Luka 21 - Lagano da Isambi

Nhosa ya mgane ihuma ziyagwe

¹ Yesu viyenule meso gake kawona wene mhiya wogela nhosa zao muna dibuhulu da isiga.

² Kamona pinga imonga mgane yogela mumuja vigebe vibili.

³ Kalonga, “Ihoko nomulongelani, ino mgane mkiwa kagela nghani kubanza wose.

⁴ Kwa mzoko wano wose wagela nhosa muna gamali gabanzile, komu ino muna uukiwa wake kavigela vyose vyayali navo.”

Magweka ga ikidugalo; migaduko

⁵ Na wanhu wayagwe vuwakalile wolongelela mbuli za idihekalu kamba vidihambigwe nghani kwa mabwe ganogile na nhosa za wanhu, kalonga,

⁶ “Gano gomulolesa, mazuwa gokwiza yogamba honda disigale dibwe uchana ha dibwe, dileke kubomoligwa.”

⁷ Wamuuza walonga, “Mkulufunzi, magweka ago gokuwa zuwaki?”

⁸ Kalonga, “Teganyeni sukumwize kwagizwa, kilumbo bwando wonda weze wotambula tagwa jangu, kuno wolonga, Hiyo nene, avo kiwango chammabehi! awo sukumuwakole.

⁹ Na mweye kwiza muhahulika magweka ga nghondo na udelenyi sukumdumbe, kwa mzoko ago haichanduso hagaleka kulawilila, komu kija ikidugalo hakiza chambwisa.”

¹⁰ Ilawa baho kawalongela, “Lukolo lokwinula nghondo na lukolo luyagwe, na watawala osonga nghondo na watawala wayao,

¹¹ Kolawilila na kingudemo kikulu muisi, na nzala na kihindu-hindu na magweka ga kudumbiza na vinzonza vikulu kulawa kuulanga.

¹² Komu tanhu ago gose haganalawilila, womgogani na kuwagelani lusango; womgalani muna gamakanisa na kuwagela kolokoloni, womgalani kwa watawala na wandewa kwa kilumbo cha tagwa jangu.

¹³ Na ago gokuwa uwo msindimulo kumwenu.

¹⁴ Avo mvitange mmoyo mmwenu sukumgelegeze-gelegeze mbuli zonda mwihonye!

¹⁵ Kilumbo niye nowenghani mulomo na fiyuko, yogamba wandumu wenu wose honda wadahe kuikuga hebu kubamila.

¹⁶ Mweye womuhimbilani iwo wavyele wenu na ndugu zenu, kilagwa chenu na mbwiga zenu, nawo owakoma wayagwe wenu.

¹⁷ Na mweye mokwihilwa na wanhu wose kilumbo cha tagwa jangu.

¹⁸ Komu honda lupotele hata luvili lwenu lumwe lwa mpala.

¹⁹ Na mweye kwa kwazaganya kumuli nako, mozihonya loho zenu.

Ubananzi wa Yerusalemu, na ubwelo wa Kristo

²⁰ Komu aho vonda mwone wambo da Yerusalemu dizungulukwa na madale, avo mvitange kamba ubananzi wake wammabehi.

²¹ Avo awaja wali Uyuda nawakimbilile mvigongo, na waja wa hagatigati na wakimbilile kunze, na wali mmigunda sukuwengile!

²² Kwa mzoko mazuwa higo gago ga kulihila mgaduko, giladi gaiduganye gose gandikigwe.

²³ Komu wonda wone vihile iwo waja wene ziinda na waja wokongheza siku hizo, kilumbo kokuwa na mgaduko bwando muna iisi, na lusango lwa Mulungu muna ulukolo luno.

²⁴ Wogwa kwa ukali wa mizele; wayagwe wokumbigwa mateka na kupwililiswa muna zingholo zose, na Yerusalemu wobojagwa na wanhu yungwa, hata kikomo cha makabila vonda kiiduganye.

²⁵ Avo yolawilila vinzonza kuna dizuwa na kuna umwezi na izinhondo, na muli iisi mgaduko wa makabila gose, wokanganya kwa mzoko bahali vonda ihume na nyukwanyukwa jake.

²⁶ Wanhu wogwa kingwaya mmoyo, kuno wolola wobetaga gaja gonda galawilile mulumwengu; kilumbo mhiko za kuulanga zotigisika.

²⁷ Aho baho hondawamone Mwana wa Munhu yokwiza mmabingu hamonga na mhiko na yenzi nghulu.

²⁸ Avo mbuli hizo zihasonga kulawilila, samhukeni, inuleni matwi genu, kwa mzoko nghombolwa yenu yamma-behi.”

²⁹ Kawalongela hala, “Uloleni mkuyu na mibiki iyagwe yose!

³⁰ Avija viimalaga kuzuka, mokona kuno movimanya wenyego kamba kiwango cha ukuhuna chammabehi.

³¹ Na mweye vivo muhazona mbuli hizo zisonga kulawilila, mvimanye kamba undewa wa Mulungu wahabehi.

³² Ihoko nomulongelani, mulelo uno hondaubite, viyemela gano galeke kuvikizwa gose.

³³ Ulanga na isi kwiza zobita, komu ulonzi wangu hondaubite ngʼwene.

³⁴ Avo iteganyeni, miyoyo yenu sikuilemelwe na kuja chaka na ngholwa na mgaduko wa ugima, kileka siku ija ya inyidukila yowavika kamba mtego vunamasaga.

³⁵ Avo vivo vondaiwavike wanhu wose wakalile hachana ha ikihanga cha ulumwengu mgima.

³⁶ Goneleleni mweye vipigiti vyose kuno mpula, giladi mgangamale kuhonyokwa muna ago gose vonda galawilile, na kwima hakihanga cha Mwana wa Munhu.”

³⁷ Avo imisi kakala yolanguliza muli dihekalu, na ikilo kagendaga kuwasa kukigongo kikemigwa Mizeituni.

³⁸ Na wanhu wose wakala wolamka imitondo wogenda muna dihekalu, giladi wamtegeleze.