Luka 23 - Lagano da Isambi

Yesu kagalwa habehi ya Pilato na Herode

¹ Baho dale gima da Nhaguso Nghulu wenuka, wamgala kwa Pilato.

² Wasonga kumtagusa walonga, “Tumona yuno kobananga lukolo lwetu, kowagomesa wanhu sukuwamwinghe Mtawala Kaisari kodi, ilawa baho kailongaga kamba heyo iyo Mndewa Kristo.”

³ Pilato kamuuza kalonga, “Hambwe gweye gwegwe mndewa wa Wayuda?” Kedika kamulongela, “Gweye vivo ulonga.”

⁴ Pilato kawalongela Watambika Wakulu na madale ga wanhu, “Siyona mbuli ihile kwa munhu yuno.”

⁵ Hewo wananahila nghani walonga, “Kawalongelaga undunyu iwanhu, yahawalanguliza lulawile Uyuda kose na Galilea yose mpaka kuno.”

⁶ Pilato viyagahulike higo, kauza kamba munhu yuno kalawa Galilea?

⁷ Na viyagapatile goya kamba heyo kalawa isi ya Mtawala Herode, kamgala kwa Herode, kwa mzoko siku zija heyo kakala Yerusalemu.

⁸ Herode viyamuwene Yesu, kadenghelela nghani, kilumbo kasulukila kumona mazuwa bwando, kilumbo kazihulika mbuli zake, kabili kakala yolonda kulola vilolomboto vonda visanghanwe na heyo.

⁹ Kamuuza mbuli bwando, Yesu hedike mbuli.

¹⁰ Bali Watambika Wakulu na Wananzuma wema wima, wamtagusa hakulu nghani.

¹¹ Baho Herode hamonga na Wakulu wa asikali wamdawalila, wamtendela mchalango; wamvaza miguwo inogile imelemetaga, imala baho kambweza kwa Pilato.

¹² Disiku didija Herode na Pilato waitema ubwiga, kwa mzoko aho haichanduso wakala waihile.

Kitala cha Pilato, kamfungulila Barabba

¹³ Pilato kawakema watambika wakulu, na iwavyele, na madale ga wanhu walundike.

¹⁴ Kawalongela, “Mumgala munhu ino kumwangu, mumlonga kowalulusa iwanhu; basi nimuuzagiza, na mweye kuno mulola, bali siwene tozo kumwake munhu yuno, ajo dumumkengemeka.

¹⁵ Viyemela Herode na heyo vivo hamuwene na tozo, vilihi viyambwezile kumwetu, amba ino hatozile mbuli ilumbile mkudanganika.

¹⁶ Avo nomsuna, imala baho nomulekesa.”

¹⁷ Kwa mzoko viiduganya vinyandama kuwafungulila mfungwa yumwe mkikomo cha isikunghulu.

¹⁸ Waguta mizangi wose hamonga walonga, “Msegeze yuno, utufungulile Baraba!”

¹⁹ Na ayo Baraba kageligwa mkifungo kilumbo cha ufyalala uzusigwe muja mdiwambo, na kilumbo kiyagwe cha kukoma wanhu.

²⁰ Pilato yomana kulonga nawo kabili, giladi yake kalonda kumfungulila Yesu.

²¹ Bali wabamila walonga, “Muwambe mbiki! Muwambe mbiki!”

²² Aho yawauzile mwanza waikadatu, “Wona kabananga choni yuno? Siiwene mbuli kumwake ya kumkoma, avo nomtowa, ilawabaho nomfungulila.”

²³ Komu wawo wamdonheza kwa kuguta nghani mizangi, wolonda yawambigwe mdibiki; na kiyahiyahi chawo kihuma.

²⁴ Pilato kaikanha imbuli, kavumila vija vuwalondile.

²⁵ Kamfungulila yuja yageligwe mkifungo kwa kilumbo cha ufyalala na kukoma wanhu, yuja wamulondile; komu Yesu kamulava wamtendele vuwomgesa.

Watwanzi wa Yerusalemu wamlilila Yesu

²⁶ Vuwamgalile, wamgoga Simoni wa Kirene yobita yolawa kumgunda, wamdikwa msalaba, yamsolele Yesu na kumuwinza.

²⁷ Wanhu bwando nghani wamkoleleza, hamonga na watwanzi wakalile wokitowatowa muna zimhambaga kuno wolila.

²⁸ Yesu kawahindukila kalonga, “Amweye watwanzi wa Yerusalemu, sukumndilile niye, komu ililileni wenyego na iwanenu!

²⁹ Kwa mzoko mazuwa gokwiza, vonda walonge, Wene kudengha iwo waja iwagumba, na inda zija zilekile kulela, na matombo galekile kongheza!

³⁰ Aho baho vonda wailongele migongo, Tugwileni! na kuilongela misugulu, Tugubikeni!

³¹ Kilumbo biki bisi wahaditendela gano, ajo dinyalile jokuwaze?”

Yesu kapulila waja wamwihila; kamuhonya bokonyo; Yesu viyadanganike

³² Wagaligwa wayagwe wabili watendile gehile, giladi wakomigwe hamonga na Yesu.

³³ Vuwavikile hanhu hakemagwa Zege da Pala, baho wamuwambile heyo na ija mibokonyo, yumwe ukulume na yumwe ukumoso.

³⁴ Yesu kalonga, “Tata, walekese, kilumbo hawavimanyile vuwotenda!” Wazigola nguwo zake, watenda kibafuti.

³⁵ Madale ga wanhu wakala wemile wolola; waja iwakulu na hewo wamtendela uponela wolonga, “Wayagwe kawahonya; na yaihonye mwenyecho, kamba yuyo Kristo yasaguligwe na Mulungu!”

³⁶ Na waja asikali wamana kumtendela mchalango, wamkwenhukila, wamgalila siki ya divai.

³⁷ Walonga, “Kamba gweye gwegwe Mndewa wa Wayuda, ihonye mwenyecho!”

³⁸ Na hachana ya idibiki weka utango, “Yuno yuyo Mndewa wa Wayuda.”

³⁹ Imonga wa ija mibokonyo iwambigwe kamuliga Yesu, kalonga, “Che, gweye siyo Kristo? Ihonye mwenyecho, imala baho tuhonye na tweye!” Komu yuja waikabili kamwidika, kamkomhokela kalonga, “Gwe! habali humdumba Mulungu, igambile na gweye kwa mumu muna ungaduko uuno?

⁴¹ Amba tweye ilumba, kwa mzoko tobokela kitumetume cha gaja igetu gatusanghane; komu ino habanange kinhu chochose.”

⁴² Bahaja kalonga, “Go Yesu unghumbuke, vonda wingile kuna undewa wako!”

⁴³ Yesu kamulongela, “Ihoko nokulongela, lelo didi kokuwa hamonga na niye hambeho.”

⁴⁴ Avija viivikile saa sita, kukala na ziza muiisi ngima, kwa mzoko zuwa hadilawile mpaka saa kenda.

⁴⁵ Baho guwo da mdihekalu dimana kudegeka hagatigati.

⁴⁶ Yesu kalila kwa dizwi kulu kalonga, “Go Tata, mmikono mmwako noika loho yangu.” Viyamalile kulonga higo, mhunde kadanganika.

⁴⁷ Aija iakida viyagawene gaja galawilile haja, kamtogola Mulungu, kalonga, “Aka baye munhu ino kakala yali bule matozo.”

⁴⁸ Na madale gose ga wanhu waja waitinghanile wolola unzonza uja, avija vuwagawene galawilile haja, waitowatowa muna zimhambaga, wabwela.

⁴⁹ Na waja wose wamtangile, na waja watwanzi wamkoleleze kulawa Galilea, wema kutali wolola unzonza uja.

Yesu kazikigwa

⁵⁰ Mhunde kalawilila munhu mkulu twaga jake Yosefu, miyawo wana Nhaguso Nghulu, munhu yanogile umoyo, mwene ihoko.

⁵¹ Heyo haigelile muna msagu na kitendo chao; kalawile Arimatia, kiwambo kimonga cha Wayuda, na heyo kakala youbeta Undewa wa Mulungu.

⁵² Yuja kachola kwa Pilato, kalonda yagolelwe mtufi wa Yesu.

⁵³ Kauhulumusa kulawa muna umsalaba, kaugubika sanda, kawika mdikabuli dichongigwe mdibwe, hadinazikigwa hata munhu mgati.

⁵⁴ Na siku dija wakala okisasala, kilumbo sikunghulu isonga kwingila.

⁵⁵ Komu iwatwanzi waja wezile hamonga na heyo kulawa Galilea, wakala womkoleleza giladi wadilole dikabuli, na mtufi hawikigwe.

⁵⁶ Imala baho wabwela, wamana kudolonghanya vihatilo vya mavuta ganunghaga goya. Wakala wohumula siku ja Sabato, kamba vuwalagizwe na Imbila.