Marko 11 - Lagano da Isambi

¹ Aho vuwakwenhukile Yerusalemu kuvika Betifage na Betania hana digongo ja imichekele, katuma wanahina wake wabili.

² Kawalongela, “Gendeni kuna ikiwambo, ula kwa ula na mweye; vonda mwingile muja, mhunde mokona mwana mhunda yafungigwe, yogamba munhu hanamkwela tanhu; mdoholeni mumgale.

³ Kamba munhu yahawauza, Habali mtenda hivo? longeni, Mndewa komulonda; mhunde komwinghani; mgaleni hano!”

⁴ Wenula wachola, wamona imwana mhunda kunze yafungigwe kuna dilango, wamdohola.

⁵ Wayagwe wemile hiko, wawauza, “Motenda choni mumdohola imwana mhunda?”

⁶ Hewo wedika kamba Yesu viyawalongele; baho wawalekela.

⁷ Wamgala imwana mhunda kwa Yesu, wamtandikila uchana nguwo zawo, imalabaho kamkwela.

⁸ Wanhu bwando watandika nguwo zawo mnzila; wayagwe watandika matambi ga mibiki gawakanhile mmigunda.

⁹ Na waja walongole na waja wawawinzile waguta nyangi, “Hosiana (Nahongele)! Yatunizwe Yokwiza kwa Tagwa ja Bwana!

¹⁰ Utunizwe undewa wa tata wetu Daudi, utwizile! Hongelaga (Hosiana) uchana kuulanga!”

¹¹ Viyengile Yerusalemu, kagenda kuli dihekalu, kavilola vyose vili mumo, baho zuwa diswa; avo kalawa, kachola Betania hamonga na waja umulongo umwe na wabili.

Mkuyu unyala

¹² Imitondo yake, vuwalawile Betania kayona nzala.

¹³ Kawona mkuyu wene mitepo uli hatali, kagenda kuulola kamba uchana una mujo; kauvikila, honile kinhu bali mitepo yeka, kilumbo siku za mujo hazinavika tanhu.

¹⁴ Baho kalava ulonzi kalonga, “Imilongo yose munhu sikuyaje mujo kumwako!” Na wanahina wake wagahulika. Vuwavikile Yerusalemu, kengila mdihekalu, kasonga kuwawinga waja wene kugula na kuguliza muja mdihekalu, kakindula meza za wasosokanya mhiya, na vigoda vya wachuluzi wa nziwa.

Yesu kawinga wachuluzi mdihekalu

¹⁶ Kabili halekile mwene kugala kiya yabite aho hangʼalile.

¹⁷ Kawalangukiza na kuwalongela, “Yandikigwa kamba Ngʼanda Yangu yokemigwa ngʼanda ya nhambiko kwa ngholo zose za wanhu, bali mweye muitenda hango da wabokonyo.”

¹⁸ Watambika Wakulu na Wana Nzuma vuwagahulike, wazahila vonda wamwangamize, kilumbo wamdumba kwa mzoko wanhu wose wasinhuswa na malangulizo gake.

¹⁹ Vivo mazuwa gose ihawa ichungulo, Yesu na wali hamonga nayo walawaga mdiwambo.

²⁰ Imitondo vuwabitile, wawona umkuyu unyala, lulawile hasina.

²¹ Petro kagelegeza longa dija, kamulongela, “Mkulufunzi, lola, umkuyu uuduwile, unyala.”

²² Yesu kedika kalonga, “Mtamanileni Mulungu!

²³ Ihoko nomulongelani, Kamba muhamtamanila Mulungu, modilongela digongo dino, Segela hano hauli, ubwanhike mbahali! avo gosanghanika, komu muhawa bule kinghwaso, kuno mtamanila kamba gaja gampulile gokiduganya.

²⁴ Avo nomulongelani, Gose gonda mpule kwa kugesa, gatamanileni kamba mogapata, baho mogwelelwa.

²⁵ Na mweye muhema kumpula Mulungu, kamba muhamwikila munhu mfundo, isegezeleni matozo mwemwe kwa mwemwe, baho Tata wenu yali Kuulanga na heyo kowasegezelani matozo genu.

²⁶ Bali kamba hamwisegezele mwemwe kwa mwemwe, na heyo Tata wa Kuulanga honda yawasegezele matozo genu.”

Ubatizo wa Yohana ulawa kwahi

²⁷ Vuwengile kabili Yerusalemu, na heyo viyatembele mdihekalu, wamwizila Watambika Wakulu na Wana Nzuma na Wavyele.

²⁸ Wamuuza, “Higo kogasanghana kwa mhiko zilihi, hebu yalihi yakwinghile ndagizi zino ziusanghanila?”

²⁹ Yesu kawalongela, “Na mweye nomuuzani mbuli imwe; muhanyidika nowapetela mhiko zangu zinisanghanila.

³⁰ Ubatizo wa Yohana ulawa kwa Mulungu hebu kwa wanhu? Nongeleni!”

³¹ Wagelegeza mmiyoyo yawo, “Tuhalonga ulawa kwa Mulungu, kotuuza, Vilihi hamumtogole?

³² Na tuhalonga, ulawa kwa wanhu;” wakala wawadumba iwanhu, kilumbo wanhu wose wamvumila Yohana kamba Mlaguzi wa ihoko.

³³ Avo wamwidika Yesu walonga, “Hatuvimanyile.” Baho Yesu kawalongela, “Na niye siwalongelani zija zimhiko zinisanghanila.”