Luka 5 - Lagano da Isambi

Unzonza wa Petro kuvuwa somba bwando

¹ Kukala na madale gamemile vuwomfingafinga, wotegeleza mbuli ya Mulungu, heyo kakala yemile mmambwegambwega mwa dilamba ja Genesareti.

² Kazona ngalawa mbili zikalile hamngwazo ya dilamba; waja wavuwa somba wakalile wahulumuka muna gamazi, wosunha nyavu zawo.

³ Kengila mngalawa imonga ikalile yake Simoni, kampula yaikwenhuse mhunde; kakala hasi yowafunza matinghanilo muna ingalawa.

⁴ Viyamalile kulonga kamulongela Simoni, “Kwenhusa uvike hagatigati, muhumuluse nyavu zenu mvuwe!”

⁵ Simoni kedika yolonga, “Mndewa, tugaya tweye kilo kigima usiku tobo, hatupatile kinhu; bali kwa longa jako nozihumulusa zino zinyavu.”

⁶ Vuwatendile kamba hivo, wamemeza misomba bwando, kumwande nyavu zawo zisonga kugedeka.

⁷ Wawahungila mkono wayawo wali mngalawa iyagwe, weze kuwataza; wamana kugenda kukuja, wazimemeza zose ngalawa mbili, zisonga kudidimila.

⁸ Simoni Petro viyagawene gano, yomana kugwa hamavindi ga Yesu yolonga, “Halawe hamwangu, Mndewa, niye na matozo!”

⁹ Kilumbo kingudemo kimgoga heyo na wose wakalile hamonga na heyo, kwa sosombi ja somba bwando wawapatile.

¹⁰ Yakobo na Yohana senhambo wana wa Zebedeo, waja wakalile woitaza na Simoni. Na Yesu kamulongela Simoni, “Sikuudumbe; lulawile baha kokala na kazi ya kuvuwa wanhu.”

¹¹ Wamana kukwega ngalawa zawo mhwani, waleka zose, wamkoleleza.

Mwene dikulu kahona

¹² Na heyo viyakalile kuja kuna viwambo, kukala na munhu yenele dikulu lukuli lose; aluja luyamuwene Yesu, kamgwila kingubanguba, kampula yolonga, “Mndewa, uhalonda kodaha kumhonya.”

¹³ Yesu kagolosa mkono, kamkwasa kalonga, “Nolonda uhone!” Mhunde dikulu dimulawa.

¹⁴ Yomala kamulagiza, “Sikuumpetele munhu, komu chola umulagusile mkulu wa nhambiko, ukalave vinhu vya nhosa kilumbo cha ukuhona, kamba viyalagize Mose, viwe utango kumwawo!”

¹⁵ Komu simulizi zake zenela nghani, vyemela madale bwando wammemela, giladi wamtegeleze na kuhonyigwa mitamu yao.

¹⁶ Na heyo kakala yokinega na wanhu, kagenda hanhu halibule na wanhu, giladi yampule Tataake.

Mtamu wa kuholola kasegezelwa matozo

¹⁷ Siku dimonga viyakalile yolanguliza, Mafariseo na Wana Nzuma wakala bahaja, walawa viwambo vyose vya Galilea na Uyuda na Yerusalemu; na mhiko za Mulungu za kuhonya wanhu zikala hamonga na heyo.

¹⁸ Mhunde weza wanhu, wamgala miyawo yatambalale mulusazi, mwene kuholola, na hewo walonda kumwingiza mngʼanda, wamwike habehi na Yesu.

¹⁹ Bali hawawene ulegeho wa kwingila kilumbo cha wanhu bwando, wamana kukwela kukiswili cha ingʼanda wasegeza mabati, wamuhumulusa hamonga na lusazi hagati, behi na Yesu.

²⁰ Yesu viyaiwene ngogelo yawo, kalonga, “Mbwiga, matozo gako gasegezwa!”

²¹ Baho Wana Nzuma na Mafariseo wandusa kwiuzagiza, “Iyo yalihi ino yofukula? Yalihi yodaha kusegeza matozo, si Mulungu yaiyeka?”

²² Avija Yesu viyamanyile magelegeza gawo, kedika kawalongela, “Habali muna vinghwaso mmiyoyo mmwenu?

²³ Kibuhile kilihi, kulonga Kusegezelwa matozo gako, hebu kulonga, Inuka ugende?

²⁴ Komu nolonda mvitange kamba Mwana wa Munhu kana magweka muisi ga kusegeza matozo;” baho yamulongele ija mtamu wa ukuholola, “Nokulongela, inuka, widwike lusazi lwako, ugende kungʼanda yako!”

²⁵ Mhunde kenuka hameso gao, kaidikwa ulusazi luyawasile, kachola kungʼanda yake, kuno yomtuniza Mulungu.

²⁶ Baho wose wasinhuka nghani, wamtunila Mulungu, wagwa kingwaya wolonga, “Lelo tuwona unzonza hautangikaga!”

Lawi kakemigwa; gomba da kuleka ukuja

²⁷ Imala baho Yesu kalawa hiko, kamona muwila kodi yakalile yowila kodi, tagwa jake Lawi, kamulongela, “Ngholeleza!”

²⁸ Yomana kuleka vyose, kenuka, kamkoleleza.

²⁹ Aija Lawi kamgomela mandiya bwando mngʼanda yake, na wawila kodi na wayawo bwando weza, wakala hamonga hana gamandiya.

³⁰ Mafariseo wayagwe na Wana Nzuma wao wasonga kizugumo, wawalongela wanahina wake, “Habali muja na kungʼwa hamonga na wawila kodi na wene matozo?”

³¹ Yesu kedika kawalongela, “Wanhu wagima hawalonda mganga, komu waja wolumwa.

³² Niye sizile kukema wene ihoko, bali wene matozo giladi wagaluke.”

³³ Baho wayagwe wamulongela, “Lola wanahina wa Yohana na wa Mafariseo vuwalekaga ukuja miyanza bwando na kutenda sala, bali wanahina wako wajaga na kungʼwa.”

³⁴ Yesu kawedika, “He, wagonekwe hana ihalusi modaha kuwagomesa sikuwaje, kamba Msola mhambe yahali hamonga na hewo?

³⁵ Komu mazuwa gokwiza, aho honda wasegezelwa Msola mhambe; mazuwa ago baho vonda waleke ukuja.”

³⁶ Kawalongela hala dino: “Haduhu munhu yakanhe kinzazi cha nguwo ya sambi na kukigela mnguwo ya umwaka; kamba yahagela, kija kinzazi cha sambi kwiza chodega na inguwo ya umwaka, wala cha umwaka hakiilumba na kija cha sambi.

³⁷ Kabili haduhu munhu yagelaga ugimbi wa sambi mmiyandulo ya umwaka. Kwiza kamba yahagela, aija miyandulo ya umwaka yotulika, ugimbi wokwitika, na miyandulo yobanangika.

³⁸ Komu wagelaga ugimbi wa sambi mmiyandulo ya sambi.

³⁹ Bali haduhu munhu yangʼwaga ugimbi wa umwaka, yalonde wa isambi, kilumbo kolonga, Uja wa umwaka uwo ukolaga.”