Luka 24 - Lagano da Isambi

Watwanzi na Petro wakagula dikabuli ja Yesu

¹ Disiku ja ichanduso ja juma, imitondo nghani, wasola na mavuta gaja ganogile gawagongomanye, wagenda kuli ikabuli.

² Wajona dija idibwe dikwenhusigwa kulawa ha umulango wa ikabuli.

³ Vuwengile hawauwene mtufi wa Mndewa Yesu.

⁴ Wakanganya nghani na unzonza uja; mhunde walawililwa na wanhu wabili wavalile nguwo zimelemetaga.

⁵ Aluja luwengilwe na ikidumbo wavinamiza vihanga vyao hasi, baho waja wawalongela, “Impile momzahila kwa wafile?

⁶ Kamduhu muno, heyo kazuswa; geseni gaja gayamulongeleni, viyakalile kuja Galilea!

⁷ Viyalongile, Mwana wa Munhu vimgamba yageligwe mmikono ya wanhu wene gamatozo, wamuwambe mdibiki; ilawa baho siku ja ikadatu kozuka.”

⁸ Bahaja wamana kugagesa malonga gake.

⁹ Wabwela kulawa kuna dikabuli, wawapetela waja Mulongo umwe na Imonga, na wayagwe wose gaja gose.

¹⁰ Awo wawapetele wanahina mbuli zija wakala Maria Magdalena na Yoana na Maria mamo wake Yakobo, na wayagwe hamonga nawo.

¹¹ Komu womana kugelegeza mbuli zino zogamba mchalango, hawazivumile.

¹² Petro kenuka yomana kukimbila, kavika kuli dikabuli, kainamila kasungulila, kayona isanda iiyeka; ilawa baho kagenda na zake, kuno yokangawila munda na kitupe dija diyawene.

Wanahina wabili wetinghana na Yesu mnzila Emao

¹³ Siku ija wayawo wabili wakala mmwanza, weza kukiwambo kikemagwa Emao; kamba munhu yahalawa na Yerusalemu, uchozi wake zovika saa mbili.

¹⁴ Na hewo wakala wokipetela gaja gose gakalile galawilile.

¹⁵ Avija vuwokala wousimulila kuno wokiuza, Yesu mwenyecho kawakwenhukila, kachola hamonga nawo.

¹⁶ Komu meso gawo gakala kamba gagubikwa, hawadahile kumtambula.

¹⁷ Vivo yawauzile, “Mbuli gani hizo zimsimulila hano hanzila?” Womana kwima, kuno wokunza vihanga.

¹⁸ Miyage imonga twaga jake Kleofa, kedika kamulongela, “Gweye uli yeka kwa muhenza muna Yerusalemu, uleke kugatanga gali muno siku zino?”

¹⁹ Kawauza, “Galihi?” Wamulongela, “Mbuli za Yesu wa Nazareti; hiyo kakala Tulandagu mwene mhiko za kusanghana na za kulonga ha Mulungu na wanhu wose.

²⁰ Avija Watambika Wakulu na Wakulu zetu vuwamgela mkitala cha kumkoma, wamuwamba mdibiki.

²¹ Na tweye tukala tutamanila kamba heyo yuyo yonda yawakombole Waisraeli; viyemela lelo siku ja ikadatu, vizisongile kulawilia mbuli hizo.

²² Kabili kuna watwanzi wa kumwetu, awo watusinhusa, wagendile hana dikabuli imitondo nghani, hawauwene mtufi wake.

²³ Wabwela walonga kamba walawililwa na malaika, walongile kamba mgima.

²⁴ Na wayagwe wakalile hamonga na tweye wachola kuli ikabuli, wavona vivija kamba waja watwanzi vuwalongile, komu heyo hawamuwene.”

²⁵ Kawalongela, “Mweye hamvitangile, wene miyoyo migaga ya kuleka kutogola gose gawalongile Watulandagu.

²⁶ Che, havimwandame Kristo kugeligwa mumgaduko na kwingila kuundewa wake?

²⁷ Kasonga kuwalongela kulawa Mose na Watulandagu wose, kawapetela muna gamandiko gose mbuli zija zimwandame mwenyecho.”

²⁸ Wamkwenhukila kija kiwambo kiwakalile wochola, na heyo kaitenda kamba konda kubasiliza.

²⁹ Komu wamuhembela nghani walonga, “Kala hamonga na tweye, kwa mzoko imisi imala, zuwa diswa.” Kengila mngʼanda kakala hamonga nawo.

³⁰ Aluja luyakalile nawo hana gamandiya, kasola mgate kaupulila, kaumogola, kawengha.

³¹ Baho gabunzuka meso gawo, wamtanga; mhunde kayangayuka havihanga vyao.

³² Wamana kuilongela, “Che, mizoyo yetu kileka mana ikala igungʼunda mgati, haja hayakalile yolonga na tweye mzila na kutupetela jandiko?”

³³ Wasegela kipigiti kikija, wabwela Yerusalemu, wawavika waja Mulongo umwe na Imwe, wailundiza na hewo wakalile hamonga nawo.

³⁴ Walonga, “Mndewa kazuka kwelikweli! Na heyo kamulawila Simoni.”

³⁵ Na hewo wawapetela mbuli zose na unzonza uja wa mnzila, na vija viyailavilize kumwao haja hayaumegile umgate.

Yesu yazukile kawalawilila wanahina wose

³⁶ Lola, aluja luwokala osimulila mbuli zija, Yesu mwenyecho kema zugaga hagatigati yawo, kawalongela, “Tindiwalo na diwe kumwenu!”

³⁷ Wasinhuka wadumba nghani, wagiza mzimu uwengile.

³⁸ Kawalongela, “Vilihi vumdungwadungwa hivo? Kabili habali ngelegeza kamba hizo zomwingilani mmoyo?

³⁹ Galoleni maganza gangu na magulu gangu mvitange, Iyo nene mwenyecho! Mbabaseni mulole, kilumbo mzimu kabule lukuli lwa mnofu hebu mizege, kamba vumbona niye vinili nayo.”

⁴⁰ Viyamalile kulonga higo, ka walagusila maganza na migulu.

⁴¹ Komu vuwakalile bado hawanatogola, viyemela wodenghelela kuno wokanganya, kawalongela, “Munacho chakuja hano?”

⁴² Baho wamwinghile kibendu cha somba yakalangigwe. Kakisola, kakija hakihanga chao.

⁴⁴ Imala baho kawalongela, “Gano gago malonga gangu ganimulongeleni, vinikalile hamonga na mweye, kamba gavikizwe gose nyandikilwe muna Inzuma ya Mose na Walaguzi na Ndenghelelo.”

⁴⁵ Baho kawagubulila nzewele zao, wadimanye jandiko.

⁴⁶ Kawalongela, “Vivo yandikigwe kamba Kristo kogaduswa na kuzuka siku ja ikadatu.

⁴⁷ Avo ngholo zose zibwililisilwe Longa kwa twaga jake, wagaluke na kusegezelwa matozo, kusongela Yerusalemu.

⁴⁸ Na mweye mwemwe wakalangama wa mbuli zino.

⁴⁹ Loleni nomgalilani kilaga cha Tata wangu; komu kaleni muno mkiwambo kwiza mgeligwe mhiko kulawa uchana!”

Yesu kakwela kuulanga yomoteza wanahina

⁵⁰ Imala baho kalawa nawo, kawagala Betania, aho kenula mikono yake, kawamoteza.

⁵¹ Aluja luyakalile yowamoteza, yomana kwinega nawo, kasoligwa uchana kuulanga.

⁵² Aho baho wamfugamile mavindi; imala baho wabwela Yerusalemu, kuno wodenghelela nghani.

⁵³ Na hewo mazuwa gose wakala mdihekalu womtuniza Mulungu.