Luka 14 - Lagano da Isambi

Vigoda vya kuulongozi

¹ Viyakalile yokwingila siku da ukuhumula mngʼanda ya mkulu imonga wa Mafariseo yaje mandiya, wakala womtunduwila.

² Haulongozi wake kamona munhu mwene utamu wa baridi.

³ Yesu kawauza waja Wana Nzuma na Mafariseo, kalonga, “Vilumba kuhonya munhu siku da ukuhumula, hebu havilumbile?”

⁴ Na hewo wanyamala; kamgoga kamuhonya, kamulaga yachole.

⁵ Kawalongela, “Yuyo yalihi kumwenu mwene mhunda hebu ngʼombe, yahengila mkisima, yaleke kumlava baho hata ihawa siku da sabato?”

⁶ Na hewo hawamwidike mbuli.

⁷ Viyawawene waja wagonekwe wosagula vigoda vya kuulongozi, kawalavila hala kalonga,

⁸ “Uhagonekwa na munhu wize halusona, sukuukale kigoda cha kuulongozi; kwali mmanye mmwanza wawo wagonekwe kamumo mkulu kubanza gweye.

⁹ Yuja yakugoneke gweye hamonga na yuja mkulu yahavika, kokulongela, Mnegele yuno; bahaja kogwa kinyala, vonda ubwezigwe hakisogo chawo wose.

¹⁰ Komu uhagonekwa, chola ukakale kukisogo, giladi mwene kukugoneka vonda yeze, yakulongele, Miyangu, kwenhuka kuja kuulongozi; bahaja kopata nhunizo havihanga vya waja wose wali hana gamandiya.

¹¹ Kilumbo munhu yokitopa mwenyecho, kogelwa kinyala; na yuja yali bule topa mwenyecho, kogelwa nhogo.”

Kugoneka wakiwa

¹² Kamulongela na ija yamgoneke, “Uhatenda mandiya ga imisi hebu ga ichungulo, sukuwagoneke mbwiga zako hebu lukolo lwako hebu ndugu zako wala waja wokala mmabehi nagwe, wene mhiya, kwa mzoko kwiza sukuwakugoneke kabili na gweye, wakulihile!

¹³ Komu uhatenda mandiya, wagoneke wakiwa na walemale, mbetembete na mbugumbugu!

¹⁴ Avo mina kumota, kilumbo wano wabule cha kukuliha, agweye kwiza kolihigwa haja wene ihoko honda wazuswe.”

Lusona lwene gamandiya bwando

¹⁵ Imonga wawo waja wakalile hamonga hana gamandiya, viyahulike higo, kamulongela, “Kamota yuja yondayaje chakuja mundewa wa Mulungu!”

¹⁶ Yesu kamulongela, “Kukala na munhu yateleke mandiya bwando, kawagoneka wanhu bwando.

¹⁷ Kipigiti cha gamandiya vikivikile, kamtuma nyakadala wake, yachole yakawalongele wagonekwe, Izoni, kilumbo vyose vyenela!

¹⁸ Wasonga wose kwihwelezahweleza hamonga; waichanduso kalonga, Nigula mgunda, avo nochola haulole; nokupula sikuunghalalile!

¹⁹ Iyagwe kalonga, Ngula mulongo umwe wa ngʼombe wa kubulula magadi, avo nochola hawageze; nokupula, sikuunghalalile!

²⁰ Iyagwe kalonga, Ndawila mmhambe, avo honda nize.

²¹ Yuja nyakadala kabwela, kampetela mndewa wake ago gose; baho mwene ngʼanda kagwa lusango, kamulongela nyakadala wake, Lawa mbwisa ugende mzinzila nghulu na mnzila ndodo, uwagale hano wakiwa na walemale, mbugumbugu na mbetembete!

²² Nyakadala ija kamulongela, Mndewa, goundagize gose nigasanghana, komu ingʼanda hainamema.

²³ Mndewa kamulongela nyakadala wake, Lawa uvike kunzila na mmambwegambwega, ukawadoheleze kwingila, ngʼanda yangu imeme!

²⁴ Kwa mzoko nomulongelani, wambigalo waja wagonekwe haduhu hata imonga yonda yavilanze vyakuja vyangu.”

Kupeta mhiya za zengo hebu za nghondo

²⁵ Madale bwando ga wanhu vuwailongoze hamonga na Yesu, kawahindukila kalonga,

²⁶ “Munhu yaheza kumwangu, kamba hamwihile tata wake na mamaake na sano jake na wanage, na ndugu zake wa kimbigalo na wa kitwanzi, na kwihila loho yake mwenyecho, hadaha kugalamka mwanahina wangu.

²⁷ Na heyo yalekile kusola msalaba wake na kuminza niye, hadaha kugalamka mwanahina wangu.

²⁸ Kwa mzoko yalihi mmwanza wenu yolonda kuzenga ngʼanda tali, yaleke tanhu kupeta mhiya za zengo kamba zenela?

²⁹ Kilumbo yahasonga kwika mhwambaza, yahalemelwa kuimambukiza, ilawa baho wose wahavona womtendela uponela wolonga,

³⁰ Munhu ino kasonga kuzenga, na heyo kalemelwa kuimambukiza.

³¹ Hebu mndewa yalihi yahagenda kuli nghondo yakaihume na mndewa miyage, yaleke kukala tanhu yagelegeze kamba kodaha kuwatuma asikali wake elfu kumi, waitinghanile na yuja yomwizila na sikali elfu ishirini?

³² Kamba hadaha, kotuma usenga kwa yuja iyagwe yahali hamwande, yazahile ulamuzi.

³³ Avo vivo kuduhu munhu kumwenu yodaha kugalamka mwanahina wangu, kamba halekile vyose viyali navyo.

³⁴ Mkele unoga; komu mkele uhagilwa na ukali wake, chogeligwa choni kikolele?

³⁵ Haunoga kumgunda hebu kumhugutu, komu wasigwe kunze; mwene magwiti ga kuhulika nayahulike!”