Luka 7 - Lagano da Isambi

Akida wa Kapernaumu

¹ Yesu viyamambukize malonga ago gose mmagutwi ga wanhu, kachola kengila Kapernaumu.

² Hiko kukala na akida mwene nyakadala iyamnogele nghani, ayo kakala mtamu, yolonda kudanganika.

³ Aija akida viyahulike mbuli za Yesu, kagala wasenga wavyele wa Wayuda, wagende kumpula Yesu, yeze yamuhonye nyakadala wake.

⁴ Awaja iwavyele vuwamvikile Yesu, wamuhembekeza nghani wolonga, “Vimgamba ino umtendele vino.

⁵ Kilumbo kalunogela lukolo lwetu, katuzengela ngʼanda ya nhambiko.”

⁶ Yesu kailongoza hamonga nawo; viyakalile behi na ngʼanda yake, yuja akida katuma mbwiga zake wamulongele, “Mndewa, sikuugaduke, kwa mzoko niye sigambile gweye wingile hasi mkingʼanda changu.

⁷ Avo niibona mwenyecho havilumbile kukuwinza, komu longa mbuli iyeka, na heyo mwanangu kohona.

⁸ Kilumbo na niye na munhu nikigwa hasi ya ulwamu, mwene asikali wali hasi yangu; avo nihamulongela yuno, Chola, kochola; hebu yuja, Izo, kokwiza; au nihamulagiza mtumigwa wangu, Tenda vino, kotenda.”

⁹ Yesu viyagahulike gano, kakanganya kawahindukila waja wanhu wailongoze nayo, kalonga, “Nomulongelani, muno mwa Israeli sinakona munhu mwene ngogelo nghulu kamba ino.”

¹⁰ Na waja watumigwe vuwabwelile ukaye, wamvika nyakadala ija mgima.

Mmhale wa Naini kabwezwa mgima

¹¹ Yomala kagoga nzila yogenda kiwambo kikemigwa Naini; wanahina wake na matinghano makulu welongoza ha-monga na heyo.

¹² Avija viyakwenhukile umulango wa ikiwambo, hakala na mtufi usoligwe ugalwa kuzikwa; mmhale hiyo kayeka, na mamo wake kakala mke filwa yali bule mkasano; na wanhu bwando wa diwambo welongoza hamonga na umtufi.

¹³ Mndewa viyamuwene, kamonela bazi kamulongela, “Sikuulile!”

¹⁴ Kagenda yokwenhuka bahibehi na umtufi, yomana kadikwasa ditundu; waja wadigalile wamana kwima; kalonga, “Go mmhale, nokulongela, lamka!”

¹⁵ Aija yakalile yafile kakala ukala, kandusa kulonga; yomana kumfumbika imamo wake.

¹⁶ Woga diwagoga wose wagawene manzonza kamba gaja, wamtuniza Mulungu wolonga, “Mlaguzi mkulu kalawilila kumwetu, Mulungu kawezila wanhu wake.”

¹⁷ Simulizi zija zenela Uyuda wose na muziisi za hamgwazo.

Kinghwaso cha Yohana Msingula wanhu; Utulandagu wa Yohana

¹⁸ Wanahina wa Yohana Msingula wanhu wampetela mbuli zose za Yesu, baho kakema wanahina wake wabili.

¹⁹ Kawatuma kwa Yesu giladi wamuuze, “Gweye yuyo yuja Yokwiza, hebu tumbete iyagwe?”

²⁰ Wasenga waja vuwavikile kumwake walonga, “Yohana Msingula wanhu katutuma tukuuze, Gweye yuyo yuja Yokwiza, hebu tumbete iyagwe?”

²¹ Na kipigiti kija kakala yohonya watamu bwando wolumwa, wene mizuka, na vimbugumbugu bwando kawamamazula meso.

²² Kedika kawalongela, “Bweleni mkampetele Yohana gamuwene hano na gamuhulike; vimbugumbugu wolola, mbetembete wotembela, wene dikulu wohonyigwa, watulike magutwi wohulika, wafile wozuswa, na wasusuwale wopetelwa mbuli inogile.

²³ Komu kamota munhu ija yalekile kwihilwa kumwangu.”

²⁴ Wasenga wa Yohana vuwacholile, kasonga kuwapetela madale ga wanhu simulizi za Yohana yolonga, “Mlawa mgenda kuluwala kulola choni? misanze itigiswa na beho?

²⁵ Hebu mlawa mgenda kulola choni? – munhu yavalile miguwo mitali? Lola wanhu wovala miguwo inogile, woja goya, wamumo mzingʼanda za watawala!

²⁶ Komu mlawa mgenda kulola choni? – kumulola Mlaguzi? Ona nomulongelani, aheyo yobanza Mlaguzi.

²⁷ Hiyo yuyo yandikilwe, Lola nomgala Msenga wangu hakihanga chako, yonda yaigolose nzila yako hakihanga chako.

²⁸ Niye nomulongelani, hanalawilila munhu yaleligwe na mtwanzi, yawe mkulu kubanza Yohana Msingula wanhu; komu yali imdodo mundewa wa Mulungu yuyo mkulu kubita heyo.

²⁹ Vuwagahulike wanhu wose na wawila kodi, wamvumila Mulungu yuyo mwene ihoko; kwa mzoko wakala wasingulwe na Yohana.

³⁰ Bali Mafariseo na Wana Nzuma walema manogelwa ga Mulungu gayawalagize, avo hawasingule.

³¹ Kalonga, Noulinganiza na choni wanhu wa mlelo uno, kabili wogamba na yalihi?

³² Wagamba na wana wakalile hagulilo, woikema wenyego kwa wenyego, wolonga, Tumtowelani vifyengwe, hamvinile; twiyalala, na mweye hamulilile.

³³ Kwa mzoko Yohana keza, hadile mgate wala hangʼwile ugimbi, na mweye mulonga, Kana mizuka!

³⁴ Mwanage Munhu keza yoja yongʼwa, na mweye molonga, Lola munhu mja vihile yuno, mngʼwa ugimbi, mbwiga wao wawila kodi na wene matozo.

³⁵ Na nghungwe ya Mulungu yohuma mkitala yogamba mzihoko kwa wana wake wose.”

Yesu kamgomela mtwanzi mgoni

³⁶ Kukala na imonga wa Mafariseo, kamgomela Yesu, yaje chakuja kumwake; kengila mngʼanda ya ija Fariseo, kakala hasi.

³⁷ Mhunde lola mtwanzi imonga wa kiwambo kikija yakalile na matozo, viyahulike kamba ka aho yokala hasi kugati ja yuja Fariseo, yomana kugala nyhupa ya mngʼalangʼazo ina mavuta ga marhamu ganunghaga goya.

³⁸ Kema hakisogo behi na migulu yake kuno yolila, kasonga kumdwendekezela mahozi mmigulu, kaihangusa na mvili zake za mpala, kuno yomnonelanonela mmigulu, yoibakaza gamavuta gamarhamu.

³⁹ Yuja Fariseo yamgoneke viyawene vija, kalonga munda na kitupe, “Munhu ino kamba yawile Mlaguzi, yahamtangile ino yomkwasa iyo yalihi, kabili ka vilihi mtwanzi ino, kana matozo!”

⁴⁰ Yesu kana mulomo kamulongela, “Simoni, nina mbuli nolonda kukupetela.” Kalonga, “Mkulufunzi, longa!”

⁴¹ “Munhu imonga mkopesha wanhu kakala yowila wanhu wabili, imonga kakala yomuwila mizo mitano ya mhiya, waikabili milongo mitano.

⁴² Na hewo vuwakalile bule cha ukumuliha, walemelwa, kawalekesela didenyi waja wose wabili; gesa tanhu kwa waja wose wabili, yalihi yonda yamnogele nghani?”

⁴³ Simoni kedika kalonga, “Nyagiza ayuja yalekelwe zija zili bwando.” Yesu kamulongela, “Kulamula goya.”

⁴⁴ Kamuhindukila yuja mtwanzi, kamulongela Simoni, “Komona mtwanzi ino? Ningila mngʼanda yako, gweye huninghile mazi ga kugela nhende, komu yuno mtwanzi kandagazila mahozi mmagulu gangu na kunihangusa kwa mvili za ditwi jake.

⁴⁵ Gweye hunonele, bali ino haja haningile, halekile kwinonela nghani migulu yangu.

⁴⁶ Humbakile mavuta mditwi, komu ino yuyo yambakaze magulu gangu marhamu.

⁴⁷ Avo kwa mzoko nokulongela, Gasegezwa matozo gake gali bwando, kilumbo kanogela nghani; bali yalekeselwe na kidodo, ayo kanogela kidodo.”

⁴⁸ Ilawa baho kamulongela yuja imtwanzi, “Nhozo zako sisegezwa.”

⁴⁹ Bahaja waja wakalile hamonga na heyo, wakala wogesa mmoyo mmwao, “Yali nani iyo kileka yasegeze matozo?”

⁵⁰ Kamulongela yuja mtwanzi, “Nhogo zako zikuhonya, genda na mbeho.”