Luka 17 - Lagano da Isambi

Nghwalo zohumigwa na ndekeselo

¹ Kawalongela wanahina wake, “Vinghwaso havilekaga kulawilila, komu janga hijo jake munhu hiyo, kamba diheza kwa mzoko wake!

² Maza vihawile goya, munhu kamba hiyo, dibwe da kusagila wahadikakaliza mungosi wake, ilawa baho wakamwase mbahali, sembuse kumkoseza yumwe wa wadodo kamba wano.

³ Itunzeni viyema ndugu yahakutozela, mzume; na heyo yahayona imbuli kamba kaitoza, che, na gweye galeke baho.

⁴ Na kamba yahakutozela miyanza Saba kwa siku dimwe, yahalonga, Nhoza, miyanza saba siku dija, na gweye galekese!

Ngogelo yene mhiko yokibweza hasi

⁵ Wanahina wamulongela mndewa, “Twinghe mhiko bwando za kumgoga Mulungu!”

⁶ Mndewa kawalongela, “Kamba muwile na ngogelo igambile nzele ya mbeyu ya mvule, muhaulongele mkuyu uno, Winyozole ukaihande mwibahali! na uno uhatogole.

⁷ Yuyo yalihi kumwenu mwene nyakadala yolima hebu yochunga, kwiza yamulongele baho honda yabwele kulawa kumgunda, Izo mbwisa, kala hano uje chakuja?

⁸ Che! Yaleke kumulongela, Nhendela chakuja mbwisa, ndiye; kwesa ikibindu usanghanile, hata honda nizige kuja na kungʼwa, ilawa baho na gweye kileka uje na kungʼwa!

⁹ Haya kwiza komwingha hongelaga yuja nyakadala, kilumbo kasanghana goya gayalagizwe?

¹⁰ Vivo na mweye, kamba muhaziga kugasanghana gose gamlagizwe, longeni, Tweye twa watumigwa wali bule na mzoko; tusanghana tu gatwandame kusa-nghana.”

Wanhu kumi wene dikulu

¹¹ Viyakalile mnzila yogenda Yerusalemu, kabita hagatigati ya Samaria na Galilea.

¹² Na viyakalile yokwingila kibuga kimonga, kawatinghana wanhu kumi wene dikulu, wema kumwande.

¹³ Na hewo watowa nyangi wolonga, “Agweye Yesu, Mndewa Mkulu, utonele bazi!”

¹⁴ Viyawawene kawalongeia, “Gendeni mkailagusile kwa wakulu wa nhambiko!”

¹⁵ Avija vuwakalile wochola, wamana kuhona. Imonga miyao viyawene kamba kahona, kabweleganya kuchugu yomtuniza Mulungu kwa dizwi kulu.

¹⁶ Yomana kugwa kingubanguba ha migulu yake yomtogola; na heyo kakala Msamaria.

¹⁷ Yesu kedika yolonga, “Si waja wose longo dimwe wahonile? waja kenda wali kwahi?

¹⁸ Haduhu wabwelile weze kumwingha Mulungu nhogolwa yake, kumbe hivo ino imuhenza yali yeka?”

¹⁹ Yomana kumulongela, “Inuka wigendelele; ngogelo yako iyo ikuhonyile.”

Undewa wamumo mmiyoyo

²⁰ Na viyakalile youzigwa na Mafariseo, Hambwe utawala wa Mulungu okwiza zuwa gani? Kawedika kalonga, “Utawala wa Mulungu hawiza kwa kuloleswa.

²¹ Wala honda walonge, Lola auno kuno, hebu auja kuja; Undewa wa Mulungu wamumo mgati mmwenu.”

Kristo vondayoneke; Wanhu vondawabagulwe siku ja ubwelo wa Kristo

²² Kawalongela wanahina, “Kiwango chokwiza, vonda msulukile kuyona siku imwe mzisiku za Mwana wa Munhu, viyemela honda muyone.

²³ Avo wahamulongelani, Lola kuja! Lola kuno! sukumsegele haja hamkale, wala sukumuwakole!

²⁴ Kilumbo kamba vija lumwemwe vilumwelukaga kulawa mwambu uno hasi ya ulanga hata umwambu uja, hasi ya ulanga, vivo yondayawe Mwana wa Munhu hadisiku jake.

²⁵ Komu vino tanhu vimwandama yenghigwe mgaduko bwando na kulemigwa mulukolo luno.

²⁶ Kamba vija viikalile milongo ya Noa, vivo vonda viwe mkikomo chake Mwana wa Munhu.

²⁷ Wakala woja na kungʼwa, wakala wosola na kusoligwa hata siku dija Noa viyengile muna imeli; gubika ja mazi dingila, dimana kuwagubikiza wose.

²⁸ Avo vivo ili kamba vija viikalile milongo ya Loti, wakala woja na kungʼwa, wakala wogula na kuguliza, ohanda na kuzenga.

²⁹ Komu siku dija Loti viyalawile Sodoma, umana kugwa moto wa kikwatulo kulawa kuulanga, uwasakaza wose.

³⁰ Avo mina vivo vonda viwe siku dija vonda yagubulilwe Mwana wa Munhu.

³¹ Disiku hijo yali kukano, na viya vyake vya kugati mngʼanda sukuyahulumuke kuvisola; yogamba yali kumgunda sukuyabweleganye kuchugu!

³² Gelegezeni sano jake Loti!

³³ Munhu yoyose yahalonda kuihonya mwenyecho, senhambo kokwangamila; na ayo yonda yaigwasike mwenyecho giladi, hiyo kokihonya.

³⁴ Nomulongelani, ikilo dijo wanhu wabili wokuwa mkisazi kimwe; imonga kosoligwa, imonga kolekigwa.

³⁵ Watwanzi wabili wotwanga hamonga; imonga kosoligwa, imonga kolekigwa.

³⁶ Wanhu wabili wali kumgunda, yumwe kosoligwa, yumwe kolekigwa.

³⁷ Wedika wamuuza, “Kwahi, Mndewa?” Kawalongela, “Hauli mtufi, baho honda waitinghanile mhungu.”