Marko 13 - Lagano da Isambi

Magweka gondageze

¹ Viyalawile mdihekalu, mwanahina wake imonga kamulongela, “Mkulufunzi, galole mabwe gano makulu na kuzengwa kwake kukulu!”

² Yesu kamulongela, “He, kogalola gamazengo gano vigali makulu? Honda dilekigwe dibwe dimwe uchana hadibwe diyagwe dileke kupatuswa hasi.”

³ Imala viyakalile kudigongo ja michekele, ulaula na dihekalu, baho Petro, Yakobo, Yohana na Andrea wamuuza vuwakalile waliyeka, walonga,

⁴ “Tulongele, gweka hijo jokuwa zuwaki; na utango wake wokuwaze aho vondagavikizwe higo gose?”

⁵ Yesu kasonga kuwalongela, “Teganyeni munhu sekeyamwagizeni!

⁶ Kilumbo bwando wonda weze kwa twaga jangu, kuno wolonga, niye nene!

⁷ Na hewo wowakonga bwando; na mweye mohulika nghondo na luvumo lwa nghondo, bali sukumgudeme; ago honda galeke kulawilila, bali sicho ikidugalo.

⁸ Kilumbo wokifunganyila lukolo kwa lukolo, vivo watawala kwa watawala wayawo; na hanhu hakwe hakwe holawilila kingudemo, na hayagwe nzala; ago icho ikisongelo cha masungu.

⁹ Komu mweye iteganyeni wenyego; wowagalani hatagusilo ja iwakulu na muli zingʼanda za nhambiko msunigwe, imalabaho womwimizani havihanga vya watawala na wandewa kwa kilumbo changu, mwize kunisindila kumwawo.

¹⁰ Na Usenga Unogile hauleka ubwililiswa tanhu kwa wamhazi wose.

¹¹ Aho baho vonda wawalave na kuwagala, sukumsonge kuhusahusa mbuli za kulonga, bali ulonzi wonda mgwelelwe kipigiti kicho, galongeni gagaja! kilumbo si mwemwe wonda mulonge, bali Loho Yangʼalile.

¹² Kwiza vokuwa kamba vino, ndugu na ndugu wokihonza waikome, na tata wowahonza wana wawo, na wana wowahindukila wavyele zawo wawakome.

¹³ Na mweye mokwihilwa na wanhu wose kwa mzoko wa twaga jangu; ayuja yonda yafunye umoyo kuvika ikimambukizo, yuyo yonda yahone.

Wiho wa ubananzi; umbwelo wa Yesu

¹⁴ Aho baho vonda muwone wiho wa ubananzi wimile hahagambile; yonda yasome nayavitange, aho waja wali Uyuda, nawakimbilile mvigongo.

¹⁵ Na munhu yali uchana haingʼanda yake, sekeyahulumuke kwingila mngʼanda yasole kili mumo.

¹⁶ Na heyo yali kumgunda sekeyabwelele gali kuchugu, yaisole nguwo yake.

¹⁷ Bali wonda wone vihile nghani iwo waja wene ziinda na waja wokongheza mazuwa higo.

¹⁸ Tambikeni mpule, higo sekegeze mkikomo cha kihuhwe!

¹⁹ Kilumbo mazuwa higo gokuwa na mgaduko mkulu kubanza gose gabitile kulawa ichanduso aho, Mulungu hayaumbile vyose, na dilelo; na milongo yondaize honda galawilile kamba higo.

²⁰ Avo siku hizo kamba Magana hazihunguze, hisambi yahone munhu hata yumwe; bali kwa giladi da waja wasagulwe, kazihunguza siku zija.

²¹ Aho munhu yahawalongela, Lola yuno hano yuyo Kristo; hebu, Lola yuja kuja! sukumwidike!

²² Kilumbo yokwinuka mikristo ya utungulu na watulandagu wa uvwizi, na hewo wotenda vilolomboto na vilozo, wawaluluse wasaguligwe, giladi wage, kamba vihadahika.

²³ Komu mweye teganyeni, niwalongela gose.

²⁴ Mazuwa higo, ija imigaduso vonda ibite, zuwa dogalamka titu na kugela ziza; na mwezi hondaungʼale mulangaza wake.

²⁵ Na nhondo zolagala kulawa kuulanga, mhiko za kuulanga zotigiswa.

²⁶ Iho baho honda wamonele Imwana wa Munhu viyokwiza muna gamawingu mwene iyenzi na mhiko bwando.

²⁷ Na heyo kowatuma gamalaika, wawakwegeze waja iwasaguligwe kulawa mhande zose nne beho kudilawila, wandusile hausongelo wa isi, kuvikila kidugalo cha ulanga.

Hala mumkuyu; kaleni mangweda

²⁸ Ilangukizeni hala mumkuyu; matambi gake vigozuka na kubamandula mitepo, mvimanya kamba siku za vuli zammabehi.

²⁹ Vivo na mweye muhagona higo gahawa baho, vimanyeni kamba kimambukizo kiwavikila mmilango yenu!

³⁰ Ihoko nomulongelani, ulelwa uno hondauzige kuvika iho, vonda galawile higo gose.

³¹ Ulanga na isi woziga, bali malonga gangu honda gazige.

³² Komu ija isiku hebu kipigiti chake vonda kivike, munhu havitanga, hebu malaika wa Mulungu hebu Mwana, bali Tata yaiyeka.

³³ Iteganyeni, mkale mangweda, kilumbo hamvimanya siku zake vonda ziduganye!

³⁴ Igalamka na munhu mwene kuifunganya mwanza yalekile ngʼanda yake, kawengha watumigwa wake lwamu, kawagwelela kila munhu kazi yake, na msepa mulango kamulagiza yakale mangweda.

³⁵ Avo kaleni meso, kilumbo hamvitanga Mwene Ngʼanda hoyobwelela, kamba kokwiza ichungulo hebu ikilo ndovu, hebu nzogolo zikwika kubunzuke.

³⁶ Sekeyeze yawasinhuse, yamvikeni muwasile!

³⁷ Na hijo diniwalongela mweye, nowalongela wose, Kaleni mangweda!”