Luka 20 - Lagano da Isambi

Ubatizo wa Yohana ulawa kwahi

¹ Ikala siku dimwe viyakalile yolanguliza wanhu mna dingʼanda ja Mulungu, kuno yopeta mbuli zinogile, Watambika Wakulu na waja Wana Nzuma hamonga na Walala, mhunde wamulawila.

² Wamulongela, “Tulongele kosanghana magweka gano kwa lwamu lulihi; kabili yuyo yalihi yakwinghile lwamu luno?”

³ Kedika kawalongela, “Na niye nowauzani mweye mbuli imwe, nongeleni!

⁴ Ubatizo wa Yohana ulawa kuulanga hebu kwa wanhu?”

⁵ Womana kuiuzagiza wenyego kwa wenyego wolonga, “Kamba tuhalonga ulawa kuulanga, kolonga kumbe vilihi hamumtogole?

⁶ Na kamba tuhalonga ulawa kwa wanhu, kwiza wanhu wose wotutowa na mabwe, kwa mzoko wamtogola Yohana senhambo heyo Mtulandagu.”

⁷ Wedika, “Hatutangile kuulawile.”

⁸ Na Yesu kawalongela, “Na niye siwalongela, kwa lwamu lulihi nosanghana magweka gano.”

Wanghulima wa mitongoni wehile

⁹ Kasonga kuwalongela wanhu hala dino, “Munhu imonga kahanda mgunda wa mitongoni, kaweka wanghulima, kagenda isi iyagwe, kakala hiko nghani.

¹⁰ Na ikikomo cha ukuhuna kamtuma mtumigwa wake kwa waja wanghulima, giladi wamwinghe galo ja umujo wa imitongoni; waja wanghulima wamtowa, wamuwinga mikono iyeka.

¹¹ Yomana kumtuma nyakadala iyagwe; yuja nayo wamtowa, wamgela kinyala, wamuwinga mikono iyeka.

¹² Yomana kutuma waikadatu; yuja wamgela milonda, wamwasa kunze.

¹³ Baho bwana wa umgunda wa imitongoni kalonga, Nhendeze? nomtuma mwanangu, mnogelwa wangu, nogamba yuno wo-mtegeleza.

¹⁴ Komu waja wanghulima vuwamuwene, wailongela wenyego kwa wenyego, Yuno yuyo Muhala tagwa, leka tumkome, giladi uhalali tuusole tweye!

¹⁵ Womana kumwasa kunze ya umgunda, wamkoma; basi bwana mwene mgunda wa imitongoni kowatendaze?

¹⁶ Kokwiza kuwakoma wanghulima waja, na uja umgunda wa imitongoni kowengha wayagwe.” Vuwagahulike gaja walonga, “Aka kakaka! sukugatwandame gano.”

¹⁷ Kawabunhulila meso kalonga, “Icho kilumbo kilihi, kileka longa dino jandikigwe, Dibwe diwalemile wazengaga ngʼanda, ajo digalamka dibwe kulu da kukingolobweda. Munhu wowose yahadigwila uchana dibwe hijo, kobenekabeneka; na wowose yonda dimgwile, domtimbinyula timbinyu.”

Vilingana kuliha kodi ya serkali

¹⁹ Waja wana nzuma na watambika wakulu wagelegeza kumgoga kipigiti kicho kilumbo wavitanga kamba hala dijo walongelwa wawo, komu wadumba iwanhu.

²⁰ Womana kumsepasepa, wamgalila wasepi wokala wokiitenda kamba wanhu wa ihoko, giladi wamgoge muna inongelo yake, kwiza wamgele kuli ulwamu mu mhiko za utawala wa luwali.

²¹ Wamuuza walonga, “Mkulufunzi, tuvimanya kamba kolonga na kulanguliza goya, wala hulola vihanga, komu kolanguliza nzila za Mulungu kwa ihoko.

²² Che, hambwe ilumba tweye tumwinghe kodi Mtawala, hebu viha?”

²³ Bali heyo kaumanya ubala wao kawalongela,

²⁴ “Ndagusileni mhiya za kodi; cha nani kihanga kino na utango uno?” Wamwidika, “Wa Mtawala Kaisari.”

²⁵ Kawalongela, “Chevule! vya mtawala mwingheni mtawala, na vya Mulungu mwingheni Mulungu!”

²⁶ Avo walemelwa kumgela mkitala kwa nongelo zake hameso ga wanhu; wasinhuka nyidikilo zake, wavudala.

Wafile wozuka wogamba kamba malaika

²⁷ Imala baho waja Masadukeo wayagwe, wanhu walongaga kamba kuduhu kuzuka kwa wafile, wamgendela wamuuza.

²⁸ Walonga, “Mkulufunzi, Mose katwandikila kamba munhu yahadanganikilwa na ndugu yake mwene pinga, komu kabule mwana, na yamsole ino pinga, giladi yamgolele ndugu yake mulelo.

²⁹ Basi kukala na ndugu saba; yuja wa ichanduso kakala na pinga, yomana kadanganika yali bule mwana.

³⁰ Aija waikabili kengilila yuja ipinga, kadanganika na heyo yali bule mwana.

³¹ Keza waikadatu kengilila, vivija wose fungate, wamala wafa, hawalelile wana.

³² Kimambukizo pinga yuja yomana kudanganika.

³³ Avo ako kuna ukuzuka, kwiza kokuwa sano da yalihi? Kwa mzoko kakala yasoligwe na wose fungate.”

³⁴ Yesu kawalongela, “Wana wa ulumwengu uno wasolaga na kusoligwa.

³⁵ Komu waja wopetigwa kamba viwandama kuupata ulumwengu uja na kuja ukuzuka kulawa kwa wafile, hawasola pinga wala hawasoligwa.

³⁶ Wala kudanganika viyagwe hawadaha, kilumbo wogalamka kamba malaika, na hewo wana wa Mulungu vuwali wana wa nzuko.

³⁷ Komu wafile wozusigwa; kileka Mose yandike mbuli za kibiwi kija viyamulongile Bwana kumbe yuyo Mulungu wa Abrahamu na Mulungu wa Isaka na Mulungu wa Yakobo.

³⁸ Mulungu siyo Mulungu wa iwafile, komu wa iwapile, kwa mzoko wose wokala kumwake.”

³⁹ Baho Wana Nzuma wayagwe wedika wamulongela, “Mkulufunzi, kulonga goya.”

⁴⁰ Lulawile baho kahi hawagesile kumuuza mbuli viyagwe.

Daudi kamtuniza mwanage

⁴¹ Kawalongela, “Wanhu walongaze kamba Kristo heyo Mwanage Daudi?

⁴² Kwa mzoko Daudi mwenyecho kalonga mkitabu cha Ndenghelelo, Mndewa kamulongela Mndewa wangu, Ikalile kuna umkono wangu wa ukulume,

⁴³ Hata vonda niweke wandumu wako wagalamke kigoda cha kwikila migulu yako!

⁴⁴ Avo Daudi yahamkema Kristo Mndewa wake, vilihi kabili yagalamke mwanage?”

Teganya wanhu wokitopa

⁴⁵ Wanhu wose vuwakalile womtegeleza, kawalongela wanahina wake,

⁴⁶ “Iteganyeni na WanaNzuma wagesaga kuzulula, wavalaga miguwo mitali na kulamusigwa na wanhu muli gamasoko, na kukala kuulongozi muna gamakanisa, na vigoda vya kuulongozi halusona.

⁴⁷ Wajaga ngʼanda za iwagane, na kwa kubalaganya hewo wapulaga kipigiti kitali; awo kwiza wopata kitala kikulu.