Luka 22 - Lagano da Isambi

¹ Ikala behi sikunghulu ya migate haigelagwa usasu, ikemigwa Pasaka ya Ukombozi.

² Baho Watambika Wakulu hamonga na Wana-Nzuma wazahila nzila ya kumkoma, komu wakala wodumba wanhu.

Yuda Iskariota yomuhimbila Yesu

³ Mwenembago yomana kumwingha Yuda yokemigwa Iskariote, ayo yuyo imonga wa waja Mulongo umwe na Wabili.

⁴ Yuja kasegela, kagenda kalonga na Watambika Wakulu na wakulu wa asikali vilihi vonda yadahe kumgela mmikono mmwawo.

⁵ Wadenghelela nghani, womana kwika nayo kilaga cha kumwingha mhiya.

⁶ Katogola, kazahila ulegeho unogile wa kumulava, wanhu sukuwavimanye.

Pasaka vitunduwililwe; mandiya ga ikilo

⁷ Ivika siku ja imigate haigelagwa usasu, igambile kusika nghondolo wa Pasaka.

⁸ Kawatuma Petro na Yohana kalonga, “Gendeni mkatunduwile pasaka tuije!”

⁹ Wamulongela, “Kolonda tukakusanghanile kulihi?”

¹⁰ Kawalongela, “Loleni vija vonda mwingile hakiwambo, mokitinghana na mbigalo yaidikwile nongo ya mazi; mkolelezeni mkengile muna ingʼanda yonda yengile heyo!

¹¹ Kwiza mulongeleni mwene ngʼanda, Mkulufunzi kokulongela, dakwahi digati da iwahenza, kwiza nije pasaka mumo hamonga na wanahina zangu?

¹² Na heyo komulagusilani gati kulu uchana, kimalile kwikwa goya, tandikeni mumo!”

¹³ Wachola, wavyona kamba viyawalongele, womana kwitunduwila pasaka.

¹⁴ Avija kipigiti vikivikile, kakala hana gamandiya heyo na waja wanahina hamonga.

¹⁵ Kawalongela, “Nisulukila nghani kuija pasaka ino (ya nghumbulilo) hamonga na mweye, nihali tanhu sinagaduswa.

¹⁶ Kwa mzoko nomulongelani, avo honda niije kabili, komu vonda divikizwe muna Undewa wa Mulungu.”

¹⁷ Kabokela kikombe, kakituniza kalonga, “Soleni kino, mwigolele mwemwe kwa mwemwe!

¹⁸ Kilumbo nomulongelani, lulawile vino singʼwa mmilelo ya mitongoni, komu Undewa wa Mulungu vondawize.”

¹⁹ Yomana kuusola mgate, katenda nhogo, kaumega ka-wengha, kalonga, “Luno lulo lukuli lwangu, lolavigwa kwa kilumbo chenu; tendegeni vivi kuno mgesa niye!”

²⁰ Ikikombe na hecho vivo vuwazigile ukuja, kalonga, “Kino dijo lagano da sambi muna umulopa wangu okwitika kwa kilumbo chenu.

²¹ Avo lola mkono wake ayo yonihonza wabaha hameza hamonga na niye.

²² Kwa mzoko Mwana wa Munhu yaigendelele na zake kamba viyagesile Mulungu, komu kojona ayuja munhu yamuhimbile!”

²³ Wasonga kuiuzagiza wenyego kwa wenyego, yalihi mmwao yonda yasanghane mbuli hiyo.

Mkulu yuyo yatumagwa; Petro kaidundula

²⁴ Dilawilila bamila vivija vuwali, kamba yalihi yopetigwa mkulu.

²⁵ Kawalongela, “Watawala wa makabila watawalaga, na yuja mwene mhiko kumwao kakemigwaga Kanoga Umoyo.

²⁶ Komu kumwenu mweye sivivo bule; aija yali mkulu kumwenu na yagalamke mdodo; mwene kulongoza wayagwe na yawe kamba ija yatumikaga.

²⁷ Hebu imkulu yuyo yalihi – yuja yakalile hana gamandiya hebu yuja yatumikaga? Nyeza yuja yakalaga hana gamandiya. Bali niye hamwenu ngalamka kamba yuja yatumagwa.

²⁸ Na mweye iyo mwemwe mkalile hamonga na niye vinikalile nigezigwa.

²⁹ Niye nowekilani mweye undewa, kamba vija Tata wangu viyanikile niye.

³⁰ Kwiza mwize kuja na kungʼwa haimeza yangu muna undewa wangu, na kukala muna ivigoda vya iyenzi, kuno muwataguse ngholo za Israeli uja mulongo umwe na wabili.

³¹ Kalonga, Simoni, Simoni, lola Mwenembago kawalonda mweye, yawasugulule kamba vija muhunga vuusugululagwa.

³² Komu nikupulila gweye, giladi ngogelo yako sukuihunguke; na gweye vondaugaluke, aho uwagangamaze ndugu zako!

³³ Kamulongela, “Mndewa, niye nihawa nagwe, kahi sidumba kuchola kukifungo, hebu kamba kudanganika.”

³⁴ Kalonga, “Nokulongela Petro, nzogolo hanakwika lelo, gweye kwiza kombela miyanza midatu kamba hunhangile niye.”

Mikoba yonda igule mizele

³⁵ Kawauza, “He, haja haniwatumile mwabule mkwizi wala mkoba wala vilatu, muhungukilwa na kinhu?” Walonga, “Aka.”

³⁶ Kawalongela, “Komu vino mwene mkwizi nayasole, na mkoba ivo vivo; na heyo yali bule zele, yakagulize nghanzu yake, yakagule zele!

³⁷ Kwa mzoko nomulongelani, ago gandikigwe kumwangu, Kapetigwa hamonga na wabananzi, govikizwa giladi, kilumbo gano ganyandame gana uzigilo wake.”

³⁸ Walonga, “Mndewa, lola hano hana mizele mibili!” Kawalongela, “Yenela.”

Nghondo ya kumpula Tata haja Getsemane

³⁹ Kalawa kagenda kukigongo cha Mizeituni, kamba vigali mazowela gake; wanahina zake na hewo wailongoza nayo.

⁴⁰ Viyavikile haja kawalongela, “Puleni, kilumbo sukumwingile mkugezwa!”

⁴¹ Mwenyecho kakwenhuka hamwande kamba vija nyasilo ya dibwe, kafugama mavindi kapula.

⁴² Kalonga, “Go Tata, ihawa gago gamanogelwa gako, segezela ikikombe kino; komu sukugawe manogelwa gangu, bali igako gavikizwe!”

⁴³ Mhunde malaika kulawa kuulanga kamulawila, kamgela mhiko.

⁴⁴ Na heyo avija viyakalile yogaya, kuno yogomba na kifo, baho yabanzile nghani kupula; vuke jake dikala kamba madondo ga mulopa ulagala hasi.

⁴⁵ Viyasegele haja hana ukupula, kawabwelela waja wanahina wake, kawavika wawasile utulo, kilumbo wengilwa na nyululuko.

⁴⁶ Kawalongela, “Vilihi vumuwasa utulo? Segeleni, mkapule, sukumwingile mkugezwa!”

Yesu kagogwa kamba yali mbokonyo

⁴⁷ Avija viyakalile yolonga ago, lola dale da wanhu, na yuja yokemigwa Yuda, amba yuyo imiyawo waja mulongo umwe na wabili, kalongolela kamkwenhukila Yesu, giladi yamnonele.

⁴⁸ Yesu kamulongela, “Yuda, komuhonza Mwana wa Munhu kwa kumnonela?”

⁴⁹ Waja wakalile behi na Yesu vuwawene gonda galawilile, walonga, “Mndewa, tuwakanhe na mizele?”

⁵⁰ Miyawo imonga yomana kumtowa mtumwa wa Mtambika Mkulu, kamkanha digutwi da ukulume.

⁵¹ Yesu kedika kalonga, “Walekeni viwolonda!” kamkwasa dija digutwi, kamuhonya.

⁵² Baho yawalongele Watambika Wakulu, Wakulu wa asikali wa Dihekalu na waja Iwavyele, “He, mwiza na mizele na mikota kamba vija wanhu vuwamgendelaga mbokonyo?

⁵³ Mazuwa gose nghala namwe muna dihekalu, hamngolosele mikono; komu ino iyo saa yenu, vilema ziza dihuma.”

Petro kambela Yesu, kagwa uyalazi

⁵⁴ Wamgoga wamsola, wagenda nayo kuna ingʼanda ya mtambika mkulu; na Petro kakala yomkoleleza kutali-tali.

⁵⁵ Vuwamalile kubwinha moto hagatigati ya ulubuga na kukala hamwe, na heyo Petro kakala hamonga nawo.

⁵⁶ Baho mtumwa imonga wa kitwanzi kamona viyakalile kuja kubumuke, kambunhulila meso kalonga, “Yuno na heyo yuyo imonga wawo.”

⁵⁷ Petro kabela kalonga, “Go mtwanzi, simmanyile!”

⁵⁸ Mhunde munhu iyagwe kamona kalonga, “Na gweye kwa miyawo”. Petro kalonga, “Miyangu gwe, aka si nene!”

⁵⁹ Kibita kipigiti, munhu iyagwe kananahila kuno yolonga, “Bule, ayuno kakala hamonga nayo, kwa mzoko ayuno na heyo Mgalilea.”

⁶⁰ Komu Petro kalonga, “Miyangu, sivimanya yuulonga.” Na viyakalile yobela, nzogolo yomana kwika.

⁶¹ Mndewa kahinduka kamulola Petro; Petro yomana kukumbukila uja ulonzi wa Mndewa viyamulongele, “Lelo didi nzogolo hanakwika, gweye kwiza kombela miyanza midatu.”

⁶² Kalawa kunze, kagwa giyogiyo, kalila nghani.

Yesu haluhengo, kataguswa kifo

⁶³ Na waja wanhu wakalile wamgogile Yesu, wamtendela uponela, wamtowa.

⁶⁴ Wamgubika gameso, wamuuzauza wolonga, “Huguza yalihi yakutowile?”

⁶⁵ Walava ulonzi bwando wihile, wamuliga.

⁶⁶ Vuuchele, Wavyele bwando wailundiza hamonga na Watambika Wakulu na Wananzuma, wamgela muna Nhaguso Nghulu. Walonga,

⁶⁷ “Kamba gweye gwegwe Kristo, tulongele!” Kawalongela, “Hata nihamulongelani, honda mtogole ngʼo.

⁶⁸ Na kamba nihawauza, honda mnidike.

⁶⁹ Komu kulawa vino Mwana wa Munhu kogamba yakalile mwambu wa ukulume kwa Mhiko za Mulungu.”

⁷⁰ Walonga wose, “Avo gweye gwegwe mwanage Mulungu?” Kawalongela, “Ona, molonga kamba niye nene.”

⁷¹ Walonga, “Chei, avo tuzahile usindi wa choni kabili? Kilumbo tweye wenyego tuhulike ulonzi ulawile mmulomo wake!”