Marko 10 - Lagano da Isambi

Mbuli za ndowa

¹ Kakulawa hiko, keza kuli zimbaka za Uyuda na umwambu wa Yordani; madale ga wanhu wammemela viyagwe, kuwalangukiza kamba viyazowele.

² Mafariseo wamgendela wamuuza, kamba lwabaho lwamu, mbigalo yamwase sano jake? Kuno womgeza.

³ Na heyo kedika yowalongela, “Mose kawalagiza choni?”

⁴ Walonga, “Mose katwingha Nzuma ya kwandika utango wa kwiyasa, imala komwasa.”

⁵ Yesu kawalongela, “Kilumbo cha ugaga wa miyoyo yenu, kileka yamwandikileni lagizo hijo.

⁶ Bali kulawile aiho haichanduso, Mulungu hayaumbile ulumwengu, lawaumba mbigalo na mtwanzi.

⁷ Kalonga, kwa kilumbo hicho munhu komuleka tata wake na mamo wake, Na hewo wabili wogalamka lukuli lumwe,

⁸ kileka hawali wabili, bali welumba lukuli lumwe.

⁹ Avo Mulungu kiyagongomanye, munhu sekeyakibasule!”

¹⁰ Vuwabwelile mngʼanda, wanahina zake wamuuza mzoko wa longa hijo,

¹¹ Na heyo kawalongela, “Munhu yahamuleka sano jake na kusola iyagwe, katenda ugoni nayo.

¹² Na dija sano yahamuleka mkasano wake, yahasoligwa na mbigalo iyagwe, katenda ugoni.”

Yesu kawamoteza iwana

¹³ Wamgalila vyana, yavikwase; bali wanahina wawakomhokela wene kuwagala.

¹⁴ Na heyo Yesu viyaviwene, kehilwa kawalongela, “Vilekeni ivyana vize kumwangu, sukumvigomese! kilumbo wagambile kamba vino, undewa wa Mulungu uwo wawo.

¹⁵ Ihoko nomulongelani, munhu yahalema kuubokela Undewa wa Mulungu kamba ichana, honda yengile ngʼo.”

¹⁶ Ilawabaho kawafagatila, kawamotela, kawageleka mikono.

Mmhale mwene mhiya bwando

¹⁷ Vayalawile yovika mnzila, munhu imonga kamwizila chambwisa, kamfugamila mavindi, kamuuza, “Mkulufunzi, unogile, nhende kilihi niuhale ugima wa digunge?”

¹⁸ Yesu kamulongela, “Konghemaze nogile? Kuduhu yanogile komu Mulungu yaiyeka.

¹⁹ Malagizo kugatanga, Sikuukome; sikuutende ugoni; sikuwibe; sikuvwize; sikuubunze; wategeleze tataako na mamo wako!”

²⁰ Na heyo kamulongela, “Mkulufunzi, higo gose nigagoga kulawa umhale wangu.”

²¹ Yesu kamulola kamnogela, kamulongela, “Kusigaza kimonga, genda ukavigulize vyose vuuli navyo, uwagwelele iwakiwa, avo kokuwa na bikilo kuulanga; imala izo, widwike msalaba wako, ungholeleze!”

²² Viyadihulike longa dino, kasinalika kihanga, kachola kumwake kuno yolungumila mmoyo, kilumbo kakala na mhiya bwando.

²³ Baho Yesu kalola kuno na kuno, kawalongela wanahina wake, “Loleni ugaga ulihi uwazuwila wene mhiya kwingila kuundewa wa Mulungu!”

²⁴ Wanahina vuwengilwe na nghangawalo kwa malonga ago, Yesu kedika viyagwe kawalongela, “Wanangu, loleni ugaga ulihi uzuwila kwingila mundewa wa Mulungu.

²⁵ Vobuha ngamiya kubita mchonzo cha msonga, kamba kwiza mwene mhiya yengile mundewa wa Mulungu.”

²⁶ Na hewo wasinhuka nghani, waiuzagiza wawo kwa wawo, “Ihawa hivo, yalihi mina yonda yahonyi-gwe?”

²⁷ Yesu kawabunhulila meso, kalonga, “Kwa wanhu hadidahika, bali kwa Mulungu jodahika, kilumbo kwa Mulungu mbuli zose zodahika.”

Miyawi ya wanahina

²⁸ Baho Petro kananula mulomo, kamulongela, “Lola tweye tuvileka vyose, tukukoleleza gweye.”

²⁹ Yesu kalonga, “Ihoko nomulongelani, Haduhu munhu yalekile ngʼanda hebu mkulu wake, lumbu jake hebu mamo wake, tata wake hebu wana hebu migunda kwa kilumbo changu na giladi ya Usenga Unogile,

³⁰ yaleke kubokela miyanza muzo muno muisi ngʼanda na mkulu na lumbu na mamo na wana na migunda, hamonga na kuwingigwa; kabili mulumwengu wonda wize, kobokela ugima wa digunge.

³¹ Komu bwando wa ichanduso wogalamka wa ikimambukizo, na hewo wa ikimambukizo wogalamka wa ichanduso.”

Migazo ya Kristo, langulizo lwekadatu

³² Vuwakalile mnzila wochola Yerusalemu, Yesu kakala yalongole; na hewo wasinhuka, wamkoleleza kuno wodumba; kawasola kabili waja umulongo umwe na wabili, kandusa kuwalongela gaja gondagampate.

³³ Kalonga, “Loleni tokwela kuchola Yerusalemu, na hiko Mwana wa Munhu kogeligwa mmakono gawo Watambika Wakulu na Wana Nzuma, wamtaguse yafe; na womgela mmakono ga iwanhu hawamtangile Mulungu.

³⁴ Na hewo womfyosa, womtemela mate, womsuna vibongho, womkoma; na zihabita siku ndatu, ko-zuka.”

Wanage Zebedeo wavumila kingʼwelo cha Yesu

³⁵ Baho Yakobo na Yohana, wanage Zebedeo, wamkwenhukila wamulongela, “Mkulufunzi, tolonda umtendele jonda tukupule!”

³⁶ Na heyo kawauza, “Molonda niwatendele choni?”

³⁷ Wamulongela, “Utwike imonga kumkono wako wa ukulume, imonga kumkono wako wa ukumoso muna iyenzi yako!”

³⁸ Yesu kawalongela, “Hammanyile dijo dimpula! modaha kukingʼwa kingʼwelo kiningʼwela niye, na kubatizwa ubatizo uja unibatizwa niye?”

³⁹ Wamulongela, “Todaha.” Yesu kawalongela, “Kingʼwelo kiningʼwela niye, mokingʼwa; na hiwo ubatizo unibatizwa niye, mobatizwa.

⁴⁰ Bali kumwingha munhu yakale ukulume hebu ukumoso kumwangu sidaha, komu waja wekilwe umwaka, wogwele-lwa.”

⁴¹ Waja umulongo umwe vuwagahulike, wasonga kwihilwa na gaja gawatendile Yakobo na Yohana.

⁴² Yesu kawakema wamkwenhukile, kawalongela, “Mvitanga watawala wa zingholo kamba wowagudemeza, na iwakulu zawo wowagaza kwa mhiko.

⁴³ Bali hondaviwe hivo kumwenu, komu munhu yolonda kuwa mkulu kumwenu, nayawatumikileni mweye mose.

⁴⁴ Na heyo yolonda yawe wa ikilongozi kumwenu, yagalamke mtumwa wa wose.

⁴⁵ Kwa mzoko na heyo Mwana wa Munhu hezile yasanghanilwe, komu keza yasanghanike na kuulava ugima wake uwe honelo ja wanhu bwando.”

Bartimeo kimbugumbugu wa Yeriko

⁴⁶ Wavika Yeriko, na vuwalawile Yeriko heyo na wanahina wake na dale da wanhu bwando, Bartimeo mwanage Timeo, yakalile kimbugumbugu, kakala yopula hamngwazo wa inzila.

⁴⁷ Viyahulike kamba Yesu wa Nazareti kabaha, kasonga kuguta nyangi, kalonga, “Yesu Mwanage Daudi, umbonele bazi!”

⁴⁸ Wanhu bwando wamkomhokela yavudale, bali heyo kabasiliza kutowa nyangi, “Mwanage Daudi, mbonela bazi!”

⁴⁹ Yesu kema kalonga, “Mkemeni!” Wamkema yuja kimbugumbugu, wamulongela, “Hoza umoyo, winuke, kokukema!”

⁵⁰ Na heyo kayasa nghanju yake, kanyagamuka mbwisa, kamgendela Yesu.

⁵¹ Yesu kamuuza kalonga, “Kolonda nikutendele choni?”

⁵² Kimbugumbugu kamulongela, “Mkulufunzi, nolonda kulola chusa.” Yesu kamulongela, “Genda; nhamanilo zako zikuhonya.” Mhunde kalola, ilawabaho kamkoleleza mnzila.