Luka 13 - Lagano da Isambi

Mgaluko

¹ Kidami kicho wakala baho wanhu wampetele mbuli za waja Wagalilea, senhambo Pilato yahanganye mulopa wao na nhambiko zao.

² Kawedika kawalongela, “He, mokwagiza kamba waja Wagalilea wakala na tozo kuwabanza Wagalilea wose, kileka wandamwe na janga dino?

³ Nomulongelani, Ilawahi! kamba hamwiyalale, mweye mose kwiza mokwangamila vivo.

⁴ Hebu waja mulongo umwe na wanane wagwilwe na didungu dija ja Siloamu diwakoma, mokwagiza kamba waja wakala watozile kubanza wanhu wose wakalile Yerusalemu?

⁵ Nowalongelani, Isatuka hiyo! kamba hamwinyanyanhe, mweye mose mokwangamila vivo.”

Mkuyu haulelaga mujo

⁶ Kalava hala kalonga, “Munhu yumwe kakala na mkuyu uhandigwe hagati ja mgunda wake wa mitongolo, kagenda kazahila mujo muja mumkuyu, hauwene.

⁷ Kamulongela kisepi wa umgunda wa imitongolo, Lola miyaka midatu ino niza nozahila mujo mdibiki dino, aka sipatile kinhu; avo ukanhe, viyema hasi ogela sesela.

⁸ Kamulongela, Bwana, uleke mwaka uno tanhu, niuhalilile, niugelele mhugutu.

⁹ Uhalela mujo vokuwa goya; aka, vinguzaza, chei ukanhe basi.”

Mtwanzi yabongomale kahonela sabato

¹⁰ Siku imonga ya sabato Yesu kakala yolanguliza mngʼanda ya nhambiko,

¹¹ Muja mngʼanda mkala na mtwanzi mwene mzuka wa udodwa, umgogile miyaka mulongo umwe na minane, avo kakala yabongomale, hadahile kugoloka ngʼo.

¹² Yesu viyamuwene, kamkema kamulongela, “Mamo kufunguligwa uno udodwa wako!”

¹³ Kamwikila mikono mditwi jake; mhunde baho kagoloka, kamtogola Mulungu.

¹⁴ Komu mkulu wa ngʼanda ya nhambiko kamonela Yesu lusango, kilumbo kamuhonya siku da ukuhumula, kedika kawalongela wanhu wakalile mumo, “Vigamba siku sita za kusanghana, avo mwize siku hizo muhonyigwe, komu sukumuhonyigwe siku da kuhumula!”

¹⁵ Mndewa kamwidika kalonga, “Mweye iwabala, mweye mose hamfungulaga ngʼombe au mhunda zenu mkikwama siku da ukuhumula na kuwagala kumazi wangʼwe?

¹⁶ Komu yuno yagambile mwana wa Abrahamu, havimwandame kufungulilwa siku da ukuhumula kifungo kino, Mwenembago kiyamfungile mulongo umwe na minane?”

¹⁷ Viyalongile hivo, wose waja wokala wobamila, wagwa kinyala, komu wanhu wayagwe wose wadenghelela vinzonza vinogile vija vitendigwe na Yesu.

Mbeyu ya mvule

¹⁸ Kalonga, “Undewa wa Mulungu ulingana na choni, kabili niulinganye na choni?

¹⁹ Ulingana na mbeyu ya mvule, yaisolile munhu kaihanda mumgunda wake, nayo yakula yogalamka biki, viyemela ndege wa uchana wahumula muli gamatambi gake.”

Hala ja mhumba

²⁰ Kabili kalonga, “Undewa wa Mulungu niulinganize na choni?

²¹ Ugalamka kamba mhumba, yaisolile mtwanzi, kaihanganya na mhishi ndatu za usage, ilawa baho usasa wose.”

Mlango msisili wondauhindigwe

²² Na heyo katenda uchozi, kachola Yerusalemu, kabita mviwambo na vibuga yolanguliza wanhu.

²³ Munhu imonga kamuuza, “Mndewa, wanhu wonda walokoke honda wawe bwando?”

²⁴ Kawalongela, “Gombeleni kwiza mwingile mlango msisili, kilumbo nowalongelani, bwando wonda walonde kwingila, komu honda wadahe.

²⁵ Ilawa baho mwene ngʼanda vonda yenuke kuufunga mlango, baho honda msonge kwima wima kunze na kugongʼonda mlango, kuno mlonga, Mndewa, Mndewa, tuvugulile! Na heyo kokwidika yowalongela, Siwatangileni mweye kumulawa!

²⁶ Baho mosonga kulonga, tuja tungʼwa hakihanga chako, na gweye kutulangukiza mvibuga vyetu!

²⁷ Baho kowalongelani mweye, Siwatangile kumulawa, gobokeni kumwangu mose mtendile gehile!

²⁸ Kuko konda kuwe kililo na kugegeda meno, honda muwone kina Abrahamu na Isaka na Yakobo na Watulandagu wose wamumo muna Undewa wa Mulungu, na mweye wenyego mokiyona mwasigwa kunze.

²⁹ Wabaho wonda walawe kulawilo na kuswelo wa dizuwa, kusongela mwambu uno kuzigila mwambu uja, hewo wokala hana gamandiya muna Undewa wa Mulungu.

³⁰ Loleni wa ikimambukizo wogalamka wa ichanduso, na waja wa ichanduso wogalamka wa ikimambukizo.”

Kizongo Herode; Yerusalemu ukomaga walaguzi

³¹ Kimilo kikija Mafariseo wayagwe wamgendela, wamulongela, “Lawa hano, uchole hanhu hayagwe, kilumbo Herode kokuzahila yakukome.”

³² Kawalongela, “Gendeni mkamulongele yuja kizongo, Lola lelo na mayo nowinga vinyamkela na kuhonya watamu; kisindo igangu goiduganya, nogangamala.

³³ Komu lelo na mayo na kisindo vinyandama kuchola, kilumbo havilumbile Mlaguzi yakomwe kunze ya Yerusalemu.

³⁴ Gweye Yerusalemu, Yerusalemu, ukomaga watulandagu, na kuwatowa na mabwe watumigwe kumwako; miyanza mingahi nondile kuwakwega wanago, kamba vija nguku viyokwegeza vyanage mzimbawa zake, komu hamvilondile.

³⁵ Teganyeni, amba avo mulekelwa Dingʼanda jenu; na niye nowalongela, honda mmbone kabili ngʼo, komu siku ija yonda mulonge, Yatunizwe Yokwiza mditwaga da Magana!”