Luka 12 - Lagano da Isambi

Mhumba ya Mafariseo

¹ Madale ga wanhu mizo kwa mizo vuwalundile, kuno wokibojaga, kasonga tanhu kuwalongela wanahina zake, “Teganyeni na mhumba ya Mafariseo, vyemela uwo uzenzeleganye!

² Haduhu kinhu kifisigwe kwiza kileke koneka, hebu kiifisile kileke kutangika.

³ Avo gose gamsongile Kiziza, gohulikwa habumuke, na gaja gampetile hagutwi da munhu mngʼanda kugati, gobwililiswa uchana ha zingʼanda.

Sukumdumbe wene kukoma zinghuli ziyeka

⁴ Na niye nomulongelani, mweye mbwiga zangu, sikumuwadumbe awo wokoma zinghuli, ilawile baho hawadaha kutenda diyagwe.

⁵ Komu nowalagusila ayo Yonda mumdumbe; mdumbeni Ija Yahamala kumkoma munhu, kodaha na kumwasa mkolongo ja moto; avo nomulongelani, Iyo yuyo mumdumbe!

⁶ Chei, videge vitano haviguligwa kwa vigebe vibili? komu hata kimonga chao hakisemwezigwa hakihanga cha Mulungu.

⁷ Kileka na azo mvili zenu za mpala zipetigwa zose; avo sukumdumbe, mweye mbanza videge bwando.

⁸ Komu niye nomulongelani, munhu yonhogola hawamemile wanhu, Mwana wa Munhu na heyo komtogola hawamemile malaika wa Mulungu.

⁹ Na munhu yahambela hakihanga cha wanhu, Mwanage Munhu na heyo kombela hakihanga cha malaika wa Mulungu.

¹⁰ Munhu yoyose yonda yalonge mbuli ya bamila kwa Mwanage Munhu, kosegezelwa tozo jake; komu ayo yonda yamulonge gehile Loho Yangʼalile, honda yasegezelwe tozo jake.

¹¹ Aho honda wamgaleni mzingʼanda za nhambiko hebu muna ivitala na ha wakulu giladi mtaguswe, sikumdungwedungwe, mgelegeza gaja ga ukulonga na kwigombelezela.

¹² Kilumbo kipigiti kija Loho Yangʼalile kowalangukizani gaja ga ukulonga.”

Kuwila ulisi; mwene ndigwa bwando

¹³ Munhu imonga muja muna gamadale kamulongela, “Mkulufunzi, mulongele ndugu yangu yagole uja ulisi wetu!”

¹⁴ Kamulongela, “Munhu gweye, yalihi yanikile niye niwe mlamuzi au mgozi kumwenu?”

¹⁵ Kawalongela, “Loleni mwitunze na choyo, kwa mzoko ugima wa munhu haulawa mvinhu vyake vihawa bwando, viyali navyo.”

¹⁶ Kawalavila hala kalonga, “Gunda da munhu imonga mwene mhiya dilela nghani.

¹⁷ Kandusa kugelegeza munda na kitupe kalonga, Nhendeze, kilumbo nabule hanhu ha kulundiza ndigwa yangu.

¹⁸ Kalonga, Nhende vino, niibomole mikano yangu, ilawa baho nizenge iyagwe mikulu ibanzile, na himo nokwika ndigwa zangu zose na vinhu vyangu.

¹⁹ Nihaziga nokilongela ni mwenyecho, Kuna vinhu bwando goya, viuwikile muumbili mmilongo bwando; haya humula, uje ungʼwe, udenghe!

²⁰ Bali Mulungu kamulongela, Kwa mbozi gweye, ikilo didi lelo woilonda loho yako; na vinhu vuwikile umbili, vyokuwa vya nani?

²¹ Avo vivo ili kamba munhu yokwikila ndigwa zake umbili, yolema kuulimbika muzo wake kwa Mulungu.”

Sukumgaiye upile wenu

²² Kawalongela wanahina wake, “Avo nomulongelani, sikumgadukile upile wenu mulonge, Toja choni, hebu sikumgadukile nghuli zenu mulonge, Tovala choni?

²³ Kilumbo upile ubitaga ndigwa, na lukuli lubitaga nguwo.

²⁴ Gelegezeni mabondwa, hawahandaga hebu hawahunaga; wabule kano hebu hanhu ha kwikila, komu Mulungu kowegusa na hewo; che, mweye hambanzile ndege hakulu?

²⁵ Avo kumwenu yalihi yadahile kwigaza giladi yongezele milongo yake ivike kamba mhima?

²⁶ Avo gayagwe habali mgagaiya; kumbe hamdaha kusanghana hata kili kidodo?

²⁷ Gelegezeni maluwa kamba vigokula; hagasanghana hebu hagakutika; na niye nowalongela, wala Salomo muna iyenzi yake yose havazigwe vinogile vigambile dimwe da maluwa ago.

²⁸ Avo Mulungu yahaivaza hivo milolo ya muhulo, ikalaga lelo dino, mitondo yokwaswa hamoto, chei, habanza nghani kumvazani mweye wene nhamanilo ndodo?

²⁹ Avo mweye sukumuuze, Tuje choni hebu tungʼwe choni, wala sukumwidundule!

³⁰ Kwa mzoko ago gose wanhu wose wa muiisi wogazahila; bali Tata wenu kavimanya kamba gago msulukila.

³¹ Komu uzahileni tanhu undewa wa Mulungu na ago gose momemezelwa.

Mugonelele kuno mombeta mndewa wenu

³² Sukumdumbe mweye kidonzi kidodo, kilumbo Tata wenu kanogelwa kumwinghani uja Undewa.

³³ Gulizeni vumuli navyo, mulave nhosa; ishoneleni mikwizi hailalaga, giladi mkekile kuulanga umbili hauhungukaga, ako hakuvika mbavi hebu mhalata yabanange.

³⁴ Kilumbo bikilo jenu hadili, baho honda ikale na miyoyo yenu.

³⁵ Idazeni mvigudi vyenu, na taa zenu zakege!

³⁶ Na mweye mgambe kamba wanhu wobeta mndewa wawo, vonda yabwele kulawa mmhambe, giladi vondayeze yotenda hodi, mhunde wamvugulile.

³⁷ Wamota waja nyakadala wagambile, mndewa wawo vondayeze kowavika meso; ihoko nomulongelani, kokifunga lukumbulu na kuwagomela hana gamandiya, kuno yowatumikila.

³⁸ Viyemela yaheza kimilo chekabili hebu chekadatu, yawavike vivo, wamota nyakadala awo!

³⁹ Komu ditangeni longa dino, kamba mwene ngʼanda mana yakitangile kipigiti chonda yeze mbavi, yahakalile meso giladi ngʼanda yake sikwibomolwe.

⁴⁰ Na mweye kaleni meso, kwa mzoko Mwana wa munhu kokwiza kipigiti chonda mleke kugelegeza!”

Miyawi ya mtunza mali yali mkungulufu

⁴¹ Petro kamulongela, “Mndewa, hala hijo kotulongela tweye twiyeka, hebu wanhu wose?”

⁴² Mndewa kalonga, “Yalihi mtunza mali mkungulufu na mwene zifiyuko – ayo mndewa wake yamwinghile ukulu wa kuwengha wayage chakuja mkipigiti chawo?

⁴³ Kamota nyakadala ija yogamba, mndewa wake yaheza, yamvike yosanghana higo!

⁴⁴ Ihoko nomulongelani, komwika yawe mkulu wa vinhu vyake vyose.

⁴⁵ Komu nyakadala ija yahalonga munda na kitupe, Mndewa wangu heza kokawa, na heyo yasonge kuwatowa wayage wambigalo na watwanzi, yoja yongʼwa na kukoligwa,

⁴⁶ mndewa wake nyakadala hiyo kokwiza zuwa yalekile kuditanga, na kipigiti yalekile kukimanya, komkanha nyenza mbili, na kumwika hamonga na waja wali bule nhogo.

⁴⁷ Nyakadala ija yazitangile ngelegeza za mndewa wake, yalekile kwika goya hebu kusanghana manogelwa gake, kosunigwa nghani.

⁴⁸ Komu yuja havimanyile, heyo kagatenda gagambile kutowigwa, kosunigwa hadodo; kilumbo yuja yagolelwe bwando, kumwake ayo volondigwa bwando; na yuja yongezelwe bwando nghani, kumwake ayo volondigwa bwando nghani.

Kwasa moto muisi, ama tindiwalo

⁴⁹ Niye niza kwasa moto muisi; kamba uhaka, choni kibanzile kinilonda?

⁵⁰ Komu vinyandama nisingulwe, na niye nogaduka vilihi giladi honda uzige!

⁵¹ He, mokwagiza kamba niza kugala tindiwalo muisi? aka mbe, nomulongelani, komu mmwagemwage!

⁵² Kwa mzoko ilawile vino, ngʼanda imwe okuwa mumo wanhu wanhano, mmwagemwage wadatu kwa wabili, na wabili kwa wadatu.

⁵³ Mmwagemwage tata na mwanage, mwana na tataake, mamo na mwanage wa kitwanzi, mwana wa kitwanzi na mamaake, mkwe wa munhu na mkwe wake, mkwe na mkwe wa munhu.”

Kutambula vitango vya Yesu na kwiduganya

⁵⁴ Kawalongela madale, “Kamba muhona mibingu isimbuka kulawilo, mhunde molonga, mvula kokwiza, na vivo ili.

⁵⁵ Kamba ubeho uhabuma kikomo cha msimu, molonga, kokuwa zuwa kali, na vivo ili.

⁵⁶ Wazenzeleganye mweye, mvitanga kutambula kihanga cha isi na ulanga; vilihi hamtambula milongo ino?

⁵⁷ Habali mweye wenyego hamulamula gali ihoko?

⁵⁸ Kwa mzoko uhaikoleleza na mdwanzi wako kwa mkulu wa ikitala, aho hamnzila iyohe kwiduganya nayo, giladi sikuyeze kukukwekwesa kwa mwene kitala, na mwene kitala sikuyakugele mmikono ya mtowa mbongho, na heyo mtowa mbongho yakugele mkifungo.

⁵⁹ Nokulongela, honda ulawe himo ngʼo, hata vonda umale kuliha lugebe lwa mwisho.”