yuda, imonga wawo waja umulongo umwe na wabili, hamonga na dale ja wanhu bwando wene misime na miwenguwengu, walawile kwa Watambika Wakulu, Wananzuma na Wavyele.

⁴⁴ Yuja mwene kumuhimbila kakala yawenghile utango yolonga, “Yo-nda nimnonele iyo yuyo, mgogeni mchole nayo, mumteganye nghani!”

⁴⁵ Na heyo viyavikile, mhunde kumkwenhukila kuno yolonga, “Rabi (Mkulufunzi)!” kamnonela.

⁴⁶ Baho wamgoga na makono gawo.

⁴⁷ Bali imonga wawo wemile baho, kasomola sime yake, kamtowa mtumwa wa Mtambika Mkulu na kumkanha digutwi.

⁴⁸ Yesu kedika kawalongela, “Mwiza na misime na miwenguwengu mgoge niye, kamba wanhu wogenda kugoga bokonyo.

⁴⁹ Mazuwa gose nghala namwe muja mdihekalu kuno nilangukiza, hamngogile; komu gano gasanghanwa giladi gandikwe gavikizwe.”

⁵⁰ Baho waja wakalile nayo wamuleka, wakimbila wose.

⁵¹ Hakala na mmhale imonga, yuyo yekoleleze nayo, kakala yaigubike hakinena kitambala cha bafuta, na hewo wamgoga.

⁵² Kakileka kitambala mmikono mmwawo, kakimbila ukulunge.

Yesu kataguswa haluhengo; usindi wa uvwisi

⁵³ Wamgala Yesu kwa mtambika mkulu, ako weilundiza wose watambika wakulu, wavyele na Wananzuma.

⁵⁴ Na heyo Petro kakala yomuwinza kutalitali, yomana kwingila kunzingo kwa Mtambika Mkulu, kakala hamonga na wambigalo, yokota moto.

⁵⁵ Bali Watambika Wakulu na Wavyele wose wa Luhengo wazahila usindi kumwake Yesu giladi wamkome, hawauwene.

⁵⁶ Kilumbo bwando wamsindila ga uvwizi, na usindi wawo haugondanye.

⁵⁷ Wayagwe walawilila wosindila ga utungulu, walonga,

⁵⁸ Tweye tuhulika viyalongile, “Niye noditula ngʼanda dino ja Mulungu dizengigwe na mikono, imalabaho nodizenga viyagwe kwa mazuwa madatu, na hijo honda dizengwe na mikono.”

⁵⁹ Hata hivo usindi wawo haugondanye.

⁶⁰ Baho Mtambika Mkulu vivo yenuke, keza hagatigati, kamuuza Yesu, kalonga, “Huidika mbuli, wano vuwokudununza?”

⁶¹ Bali heyo kanyamala tulu, hamwidike mbuli; Mtambika Mkulu kamuuza kabili, kamulongela, “Tulongele, gweye gwegwe Kristo mwanage Magana Mtunilwa?”

⁶² Yesu kalonga, “Iyo nene, na mweye momona Mwanage Munhu voyokala ukulume kwa Mhiko, kabili vondayeze uchana mmawingu ga kuulanga!”

⁶³ Baho Mtambika Mkulu yomana kuzidega nguwo zake, kalonga, “Iwasindi towalondela choni kabili?

⁶⁴ Muhulika viyombeza Mulungu; avo mokonaze?” Na hewo wose wamtagusa kamba imwandama yafe.

⁶⁵ Baho wayagwe wandusa kumtemela mizite, avija wamgubika ikihanga; wamsuna mikonde kuno womulongela, Tufambulile yalihi yakutowile? Na wemilizi wamsola, wamtowa makofi.

Petro viyambelile Yesu

⁶⁶ Na heyo Petro viyakalile hasi kunzingo, keza imonga wawo nokola wa kitwanzi wa Mtambika Mkulu.

⁶⁷ Viyamonile Petro yokota umoto, kamsungilila kalonga, “Viyemela na gweye kukala hamonga na yuja Yesu wa Nazareti!”

⁶⁸ Kabela kalonga, “Aka sivitanga, viyemela sigamanya goulonga.” Imalabaho kalawa kunze kunzingo.

⁶⁹ Yuja nokola wa ikitwanzi viyamonile chusa, kasonga kabili kuwalongela waja wemile haja, “Yuno na heyo kamumo mmwanza wawo!”

⁷⁰ Petro kabela vivija; kabili mhunde baho waja wemile haja wamulongela Petro, “Ona vija, na gweye kwa mmwanza wawo, kilumbo kokoneka kwa Mgalilea.”

⁷¹ Baho hayasongile kwidumiliza na kwiduwila yolonga, “Simtangile munhu hiyo imulonga.”

⁷² Mhunde nzogolo keka mwanza wekabili; baho Petro hayakumbukile dija dilonga, Yesu diyamulongele, Nzogolo yahali hanakwika miyanza mibili, na gweye kuziga ku-mbela miyanza midatu. Na viyawalanga, kasonga kulila mahozi.