Luka 3 - Lagano da Isambi

Usenga wa Yohana Msingula wanhu

¹ Luyakalile Mtawala Kaisari Tiberio yotawala Roma mwaka wa kumi na nhano, na Pontio Pilato hayakalile Luwali wa Uyuda, mndewa Herode katawala Galilea, na Filipo ndugu yake katawala isi ya Iturea na Trakoniti, na Lisania katawala Abilene;

² milongo ya Watambika Wakulu Anasi na Kayafa, Longa da Mulungu dimwizila Yohana mwanage Zakariya kuluwala.

³ Na heyo kavika isi yose ili mmambwegambwega ga lwanda lwa Yordani, yowapetela wanhu wasingulwe na kuleka gehile, giladi wasegezelwe matozo.

⁴ Kamba vigandikigwe mkitabu cha Mtulandagu Yesaya yolonga, “Dizwi ja munhu yotowa nyangi muluwala, Isanghaneni goya nzila ya Bwana, ugoloseni ubito wake!

⁵ Vizanda vyose vikusilwe, na vigongo na visugulu vihimbuligwe. Haja haveduke hagoloswe, hali na imikolongo hatelebuswe!

⁶ Na wose wene zinghuli wowona ukombozi wa Mulungu.”

⁷ Ilawa baho madale bwando ga wanhu vuwamgendele giladi yawasingule, heyo kawalongela, “Mweye mlelo wa mizoka, iyo yalihi yamfunzileni kwinega lusango londa lwize?

⁸ Leleni mujo wa mgaluko wonda uwe usindi unogile, wala sukumgese mmiyoyo mmwenu mulonge, Tweye tuna tata wetu yuyo Abrahamu; kilumbo heyo nomulongelani, Mulungu kodaha kumlavila Abrahamu wana mumuno muna gamabwe gano.

⁹ Kabili lelo vino inhemo ikigwa mdisina da dibiki; kamba biki hadilelile mujo unogile, dokanhigwa dokwasigwa hamoto.”

¹⁰ Gaja madale ga wanhu wamuuza wolonga, “Avo tutende vilihi?”

¹¹ Kedika yowalongela, “Yali na nghanzu mbili, yamgwelele yali bule, na heyo yali na ndigwa yatende vivo.”

¹² Wawila kodi weza kilumbo wasingulwe, wamuuza, “Mkulufunzi, na tweye tutendeze?”

¹³ Kawalongela, “Sikumsole kodi nghani kubanza vumulagizwe.”

¹⁴ Asikali na hewo weza wamuuza, “Na tweye tutendeze?” Kawalongela, “Sikumumgudemeze munhu wala kumuhimbila, komu mwenele na kitumetume chenu!”

¹⁵ Wanhu vuwakalile wobeta mbuli vonda zilawilile, wagelegeza wose mmiyoyo yao kamba Yohana hambwe yuyo Kristo;

¹⁶ Yohana kedika kawalongela wose, “Niye nomsingulani na mazi, komu ayo yokwiza yali mgaga kubita niye, na niye sidaha kumdoholela nzabi za vilatu, heyo komsingulani mloho ingʼalile, kabili mmoto.

¹⁷ Heyo lungo lwake lwa kubetela kanalo mumkono wake, kofagila nghani lubuga lwake, koilundiza ndigwa yake kukano jake, bali imikupi koigela hamoto hauzimikaga.”

¹⁸ Gayagwe bwando kawapetela waja iwanhu yowazuma.

¹⁹ Bali mndewa Herode, kwa vija Yohana viyamkomhokele kamba havinogile kumsola Herodia sano ja ndugu yake, na kusanghana gehile gayagwe bwando,

²⁰ kongezela gehile gake, kamfunga Yohana kolokoloni.

Yesu kabatizwa

²¹ Siku zija wanhu wose vuwasingulwe na Yohana, na heyo Yesu viyabatizwe, viyakalile yompula Mulungu, baho ulanga ugubuke.

²² Na Loho Yangʼalile kamuhumulukila, yagambile lukuli kamba lwa nziwa, na dizwi dilawa kuulanga dilonga, “Gweye gwegwe Mwanangu Inogele, nogelwa nghani nagwe.”

Kitabu cha lukolo lwake

²³ Na heyo Yesu viyasongile kulanguliza, kakala wa miyaka kamba milongo midatu, na wanhu wamgelegeza yuyo mwanage Yosefu, mwanage Eli,

²⁴ mwanage Matati, mwanage Lawi, mwanage Melki, mwanage Yana, mwanage Yosefu,

²⁵ mwanage Matatia, mwanage Amosi, mwanage Nahumu, mwanage Esli, mwanage Nagai,

²⁶ mwanage Maati, mwanage Matatia, mwanage Semei, mwanage Yosefu, mwanage Yuda;

²⁷ mwanage Toana, mwanage Resa, mwanage Zerubabeli, mwanage Shealtieli, mwanage Neri,

²⁸ mwanage Melki, mwanage Adi, mwanage Kosamu, mwanage Elmadamu, mwanage Eri,

²⁹ mwanage Yoshua, mwanage Eliezeri, mwanage Yorimu, mwanage Matati, mwanage Lawi,

³⁰ mwanage Simeoni, mwanage Yuda, mwanage Yosefu, mwanage Yonamu, mwanage Eliakimu,

³¹ mwanage Melea, mwanage Mena, mwanage Matatha, mwanage Natani, mwanage Daudi,

³² mwanage Yese, mwanage Obedi, mwanage Boazi, mwanage Salmoni, mwanage Nashoni,

³³ mwanage Aminadabu, mwanage Aramu, mwanage Hesroni, mwanage Peresi, mwanage Yuda,

³⁴ mwanage Yakobo, mwanage Isaka, mwanage Abrahamu, mwanage Tera, mwanage Nahori,

³⁵ mwanage Serugi, mwanage Ragau, mwanage Pelegi, mwanage Eberi, mwanage Sala,

³⁶ mwanage Kenani, mwanage Arfaksadi, mwanage Shemu, mwanage Noa, mwanage Lameki,

³⁷ mwanage Metusela, mwanage Henoki, mwanage Yaredi, mwanage Mahalaleli, mwanage Kenani,

³⁸ mwanage Enoshi, mwanage Seti, mwanage Adamu, na heyo wa Mulungu.