Luka 18 - Lagano da Isambi

Hala ya mgane yompula mtagusi mponda

¹ Kawalongela hala kamba viwandame kumpula Mulungu sikuzose, sukuwadonhe.

² Kalonga, “Kukala na mtagusi kukiwambo kimonga, hamdumba Mulungu bule kuteganya wanhu aka.

³ Na mkiwambo kicho kukala na mtwanzi mgane yakalile yomgendelagendela, kuno yolonga, Ninghe ichangu kulawa kwa mndumu wangu!

⁴ Na heyo kidami goya kakala yolema, avija kalonga munda na kitupe, Ona iyo vivo, simdumba Mulungu, siteganya wanhu bule,

⁵ kwa mzoko mgane ino konigaza nghani, leka nimwinghe ichake cha ihoko, kwiza sukuyandonheze kwa kunizila.”

⁶ Mndewa kalonga, “Tegelezeni viyolonga yuja mtagusi mponda!

⁷ Na Mulungu he! honda yawenghe ihoko waja wasagulwa wake womlilila imisi na ikilo, na heyo yuyo yabanzile kwazaganya kumwao?

⁸ Nomulongelani, kowagwelela mbwisa ihoko; bali heyo, vonda yezile Mwana wa Munhu kowona wanhu wombeta muisi?”

Fariseo mwene kitopa, kuno yozela wayagwe

⁹ Kawalongela hala dino wanhu wokiidundula wokitopa kilumbo hewo wawo wene ihoko, kuno owazela wayagwe wose.

¹⁰ “Wanhu wabili wakwena wagenda kudingʼanda da Mulungu kusali, imonga Fariseo, waikabili muwila kodi.

¹¹ Yuja Fariseo kema wima, kapula vino mmoyo mmwake, Gweye Mulungu, nokutunila kwa mzoko niye si kamba wanhu yungwa wabokonyo, waponela, wagoni, hebu kamba ino muwila kodi.

¹² Niye ndekaga kuja miyanza mibili kwa juma imwe, ndavaga nhosa kulawa ivyangu vimhataga vyose.

¹³ Bali ija muwila kodi kema kutali wala hagesile kwinula meso gake kuulanga, komu kaitowatowa muli imhambaga kalonga, Go Mulungu, nyonela bazi niye mwene matozo!

¹⁴ Nimulongelani, yuja kahulumuka kagenda kungʼanda yake, kapetigwa muihoko kubanza ija. Kilumbo munhu yonda yaitope kogwa kinyala, na yuja yokibweza hasi, kwiza kokwinuligwa.”

Yesu kawamoteza iwana

¹⁵ Wamgalila wana wadodo giladi yawakwase, komu wanahina vuwawawene wawakomhokela.

¹⁶ Bali Yesu kawakema weze kumwake, kalonga, “Walekeni wana wadodo weze kumwangu, sukumuwagomese, kilumbo awo wali kamba vino, undewa wa Mulungu uwo wawo.

¹⁷ Ihoko nomulongelani, munhu wowose kamba haubokele undewa wa Mulungu kamba mwana mdodo, honda yawingile ngʼo.”

Mkulu yozahila ugima wa digunge

¹⁸ Imala baho Mkulu wa Lukolo imonga kamuuza kalonga, “Mulangulizi unogile, nhende kilihi giladi ningile kuugima wa idigunge?”

¹⁹ Yesu kamulongela, “Vilihi vunikema nina loho inogile; haduhu yali na Loho inogile komu yumwe, na heyo yuyo Mulungu.

²⁰ Kuzitanga ndagizi, Sukuutende ugoni, sukuukome, sukuwibe, sukuusindile uvwizi, uwatange tataako na mamo wako!”

²¹ Kamulongela, “Ago gose nigagoga kulawa haudodo wangu.”

²² Yesu viyagahulike ago kamulongela, “Kuhungukilwa tanhu na mbuli imwe, guliza vuuli navyo vyose, ukawagolele wakiwa, na gweye kokuwa na siga kuulanga, ilawa baho izo uminze!

²³ Bali heyo viyagahulike ago, kanyunyuwala nghani, kilumbo kakala na mali bwando.

Nzuwilo za mali muisi; kulihilwa kuulanga

²⁴ Yesu viyawene vija kalonga, “Kwa mgayo ulihi wene mali wokwingila muundewa wa Mulungu!

²⁵ Kwa mzoko vibuha ngamiya kubita mkizonzo cha msonga, vigambile mwene mali kwiza kwingila muundewa wa Mulungu!”

²⁶ Na hewo vuwahulike walonga, “Yuyo yalihi kwiza yonda yaho-nyokwe?”

²⁷ Kalonga, “Galekaga kudahika kwa wanhu, gadahikaga kwa Mulungu.”

²⁸ Petro kalonga, “Lola tweye tuvileka vinhu vyetu vyose, tukukoleleleza.”

²⁹ Kawalongela, “Ihoko nomulongelani, haduhu munhu yalekile ngʼanda bule sano jake, bule ndugu bule wanage kwa kilumbo cha undewa wa Mulungu,

³⁰ yalekile kubokela nghani mulumwengu uno miyanza bwando, na muna ulumwengu ukwiza ugima wa digunge.”

Migazo yake Kristo, lwekadatu

³¹ Kawasola waja Longo dimwe na Wabili, kawalongela, “Loleni tokwela kuchola Yerusalemu, na magweka gose gokwenela, Mwana wa Munhu gayandikilwe na Watulandagu.

³² Kwa mzoko kogeligwa mmikono ya wanhu, wonhendela uponela, womtendela chodo na kumtemela mizite.

³³ Na hewo womtowa vibongho, imala baho womkoma, na siku ja ikadatu kozuka.”

³⁴ Komu hawatangile ulonzi uja hata kidodo; mbuli hiyo ikala iifisile kumwao, wala hawavimanyile viyalongile.

Bartimeo kimbugumbugu wa Yeriko

³⁵ Viyakalile yokwenhukila Yeriko, hakala na munhu yali bule gameso, kakala mumngwazo wa inzila yopula.

³⁶ Viyahulike matinghanilo gobita kauza, “Hiko kuna choni?”

³⁷ Wamulongela, “Yesu wa Nazareti kobita.”

³⁸ Mhunde katowa nyangi yolonga, “Yesu Mwanage Daudi, umbonele bazi!”

³⁹ Na waja walongole wamgomesa, yanyamale. Bali heyo kagogelela nghani kutowa nyangi, “Mwanage Daudi, umbonele bazi!”

⁴⁰ Yesu kema, yomana kulagiza wamgale bahaja hayali heyo; avija viyamkwenhukila kamuuza,

⁴¹ “Kolonda nikutendele choni?” Kamulongela, “Mndewa, nonda kulola.”

⁴² Yesu kamulongela, “Winghigwe meso ulole; kugoga kwako kukuhonya.”

⁴³ Mhunde kapata kulola goya kamkoleleza, kuno yomtogola Mulungu, na wanhu wose vuwaviwene wamgwelela Mulungu nhogolwa.