Marko 12 - Lagano da Isambi

Wanghulima wehile

¹ Kasonga kulonga nawo kwa mizungu: “Munhu kahanda mgunda wa mitongoni kauzungulusa luwigo, kahimba kolongo ja kukamila mitongoni, kazenga dungu, kawapangiza wanghulima, imalabaho kachola isi iyagwe.

² Siku vizivikile, kamtuma nyakadala wake kwa waja iwanghulima, giladi wamwinghe umujo wa mitongoni.

³ Na hewo wamgoga, wamsuna na kumbweza makono bule.

⁴ Yomana kutuma kabili nyakadala iyagwe kumwawo, na heyo wamsuna, wamgela milonda ya mditwi, wamuliga.

⁵ Yomana kugala vivo iyagwe, yuja wamkoma; na wayagwe bwando, wayagwe wawasuna, wayagwe wawakoma.

⁶ Kakala na imonga yaliyeka, yuyo Mwanage iyanogele; na hiyo kamtuma kumwawo wa ikimambukizo, kalonga, Nogesa Mwanangu kwiza womdumba!

⁷ Bali waja iwanghulima wailongela wawo kwa wao, Yuno yuyo muhalatwaga, izoni tumkome; imalabaho uhazi wake wokuwa wetu!

⁸ Avo wamgoga, wamkoma, wamana kumwasa kunze ya umgunda wa mitongoni.

⁹ Hee! Avo mwene mizabibu kotenda lulihi? Nyagiza vondayeze, kowakwedula yawakome waja iwanghulima, na mgunda uja kowengha wayagwe.

¹⁰ Hamdisomile tanhu jandiko hijo digambile, Dibwe diwalemile wazenzi, ajo digalamka dibwe kulu ja kingolobweda.

¹¹ Hivo visanghanwa na Bwana, na tweye tuhavilola tokanganya.”

¹² Baho walondile kumgoga, kilumbo wavimanya kamba kawafumbila wawo wenyego mzungu uja. Komu wadidumba didale ja iwanhu, avo wamuleka, wachola na zawo.

Vilingana kuliha kodi ya serkali

¹³ Watuma kumwake Mafariseo na wanhu wa Herode, wamtegele kwa malonga gake.

¹⁴ Weza wamulongela, “Mkulufunzi, tukutanga kamba gweye kwa munhu wa ihoko, hudumba ukulu wa munhu wowose, kilumbo hulolaga vihanga vya wanhu; kabili kolanguliza nzila ya Mulungu viili ihoko. Avo tulongele, vinyandakana kumlavila Mtawala kodi hebu sivivo?

¹⁵ Tumwinghe hebu tumwime?” Na viyatangile ubala wawo kawalongela, “Habali mongeza? Tanhu ngalileni mhiya ya kodi niilole!”

¹⁶ Vuwamgalile kawauza, “Cha nani kihanga kino na utango uno?” Wamulongela, “Uno wa Mtawala Kaisari.”

¹⁷ Baho Yesu hayawalongele, “Muliheni Mtawala gali gake Mtawala, na Mulungu gali gake Mulungu!” Wamkanganya nghani.

Wafile wozuswa vilihi

¹⁸ Masadukeo hewo walongaga kamba kuduhu kuzuka kuna ikiyama, wamgendela wamuuza walonga,

¹⁹ “Mkulufunzi, Mose katwandikila kamba munhu yahadanganikilwa na mkulu wake yalekile sano jake bali halekile mwana, yuja ndugu yake yamwingilile yuja imwehe, yamulelele mkulu wake mwana.

²⁰ Kukala na wambigalo Saba, wose ndugu; yuja yalongole kasola mwehe, komu viyafile halekile mwana.

²¹ Wekabili kamwingilila avija, na heyo kadanganika, halekile mwana; na yuja wekadatu vivija.

²² Womana wose saba hawalekile mwana; vuwamalile wose, na heyo mtwanzi kadanganika.

²³ Avo ako kuna ukuzuswa vonda wazuswe, kokuwa sano ja nani kwa waja, kilumbo wose saba wakala nayo yuja imtwanzi.”

²⁴ Yesu kawalongela, Mokwaga, kilumbo hamgatanga gandikigwe hebu mhiko za Mulungu.

²⁵ Kwa mzoko vondawazuswe kulawa mkifo, hondawasole hebu kusoligwa komu wogalamka kamba malaika vuwali kuulanga.

²⁶ Bali kwa kilumbo cha wafile kamba wozusigwa, hamsomile muna ikitabu cha Mose, “Mulungu viyamulongele aho haikisukuzi, Niye na Mulungu wa Abrahamu, na Mulungu wa Isaka, na Mulungu wa Yakobo?

²⁷ Avo Mulungu si Mulungu wa wafile, komu wao wali na upile; mweye mokwagilwa nghani.”

Indagizi nghulu ilihi

²⁸ Kamwizila mwananzuma imonga yawahulike vuwebamilile, na heyo kavimanya kamba kawedika goya; kamuuza, “Muna zindagizi zose indagizi nghulu ilihi?”

²⁹ Yesu kedika, “Inghulu iyo ino, Tegeleza Israeli, Magana Mulungu wetu yuyo Bwana yaliyeka.

³⁰ Na gweye umnogele Magana Mulungu wako kwa moyo wako wose na kwa loho yako yose na kwa ngelegeza zako zose na kwa mhiko zako zose!”

³¹ Na yaikabili iyo ino, Umnogele miyago kamba vukinogela mwenyecho; haduhu lagizo kulu kubanza gano.

³² Yuja Mwana Nzuma kamulongela, “Hongelaga Mkulufunzi, kulonga ga ihoko; Mulungu kayeka, haduhu iyagwe komu Heyo.

³³ Kabili kumnogela Heyo kwa moyo wose na ngelegeza zose na mhiko zose, na kumnogela miyago kamba vukinogela mwenyecho, vyemela kubanza ngʼombe za nhambiko za kusomwa na nhosa zose za nhambiko.”

³⁴ Yesu viyamonile kamba kedika goya, kamulongela, “Gweye huli kutali na Undewa wa Mulungu.” Kabili honeke munhu yagambe yumwe, yabwaduke kumuuza mbuli chusa.

Habali Daudi kamtuniza mwanage

³⁵ Yesu viyakalile yolanguliza mdihekalu kawauza kalonga, “Wananzuma wolongaze kamba Kristo yuyo mwana wa Daudi?

³⁶ Vilihi Daudi mwenyecho kalonga kwa mhiko za Loho Yangʼalile, Bwana kamulongela Mndewa wangu, Kala ukulume kumwangu, kikomo vondaniweke iwandumu zako hasi hamigulu yako?

³⁷ Avo Daudi mwenyecho yahamkema Mndewa, vokuwaze kabili yawe mwanage?”

Wene kwitopa

³⁸ Na dale da wanhu bwando wanogelwe kumtegeleza viyolonga. Kawalanguliza, “Iteganyeni kwa mzoko wa Wananzuma walondaga ukutembela kuno wavalile nghanju nhali, giladi walolwe na iwanhu hagulilo.

³⁹ Na amo muna zingʼanda za nhambiko wolonda vigoda vya kuulongozi, kabili wahagonekwa mandiya walondaga kukala hali iwakulu.

⁴⁰ Kuno wojaga ngʼanda za wagane, wokitenda kamba wobasiliza kuwatambikila; wali kamba hivo, kwiza mkwedulo wawo wokuwa mkulu kubanza wayagwe.”

Hela ya mgane ibanzile

⁴¹ Kakala yoditungiliza dibuhulu da isiga, kalola wanhu vuwogela mhiya za nhosa muli idibuhulu; na wene gamali bwando wagela mhiya bwando.

⁴² Keza mtwanzi mgane imonga, mkiwa, kagela visenti vibili, kichinyha iyo hela imwe.

⁴³ Baho yawakemile wanahina wake, kawalongela, “Ihoko nomulongelani, yuno imgane kagela bwando kubanza wose wagelile zimhiya muno mdibuhulu ja ukulavila.

⁴⁴ Kilumbo waja wose walava muli zimhiya zawo bwando; komu yuno kwa ukiwa wake kavilava vyose viyali navyo, vivo viyatamanile kwiguta.”