Marko 1 - Lagano da Isambi

Kulawilila kwa Yohana Msingula wanhu

¹ Usenga Unogile wa Yesu Kristo, Mwanage Mulungu:

² wandusa kamba vuwandikigwe na Mlaguzi Yesaya, “Lola, nomgala msenga wangu, yakulongolele yaitende nzila yako.

³ Kuna dizi ja munhu yotowa nyangi kuluwala, Isanghaneni goya nzila ya Mndewa, Ugoloseni ubito wake.”

⁴ Yohana msingula wanhu kakala kuluwala yobatiza, kuno yopeta mgaluko wasegezelwe matozo.

⁵ Wamulawila wose wa Uyuda na wenekaye wose wa Yerusalemu wasingulwa na heyo muna ulwanda lwa Yordani, wazipupula zambi zao.

⁶ Na heyo Yohana kakala yavalile nguwo ya usinga wa ngamia, na lukumbulu lwa kwembe mkigudi chake, na mandiya gake gakala mbalangulu na uki wa mmuhulo.

⁷ Kafambula yolonga, “Hachugu changu kokwiza mwene mhiko kumbanza niye, na niye sidaha kwinamila nimdoholele nzabi za vilatu vyake.

⁸ Niye nombatizani na mazi, bali heyo kowabatiza na Loho Yangʼalile.”

Yesu kabatizwa, kagezwa, kandusa kupeta

⁹ Ikala siku zija Yesu keza kulawa Nazareti kiwambo cha Galilea, kabatizwa na Yohana muja mulwanda lwa Yordani.

¹⁰ Viyalawile mmazi, kawona ulanga ubalaluka, kamona Loho yomuhulumukila kamba nziwa.

¹¹ Na dizi dilawa kuulanga dilonga, “Gweye gwegwe Mwanangu mnogelwa inikunogele.”

¹² Mhunde baho Loho kamsola kamgala kuluwala.

¹³ Kakala hiko kuluwala siku milongo mine, yogezigwa na Mwenembago. Kakala hamonga na mingʼonyo, na malaika weza wamtunduwila.

¹⁴ Yohana viyamalile kufungigwa, Yesu keza Galilea kuupeta Usenga Unogile wa Mulungu.

¹⁵ Kalonga, “Kipigiti kiduganya, Undewa wa Mulungu wammabehi. Pupuleni muutamanile Usenga Unogile!”

Wanahina wasongile

¹⁶ Yesu vyokala yotembela mmambwegambwega mwa bahali ya Galilea, kamona Simoni na ndugu yake Andrea, wogela nyavu zawo mbahali, kilumbo wakala wavuwa somba.

¹⁷ Kawalongela, “Izoni mngholeleze, na niye nowatendani mgalamke wavuwa wanhu.”

¹⁸ Mhunde baho wazileka zinyavu, wamuwinza.

¹⁹ Viyagendele hamwande kamona Yakobo na ndugu yake Yohana, wanage Zebedeo; wakala mngalawa wotenda goya nyavu zawo.

²⁰ Mhunde kawakema, na hewo wamuleka tata wawo Zebedeo muja mngalawa hamonga na watenda kazi, weza wamkoleleza hachugu chake.

Mzuka mchapalisi ulavigwe

²¹ Wachola wengila Kapernaumu, na viivikile siku ja ukuhumula, kengila mngʼanda ya nhambiko, kulangukiza.

²² Wakangawala na langukizo jake, kilumbo kakala yowalanguliza kamba mwene mhiko, si kamba Wana Nzuma.

²³ Himo mngʼanda ya nhambiko mkala na munhu mwene mzuka mchapalisi, kenula dizi.

²⁴ Kalonga, “Tuna choni tweye na gweye Yesu wa Nazareti? Che, kwiza kutubananga? Nikutanga gweye kwa nani, gweye kwa Yuja Yangʼalile wa Mulungu!”

²⁵ Yesu kamkomhokela kalonga, “Vudala, umulawe!”

²⁶ Leka yuja imzuka mchapalisi kamkenhezakenheza, kalila na dizi kulu, ilawabaho kamulawa.

²⁷ Wose wengilwa na kituhuma, weuzagiza wenyego kwa wenyego walonga, “Mbuli yaki ino? Dijo langukizo ja mhiko za sambi! Kowalagiza mizuka michapalisi, na heyo yomdumba.”

²⁸ Kidinhilo chake kitapakala mbwisa, kibwililika hosehose muna iisi zose zibiduke Galilea.

Yesu mngʼanda ya Simoni Petro

²⁹ Mhunde vuwalawile mngʼanda ya nhambiko, wengila mngʼanda yawo Simoni na Andrea hamonga na Yakobo na Yohana.

³⁰ Na mamo wa sano jake Simoni kakala yatambalale mtamu wa lubahila. Mhunde baho wampetela viyali.

³¹ Kamwizila kamgoga mkono, kamwinula. Baho lubahila lumulawa, kawatumikila.

³² Viivikile ichungulo, zuwa vidiswele, wamgalila wose wakalile watamu na waja wavagalwe na mizuka.

³³ Kiwambo chose wakala welundize hamulango.

³⁴ Kawahonya bwando wakalile watamu wene vyugulo bwando, kaiwinga imizuka bwando, kaigomesa imizuka kulonga, kilumbo imtanga.

³⁵ Imitondo yake kaidamka nghani, kalawa kachola hanhu hali bule wanhu, aho baho yampulile Mulungu.

³⁶ Na heyo Simoni na wayage wamuwinza mbwisa.

³⁷ Vuwamuwene wamulongela, “Wose wakuzahila.”

³⁸ Kawalongela, “Tucho-leni kuyagwe kuli zikaye za mmambwegambwega, niwapetele mbuli na hiko; kilumbo iyo inizile.”

³⁹ Katembela isi yose ya Galilea, yopeta mbuli muna zingʼanda zawo za nhambiko, kaiwinga mizuka.

Mwene dikulu

⁴⁰ Mwene dikulu imonga keza kumwake, kampembela kuno yomfugamila mavindi kamulongela, “Uhalonda, kodaha kunihonya.”

⁴¹ Na heyo kamonela bazi, kamgolosela mkono, kamkwasa kamulongela, “Nolonda, uhone!”

⁴² Mhunde dikulu dihamuka, kangʼala.

⁴³ Mhunde baho kamulaga, kamkomhokela kalonga,

⁴⁴ “Teganya sukuumulongele munhu mbuli! Komu chola kamulagusile Mkulu wa nhambiko, ulave nhosa ya kuhonyigwa kwako kamba Mose viyalagize, uwo utango kumwao.”

⁴⁵ Bali heyo viyalawile, kasonga kudibwililisa gweka dino na kudidogola hosehose, avo Yesu hadahile kabili kwingila mkiwambo kimwagaiya, komu kakala kunze hanhu hali bule wanhu, na wanhu wamgendela kulawa nyenza zose.