Luka 16 - Lagano da Isambi

Hala ya mtunza mali yali mponda

¹ Kawalongela wanahina wake, “Hakala na munhu yumwe mwene mhiya, kakala na mtunza mali wake; iyo wakala womdeta kumwake kamba kopwililisa mali gake.

² Kamkema kamulongela, Mbuli gani ino inihulike kumwako? Lava mhetelo zose ziutunzile mali gangu, kilumbo kulawa vino kabili hudaha kuteganya mali gangu.

³ Yuja mtunza mali kalonga munda na kitupe, Nhendeze; kilumbo bwana wangu kosegeza kwiza msanghano zake.

⁴ Kulima sidaha, na kupula nokona kinyala; nivitanga vonda nhende, giladi nihalavigwa muna isanghana kwiza wangomele mmangʼanda gao.

⁵ Yomana kuwakema wadenyi wose wa ija bwana wake, yumweyumwe, kamulongela wa ichanduso, Kokuwila denyi yaki bwana wangu?

⁶ Kalonga, Visaga miya vya mavuta. Kamulongela, Sola lupwilili lwako, kala mbwisa, siliginha milongo mitano!

⁷ Ilawa baho kamulongela iyagwe, Nagweye kokuwila nyingahi? Kamulongela, Visa miya vya muhunga. Kamulongela, Sola lupwilili lwako, na gweye siliginha milongo minane! –

⁸ Mndewa kamtogola yuja mtunza mali mponela, kwa mzoko kagatenda gaja kwa ubala, kilumbo wana wa imbago ino, muna zingelekwa zao wenyecho, wawaga wabala kubanza waja wana wa ihazelu.

Ukungulufu wa kuivikiza Nzuma

⁹ Na niye nowalongelani, Itendeleni mbwiga kwa mali za uponela, giladi gahaswela, wamgomeleni muja muwokala digunge.

¹⁰ Uhawa mkungulufu mkidodo, kokuwa mkungulufu mkikulu; na heyo mponela kwa kinhu kidodo, kokuwa mponela na muna ikinhu kikulu nghani.

¹¹ Baho kamba hamuwile wakungulufu muna gamali ga uponela, yalihi yonda yawenghe babulamana ya ihoko?

¹² Na kamba hamuwile wakungulufu kwa mhiya za munhu yungwa, yalihi yonda yawenghe ija igambile yenu wenyechwa?

¹³ Kuduhu mtumigwa yonda yadahe kuwasanghanila mabwana wawili; kwa mzoko kwiza komwihila ino na kumnogela ino, bule kokiilumba na yuno na kumwehula yuno; hamdaha kumsanghanila Mulungu na Mhiya.”

¹⁴ Waja Mafariseo senhambo walonda mhiya, wagahulika gaja gose, womana kumkekela.

¹⁵ Kawalongela, “Mweye mwemwe mkidundula ihoko ha walumwengu, komu Mulungu kaitanga mizoyo yenu, kilumbo kinhu kihatunizwa kwa walumwengu, chei acho kicho yokihila Mulungu.

¹⁶ Nzuma na Watulandagu vikala baho, kimambukizo Yohana; lulawile kiwango hicho usenga unogile wa undewa wa Mulungu ubwililiswa, na kila munhu kokidodomeka kwa miguvu.

¹⁷ Amba vibuha nghani ulanga na isi viyangayuke, sembuse iinege sele imonga ya Nzuma.

¹⁸ Na munhu yahajasa sano jake, yahasola sano diyagwe, kotenda ugoni; na heyo yosola aija yasigwe na mkasano, ayo vivo kengila muugoni.

Lazaro hamulango wa niwene mhiya

¹⁹ Hakala na munhu yumwe mwene mhiya bwando, yavalaga nguwo za nzambalau na nghotelezo zinogile, na kuja vinonile nghani milongo yake yose.

²⁰ Na maskini imonga twaga jake Lazaro, ayo kekagwa hamulango wake, kenela vilonda bwando.

²¹ Avyo kakala yosulukila kwiguta na uja upakapaka ulagale kulawa hameza ya yuja tajili; umbwa nawo wezaga wamlambita vija ivilonda.

²² Avija ayuja maskini yomana kudanganika, kasoligwa na malaika mpaka haimhambaga ya Abrahamu; kalekale na yuja mwenemhiya na heyo kadanganika, wamzika.

²³ Aluja luyavikile kuzimu, yomana kwinula meso gake viyakalile yogaduka, kamona Abrahamu kutali, na Lazaro yamfagatile haimhambaga yake.

²⁴ Kalila, kalonga, Agweye tata Abrahamu, nyonela bazi, mgale mbwisa Lazaro, yazabike isota ya ikidole chake mmazi, yandambise mululimi lwangu, amba notakamila hano hana umoto!

²⁵ Abrahamu kamulongela, Mwanangu, gelegeza tanhu gaja gaubokele gakala ganogile kuugima wako, na ino Lazaro kakala yopata gehile; avino sambi kahano kohingilwa goya, na gweye kogaduka.

²⁶ Na gabanzile, ahano na mweye hiko, kwikigwa kolongo kulu, kwa mzoko waja wolonda kulawa kuno kugenda kumwenu, walemelwe, wala wanhu wa kumwenu sukuwaloke kwiza kumwetu.

²⁷ Kalonga, Basi tata nokupula, mgale kungʼanda ya tataangu!

²⁸ Kilumbo niwasigaza ndugu watano; yakawapetele, na hewo sekewavike hanhu hano hauli mgaduko.

²⁹ Abrahamu kamulongela, Wakuko Mose na Watulandagu, avo na wawategeleze wawo!

³⁰ Kamulongela, Dedede tata Abrahamu, maza kamba yahawagendela munhu yalawile kuzimu, woluziga.

³¹ Kamulongela, Kamba hawahulike Mose na Watulandagu, honda waluzige viyemela munhu yahazuka kulawa kwa wafile.”