Luka 15 - Lagano da Isambi

Nghondolo na lobo zagile

¹ Waja wose wawila kodi na wene gamatozo wakala womkwenhukila Yesu, giladi wamtegeleze.

² Mafariseo na Wana Nzuma kuno womduguda walonga, “Munhu ino kagomelaga wene matozo na kuja nawo.”

³ Kawalavila hala dino, kalonga, “Yalihi kumwenu mwene muzo umwe wa nghondolo, yahagilwa na yumwe, yaleke kuwaleka waja imilongo kenda na kenda kunzolome?

⁴ Yachole yakamzahile ija yagile tanhu yamone?

⁵ Na heyo yahamona, komwika hamayega gake haimhambaga.

⁶ Na vonda yavike kungʼanda yake, kowakema waja mbwiga zake na wakalabehi wayage yowalongela, Dengheni hamonga na niye, kilumbo nimpata nghondolo wangu yakalile yagile!

⁷ Nowalongelani, Avo vivo kokuwa na ndenghelelo kuulanga kwa mzoko wa mwene matozo yumwe yahaikunzula, kubanza waja milongo kenda na kenda, hawasulukila kwikunzula.

⁸ Hebu mtwanzi gani mwene mhiya mulongo umwe, yahagilwa na lobo imonga, yaleke kubwinha kiwenge na kufagila ngʼanda yake na kuzahila nghani, mpaka yayone?

⁹ Na heyo yahayona, kokema mbwiga zake na wakala-behi wayage yowalongela, Dengheni hamonga na niye, kilumbo niyona ija lobo yangu yagile!

¹⁰ Nowalongelani, avo vivo kokuwa na ndengho hamalaika wa Mulungu kwa mzoko wa mwene matozo yumwe yahaikunzula.”

Hala ya mwana yapotele

¹¹ Kalonga, “Munhu yumwe kakala na wanage wabili.

¹² Ayuja imdodo kamulongela tata wake, Tata, ninghe mbagu ya mhiya azo zonda uninghe! Yomana kuwagolela vinhu vyake.

¹³ Hawa baho mazuwa si bwando, aija imdodo kakwegeza vyose, kachola zanza da isi ya kutuli; aka yomana kuzipwililisa vihile vinhu vyake vyose kuli bule na mzoko.

¹⁴ Viyamalile kuvipwililisa vyose viyakalile navyo, nzala nghulu ingila isi ija, ayuja mmhale kasonga mzahilo.

¹⁵ Kachola kamwandama mwene kaya wa isi ija, na heyo kamgala kumgunda wake kuwengha ndigwa nguluwe.

¹⁶ Kakala yosulukila kwigutiza mmibeyu isigale ija yawadile waja iwanguluwe; avo kukala haduhu munhu yamgwelele kinhu.

¹⁷ Viyokala yogesa munda na kitupe chake kalonga, Haa! nyakadala wengahi wa tataangu woja vyakuja na kuvileka, na niye hano nofa na nzala.

¹⁸ Ndoko nihalawe, nhyole kwa tataangu hamulongele, Tata, niye nhoza hachana haulanga na hano hamwako.

¹⁹ Havigambile niye kabili kukemigwa mwanago; nhenda kamba vija vigambile imonga wa nyakadala zako!

²⁰ Kahalawa kachola kwa tataake; viyakalile kutali yokwiza, tataake kamona, kagwa bazi yomana kumkimbilila, kamwamha hasingo, kamnonela nghani.

²¹ Aija imwana kamulongela tataake, Tata, nghosa niye uchana kuulanga na kumwako, havilumbile niye kabili kukemigwa mwanago.

²² Komu tataake kamulongela nyakadala wake, Ngalileni mbwisa guo dizamile, mumvaze, mgeleni na mbete mkidole na vilatu mmigulu!

²³ Mgaleni na ija ngwada yanonile, mkeheni, na tweye tuje na kudenghelela.

²⁴ Kwa mzoko ino mwanangu kakala yafile, na heyo kazuka; kakala yagile, avino koneka; wasonga kudenghelela.

²⁵ Ayuja mwanage imkulu kakala kumgunda; avija viyokala yobwela, na kukwenhuka behi na ingʼanda, kahulika kiyogoyogo cha nyila na mvina.

²⁶ Yomana kukema nyakadala imonga kamuuza, Mzonzo uno uwo ulihi?

²⁷ Kamulongela, Mdodo wako kabwela, na tata wako kamchinjila dija dingwada dinonile, kilumbo kabwela mgima.

²⁸ Kadinhuka umoyo, kalema kwingila mngʼanda; avija tataake kalawa kunze, kamuhembekeza.

²⁹ Kamwidika tataake kalonga, Lola! niye nikutumikila milongo mingahi, sinatoza mbuli zako mazuwa gose.

³⁰ Hunaningha hata chana mbuzi, ndenghe na mbwiga zangu; aino mwanago kabwela yadile vinhu vyako hamonga na migobanya na mizenzeusi, kumkomela ngwada yanonile!

³¹ Kamulongela, Mwanangu, gweye kwa hamonga na niye sikuzose, na vinili navyo vyose vyako.

³² Avo kudenghelela na kutenda mdongwe cheiya vilumba, kilumbo ino mdodo wako kakala yafile, na vino kazuka; kakala yapotele, na heyo koneka.”