Luka 6 - Lagano da Isambi

Kubena lukuso lwa uhemba

¹ Ilawa baho viyabitile mmigunda siku ya ukuhumula, wanahina wake wabena lukuso lwa uhemba, waluhugusa mmikono yao, wamana kuuja.

² Mafariseo wayagwe walonga, “Habali motenda mbuli hailingane kusanghanwa siku ja Sabato?”

³ Yesu kedika kawalongela, “Hamsomile Daudi hamonga na wayage viyakalile na nzala, viyatendile?

⁴ Avija viyengile mngʼanda ya Mulungu na kuisola imigate ya nhambiko, kaija kawengha na wayage, vyemela kuija migate ija iha, komu Wakulu wa Nhambiko wayeka.”

⁵ Kawalongela, “Mwanage Munhu yuyo Mndewa wa Sabato.”

Mkono uholole uhonyigwa siku ya sabato

⁶ Ikala siku iyagwe ya sabato kengila mkanisa, kalanguliza; mumuja mkala na munhu, senhambo mkono wake wa ukulume uholola.

⁷ Avo Wana Nzuma na Mafariseo wakala womsepa kamba yahamuhonya siku ja ukuhumula, wagoge mbuli ya kumgela mkitala.

⁸ Bali heyo kazitanga ngelegeza zao, kamulongela yuja munhu mwene mkono uholole, “Inuka ima wima hagati!” Kenuka kema hagati.

⁹ Yesu kawalongela, “Nowauzani mweye, ilumba siku ya ukuhumula kutenda ganogile au kutenda gehile? kuhonya loho ya munhu au kuibananga?”

¹⁰ Kawabunhulila meso wose wali baho, kamulongela, “Golosa mkono wako!” Kaugolosa uja mkono, ubwela mgima.

¹¹ Na hewo wagwa lusango kamba wana kikwale, waiuzagiza wenyego kwa wenyego, vonda wamtendele Yesu.

Watumigwa wasagulwe

¹² Ikala siku zija Yesu kalawa kagenda kuvigongo kumpula Tata wake, kagonelela ikilo ngima yosali.

¹³ Viivikile imitondo, kawakema wanahina wake, kawasagula longo dimwe na wabili, kawengha tagwa Watumigwa.

¹⁴ Simoni iyamkemile Petro, na Andrea ndugu yake; Yakobo na Yohana, Filipo na Bartolomeo;

¹⁵ Mateo na Tomaso, Yakobo mwanage Alfeo na Simoni yakemigwe Zelote;

¹⁶ Yuda mwanage Yakobo na Yuda Iskariote yuja yonda yamuhonze.

¹⁷ Kahulumuka hamonga na hewo, kema hamtunha, aho hakala na dale gima da wanahina wake bwando, na wanhu wayagwe bwando nghani, walawile Uyuda yose na Yerusalemu na mhwani ya Tiro na Sidoni.

¹⁸ Weza giladi wamtegeleze na kuhonyigwa mitamu yao; na waja wogazigwa na mizuka michapalisi wahonyezwa.

¹⁹ Waja wanhu wose wasulukila kumkwasa, kwa mzoko mhiko zilawa kumwake, ziwahonya wanhu.

Wamota iwo walihi

²⁰ Avo viyenule meso gake, kawona wanahina wake kalonga, “Mmotile iyo mwemwe muli wakiwa, kilumbo undewa wa Mulungu uwo wenu.

²¹ Mmotile iyo mwemwe mkona nzala vino, kilumbo kwiza mokwiguta. Mmotile iyo mwemwe, vino vumulila, kilumbo kwiza moseka.

²² Mmotile iyo mwemwe vonda mwihilwe na wanhu na kubagulwa kumwao, kuno wowaliga na kugalema matagwa genu kamba geha, kilumbo cha twaga ja Mwana wa Munhu.

²³ Siku dija dengheni na kuvina kwa mzoko kitumetume chenu kikulu kuulanga; avo vivo tata zao vuwawatendele Watulandagu.

²⁴ Komu mojona mweye wene mhiya, kilumbo mziga kubokela hembekezo jenu.

²⁵ Mojona mweye mwigute sambi, kilumbo kwiza moyona nzala. Mojona na mweye mseka sambi, kilumbo kwiza mosusuwala na kulila.

²⁶ Mojona na mweye muhatunilwa na wanhu wose, kilumbo avo vivo tata zao vuwawatendele malungu wa uvwizi.

Wanogeleni iwandumu

²⁷ Komu mweye mnhegeleze niye, nomulagizani, Wanogeleni wandumu zenu, watendeleni ganogile waja wamwihileni!

²⁸ Wamotezeni waja womdumilizani, watambikileni waja womgazani!

²⁹ Kamba munhu yahakutowa kanza dimonga, muhindusile na daikabili, yaditowe na dijo; na heyo yakubokile nghanzu yako, sikuumgomese yasole na idigwanda.

³⁰ Yokupula mwinghe, na yakubokile mali gako, sikuumuwile kabili yakubwezele.

³¹ Gose gomulonda mtendelwe na wanhu, na mweye mwanduse kuwatendela kamba vivo.

³² Kilumbo muhawanogela waja wamnogeleni mweye, avo mowengha choni? Vilema wene matozo nawo wanogelaga waja wawanogele.

³³ Kabili muhawatendela ganogile waja wamtendelani ganogile mweye, avo mowengha choni? Vilema wene matozo na hewo watendaga kamba vivo.

³⁴ Kabili muhawakopesha wanhu, kuno mbeta wambwezeleni mweye, avo mowengha choni? Vilema wene matozo na hewo wakopeshaga wene matozo wayao, giladi wabwezelwe vivija.

³⁵ Komu mweye wanogeleni waja wamwihileni na kuwatendela ganogile; kopesheni wanhu, sikumbete kubwezelwa kinhu; aho kitumetume chenu chokuwa kikulu, na mweye mogalamka wanage yuja Yali Uchana nghani, kilumbo na Heyo kowagwelela waja wene nghimwa na ubananzi.

³⁶ Avo mgalamke wene bazi kamba Tata wenu viyali mwene bazi!

Sikuuwataguse wayagwe

³⁷ Sikumtaguse na mweye honda mtaguswe; kabili sikumdununze munhu, na mweye honda mdununzwe; lekeseni, na mweye molekeswa.

³⁸ Goleni, na mweye mogwelelwa; ningo imemile bwadu, idomeligwe isigiswe na kwitika, wanhu womwinghani hamhambaga yenu; kilumbo ningo ija yumuwalingila wayenu, iyo yonda mulingilwe na mweye.”

³⁹ Kawalongela hala dino: “Kimbugumbugu kodaha kulongoza kimbugumbugu miyage? Honda wengile mkolongo wose wabili?

⁴⁰ Mwanahina hambanza mkulufunzi wake, komu ija yakolele malangulizo, kogamba kamba mkulufunzi wake.

⁴¹ Habali ukilola kibale kili mdisiso ja ndugu yako, bali banhi dili msiso jako mwenyecho hujona?

⁴² Bule komulongelaze ndugu yako, Ndeka, ndugu yangu, nikilave ikibale kili msiso jako! na gweye banhi dili msiso jako mwenyecho hujona? Kwa mzenzeleganye gweye, dilave tanhu ajo dibanhi dili msiso jako mwenyecho, kileka ulole goya, vonda ulave acho ikibale kili himo msiso ja ndugu yako!

Biki na mujo wake

⁴³ Haduhu biki dinogile dilelaga mujo wihile, kabili haduhu biki dihile dilelaga mujo unogile.

⁴⁴ Biki jojose ditangikaga mmujo wake wenyego; kilumbo hawabawa nghuyu mmilengeja, hebu kulundiza mitongoni mmizomola.

⁴⁵ Munhu yanogile kalavaga ganogile mbikilo jake dinogile dili mmoyo mmwake, bali munhu yehile kalavaga gehile mbikilo jake dihile; kilumbo mulomo ulongaga gamemile mmoyo mmwake.

Kwika mizengo hakigongo

⁴⁶ Monghemaze Mndewa, Mndewa, wala hamsanghana ganimlagizani?

⁴⁷ Munhu yonizila niye na kutegeleza malonga gangu, kuno yagasanghana, nomulagusilani vonda yagalamke.

⁴⁸ Kogalamka munhu yazengile ngʼanda, yahimbule hasi goya na kwika mizengo uchana hakigongo; avija vidingile gubiko da mazi, na zanda dihulumukila ngʼanda ija kwa mhiko, hadidahile kwitinghisa, kwa mzoko izengigwa vinogile.

⁴⁹ Komu yuja yomhulika, imala hagasanghana, nomgamba na munhu yazengile ngʼanda hasi hali bule na lukwambaza; avija zanda vidihulumuke kwa mhiko, mhunde baho igwa, imana kubomoka ngʼanda ija nghani.”