Luka 8 - Lagano da Isambi

Watwanzi wamkoleleze Yesu

¹ Siku zizija Yesu katembelela viwambo na vibuga vyose yopeta na kuzuma mbuli zinogile za Undewa wa Mulungu. Na waja Longo dimwe na Wabili wachola hamonga nayo;

² hamonga na watwanzi wayagwe wakalile wahonyezwe mitamu ihile na mizuka; Maria yokemigwa Magdalena yalavigwe mizuka saba,

³ na Joana sano ja Kuza, mtunza mali wa Herode, na Susana na wayagwe bwando; wakala wowatumikila kwa mali gawali nago.

Hanhu hane hahandigwe

⁴ Dale kulu viditinghanile, na wanhu waja walawile mviwambo wamwizila, kawapetela hala, yolonga:

⁵ “Kukala mlimi, kalawa kagenda kuhanda mbeyu zake; viyahandile, mbeyu zimonga zigwila behibehi na inzila, zibojagwa, ilawa baho ndege wazija.

⁶ Ziyagwe zigwila hana gamabwe, zota, mhunde zinyala, kwa mzoko haduhu ludongo.

⁷ Ziyagwe zigwila hagati hali mizomola, na imizomola ikula hamonga, igela sesela.

⁸ Ziyagwe zigwila haludongo lunogile, zota, zilela mbeyu imonga muzo.” Viyakalile yolonga ago, katowa lwangi kalonga, “Mwene magutwi ga kuhulika, na yahulike!”

⁹ Wanahina wake wamuuza, Hala hijo ditambula choni?

¹⁰ Kedika, “Mweye mgolelwa kuzitanga nyongʼonyo zili mundewa wa Mulungu, bali wayagwe wolongelwa muna gamahala, giladi vuwalole sukuwalole, na vuwahulike sukuwavimanye.

¹¹ Na hala dino jotambula vino, Mbeyu dijo Longa da Mulungu.

¹² Hewo wagwile behi na inzila, iwo waja wadihulike Longa, ilawa baho kokwiza Mwenembago, kodisola dija Longa mmiyoyo mmwao, sikuwatogole bule wahone.

¹³ Na waja wali hamabwe iwo waja wahulike dilonga, wadibokela na kudenghelela; awo wabule mizizi, wotogola kipigiti kidodo; kikomo cha kugezigwa wokinega.

¹⁴ Azija zigwile hali imizomola iwo waja wahulike, wolawa baho wagenda na zao, wogazigwa na mzahizahi wa mali na dongho za ulumwengu; hawadabula kinhu.

¹⁵ Azija zigwile haludongo lunogile iwo waja wadihulike dilonga, wadibokela mmiyoyo inogile ikolele, nawo wokwazaganya kuno wolela mujo.

Kubwinha taa; kubokigwa

¹⁶ Haduhu munhu yabwinhaga taa, yaifise mkigelo hebu kuika haluvungu, komu koika uchana haikizingiti, giladi waja wakwingila wawone mlangaza wake.

¹⁷ Kabili haduhu mbuli ya kwifisa ileke kubwililika, hebu difisigwe kwiza dileke kutangika.

¹⁸ Avo teganyeni vilihi vonda muhulike; kilumbo munhu yahawa na kinhu, kongezelwa; komu munhu yahawa bule kinhu, na kija kiyagesile kamba kanacho, kobokigwa.”

Mamo wa Yesu kamuwinza

¹⁹ Baho wamwizila mamaake na ndugu zake, hawadahile kumkwenhukila kilumbo cha wanhu bwando.

²⁰ Wampetela kamba, “Mamaako na ndugu zako wema kunze, wolonda kukona.”

²¹ Komu heyo kedika kawalongela, “Mamaangu na ndugu zangu awo waja wotegeleza Longa da Mulungu na kuditenda.”

Nyukwanyukwa mbahali

²² Ikala siku dimonga Yesu kengila mngalawa hamonga na wanahina wake, kawalongela, “Tuloke umwambu wa di-bwawa.” Wamana kukwega matanga.

²³ Na hewo vuwakalile wochola, kawasa utulo; mhunde dilawilila nyukwanyukwa kulu muja mdibwawa; ingalawa imema mazi, isonga kudidimila.

²⁴ Wamgendela wamulamsa wolonga, “Mndewa, Mndewa, tokwaga!” Na heyo kalamka, kadikomhokela dibeho na nyukwa nyukwa da gamazi, vyose vinyamala, kukala tulu.

²⁵ Kawalongela, “Ili kwahi ngogelo yenu?” Na hewo wadumba, wakanganya wailongela wenyego kwa wenyego, “Yali nani yuyo yolagiza, beho na mazi, na hezo zomuhulika?”

Mgerasi mwene mzuka wa Legio

²⁶ Vuwamalile kuloka, wavika isi ya Wagerasi ija ikilola na Galilea.

²⁷ Viyalawile mhwani, kaitinghanila na munhu imonga wa kiwambo kija, mwene mizuka, havalile nguwo siku bwando, wala hakalile mngʼanda komu kuna gamapanga.

²⁸ Viyamuwene Yesu, katowa nyangi, kagwa hamigulu ya Yesu yolonga kwa dizwi kulu, “Tuna choni niye na gweye, Yesu Mwanage Mulungu Yali Uchana nghani?” Nokupula sikuungaze;

²⁹ kilumbo kaulagiza uja umzuka mchapalisi, umulawe munhu yuja; kwa mzoko kavagalwa nawo miyanza bwando, vilemela kakala yokwimilizwa kukifungo na kukakigwa minyololo na mhikwi, kazibena zose, kawingigwa kuluwala na uja mzuka.

³⁰ Yesu kamuuza, “Twaga jako nani?” Kedika, “Dale da Ndwagi”; kwa mzoko mizuka bwando imwingile.

³¹ Ija imizuka imuhembekeza sikuyawagale wagende kukolongo.

³² Bahaja hakala na dale kulu da nguluwe, wodila hakigongo; ija imizuka impembela wawengile nguluwa waja; kawengha vuwalondile.

³³ Mizuka imulawa munhu ija wawengila nguluwe waja; mhunde dija didale da iwanguluwe dihulumuka mbwisa kulawa kuna ingehema, divika hasi, dingila mdibwawa, wafa mmazi.

³⁴ Waja iwachunga vuwawene galawilile haja, wakimbila, waibwililisa mbuli ija mkiwambo na mmigunda.

³⁵ Wanhu walawa, wagenda kulola gaja gatendigwe, wamgendela Yesu, wamvika munhu yuja yalavigwe mizuka, kakala hasi haimigulu ya Yesu, yavalile nguwo na nzewele zake zibwela; wagwa kingwaya.

³⁶ Waja waviwene wawapetela vija viyahonyigwe yuja yavagalwe na mizuka.

³⁷ Na wanhu wa ulukolo lwa Gerasi na mmambwegambwega wamuhembela, yasegele kumwao, kilumbo wagogwa na woga bwando; kengila mngalawa kabwela.

³⁸ Na munhu ija yalavigwe imizuka kamuwila yelongoze nayo. Komu Heyo kamulaga kalonga,

³⁹ “Genda ukaye kumwenu, ukawapetele unzonza mkulu uyakutendele Mulungu!” Kachola kumwake, kawapetela mkiwambo chose unzonza mkulu uyatendelwe na Yesu.

Biti Yairo; pinga mtamu yolawa mulopa

⁴⁰ Avo Yesu viyabwelile, mtinghano umgomela, kuno wodenghelela, kilumbo wose wakala wombeta.

⁴¹ Lola munhu imonga keza, tagwa jake Yairo, na heyo yuyo mkulu wa kanisa; kagwa hamigulu ya Yesu, kamuhembela yengile mngʼanda yake.

⁴² Kilumbo biti yake mwana nyadimwe, kammabehi kudanganika, kana miyaka longo dimwe na mibili; na viyakalile yochola, madale wambabana.

⁴³ Na pinga imonga kakala yolawa mulopa miyaka longo dimwe na mibili, yamalile mali gake bwando kwa kuwengha waganga, hahonyezwe na munhu yoyose.

⁴⁴ Keza hakisogo chake, kaukwasa umusa wa inguwo yake, mhunde kulawa mulopa kuziga.

⁴⁵ Yesu kalonga, “Yalihi yanghwasile?” Avo wanhu wose vuwabelile, Petro kamulongela, “Mndewa, madale gano gokuzunguluka, gokubana!”

⁴⁶ Yesu kalonga, “Munhu kanghwasa, kilumbo nokona mhiko zindawa.”

⁴⁷ Yuja mtwanzi viyawene kamba hadaha kwifisa, keza yogudema, kagwa haulongozi wa Yesu, kampetela havihanga vya wanhu kilumbo cha ukumkwasa na vija mhunde viyahonile.

⁴⁸ Kamulongela, “Biti yangu, kugoga kwako kukuhonya. Genda na mbeho.”

⁴⁹ Viyakalile yolonga ago, keza msenga kulawa ngʼanda ya yuja mkulu wa kanisa, kalonga, “Biti wako kadanganika, sikumgaze mkulufunzi kabili!”

⁵⁰ Komu Yesu viyagahulike, kedika, “Sikuudumbe, ngoge nene! na heyo kohona.”

⁵¹ Viyengile mngʼanda, halondile munhu yengile hamonga na heyo kugati, komu Petro na Yohana na Yakobo na itata wa yuja imwana na mamaake.

⁵² Na wanhu wose vuwakalile wolila na kwiyalala, kalonga, “Sikumlile; hafile yuno, komu kawasa utulo.”

⁵³ Wamana kumseka nghani, kwa vija vuwatangile kamba kaziga kudanganika.

⁵⁴ Kamgoga mkono kalonga, kwa dizwi kulu, “Go mmhale, inuka!”

⁵⁵ Mhunde loho yake imbwelela, kenuka bahaja; kalagiza yagolelwe mandiya.

⁵⁶ Wavyele wake wakanganya nghani; na heyo kawagomesa sukuwampetele munhu gano galawilile.