Luka 10 - Lagano da Isambi

Yesu kagala wanahina sabini

¹ Ilawa baho Mndewa kasagula wayagwe milongo saba, kuwalongoza wabili wabili wengile mviwambo vyose na hanhu hose hayasulukile kuchola mwenyecho.

² Kawalongela, “Ndigwa iyo bwando, komu wosanghana wadodo; avo mwileni Mndewa wa Indigwa, yawagale wasanghana wahune muna indigwa yake!

³ Gendeni, teganyeni nowagala kamba wananghondolo hagati ya mibwaluwala.

⁴ Sukumsole mkwizi wala mkoba wala vilatu, wala sukumlamuse munhu mnzila!

⁵ Na ngʼanda yoyose yonda mwingile, tanhu longeni, Tindiwalo na diwe muno mngʼanda ino!

⁶ Kamba yahawa mumo mwene tindiwalo, tindiwalo jenu dokiduganya; komu kamba mduhu, tindiwalo dombwelelani wenyego.

⁷ Avo kaleni mngʼanda iyo, muja na kungʼwa vumgolelwa, kilumbo msanghana kazi vimwandama kugolelwa kitumetume chake; sukumkale ngʼanda ino na ngʼanda ino!

⁸ Muhengila mkiwambo chochose nawo wahambokelani, diyeni chonda wamwingheni!

⁹ Wahonyeni wolumwa wali mumo na kuwapetela, Undewa wa Mulungu wammabehi kumwenu!

¹⁰ Bali mviwambo mose vonda mwingile kamba hawambokeleni, laweni mmwao, mchole halubuga mulonge,

¹¹ Vyemela timbwisi ja lubuga lwenu lunanahile mmigulu yetu, towakungʼunhilani mweye; bali ago mgatange, Undewa wa Mulungu ukala behi kumwenu!

¹² Nomulongelani, Siku dija da Mtaguso kiwambo cha Sodoma chopata gabuhile kubanza kiwambo kija.

Viwambo vija vimlemile Yesu

¹³ Kojona gweye Korazini, kojona gweye Betisaida! Kilumbo vilolomboto vija visanghanilwe kumwako, maza kamba visanghanwe muiisi ya Tiro na Sidoni, wahagaluke mwaka na kuvala magunia na kubakala mitozi.

¹⁴ Bali hana ikitala viwambo vya Tiro na Sidoni vyopata usungu mdodo kubanza uja uwenu.

¹⁵ Na gweye Kapernaumu, kokwenezwa kuulanga? Kohumuluswa uvike kuzimu!

¹⁶ Aija yomuhulikani mweye, konihulika niye, na heyo yomzelani mweye, konizela niye; na heyo yonizela niye, komzela Yuja Yangalile.”

Kimu kikulu cha kudengha

¹⁷ Baho waja wanahina milongo saba wabwela wodenghelela, walonga, “Mndewa, vyemela vinyamkela wotudumba mtagwa jako!”

¹⁸ Kawalongela, “Nimona Mgezawanhu Mwenembago kagwa yolawa kuulanga, yogamba lumwemwe.

¹⁹ Lola nimwinghani mhiko za kubojaga mizoka na inge na nhanzi zose za yuja Kidunyu, avo haduhu kinhu chonda kimbanangeni.

²⁰ Komu sukumdenghe kilumbo cha waja vinyamkela vomdumbani, bali dengheleleni kilumbo matagwa genu gandikigwa kuulanga!

²¹ Kipigiti kikija Yesu kadenghelela mloho Yangʼalile kalonga, “Nokutuniza Tata, Mndewa wa Ulanga na Isi, kilumbo manzonza gano kuwafisa wene fiyuko na ngelegeza, kuwagubulila ivinghele; ona Tatavivo vikunogele Gwegwe.

²² Vyose ngwelelwe na Tata wangu, avo haduhu yamtangile Mwana bali Tata, kabili hadudu yamtangile Tata bali Mwana, na yoyose yonda yamnogele Imwana kumgubulila.”

²³ Kawahindukila wanahina wake vuwakalile waiyeka, kawalongela, “Gamota gameso golola gomulola mweye!

²⁴ Kilumbo nomulongelani, watulandagu bwando na watawala bwando wasulukila kuvyona vumbona mweye, komu hawagawene; wasulukila kugahulika gomuhulika mweye, na hewo hawagahulika.”

Hala ya Msamaria mwene dibazi

²⁵ Baho mwanataguso imonga kema yamgeze, kalonga, “Mlangukizi, nhendeze, kileka na niye ningile kuugima wa digunge?”

²⁶ Kamulongela, “Che, yandikigwa vilihi muna Inzuma; kosomaze?”

²⁷ Kedika kalonga, “Mnogele Mulungu Mndewa wako kwa moyo wako wose na kwa loho yako yose na nhanzi zako zose na nzewele zako zose, na miyago yuuli nayo habehi, kamba vuwinogele mwenyecho!”

²⁸ Kamulongela, “Kwidika goya; tenda vivo, na gweye kokuwa mpile.”

²⁹ Bali heyo kalonda kwitopa mwihoko, kamuuza Yesu, “Na mkalabehi yuyo yalihi?”

³⁰ Yesu kedika kalonga, “Munhu imonga kahulumuka kulawa Yerusalemu kugenda Yeriko, kedukila yogwila mwa mibokonyo, wamana kumvula nguwo, wamgela milonda, aho wagenda na zao, wamuleka baho yodwefulila.

³¹ Soloka mtambika imonga na heyo kahulumuka na nzila iija; viyamuwene, kabita kumngwazo.

³² Na Mlawi na heyo vivo, viyavikile haja kamona, yomana kubita kumngwazo.

³³ Mhunde Msamaria imonga nayo mmwanza wake kavika bahaja hayali, viyamuwene kamonela bazi.

³⁴ Kamkwenhukila, yomana kumfungiliza ija imilonda, kaigela mavuta na divai, kamkweneza mmhunda wake, kamseseza kuli ingʼanda yawavikilaga wabitanzila, kuno yomuhundahunda.

³⁵ Hata siku da ikabili kalava lupiya mbili, kamwingha mwene ngʼanda ija ya wabitanzila, kalonga, Muhundehunde goya ino, na chochose chondawage kibanzile, niye nihabwela nokuliha.

³⁶ Kokonaze kwa wano wadatu, yalihi yali behi na yuja yagwile mwa ija mibokonyo?”

³⁷ Kalonga, “Aija yamonele dibazi.” Yesu kamulongela, “Genda na zako na gweye, katende gago!”

Marta na Maria mdodo wake hiko Betania

³⁸ Viyakalile yochola kengila hagati ya kiwambo kimonga, na mtwanzi imonga tagwa jake Marta, kamgomela mngʼanda yake.

³⁹ Na heyo kakala na mdodo wake yokemigwa Maria; ayo yomana kukala behi na migulu ya Yesu, kuno yomtegeleza ulonzi wake.

⁴⁰ Aija Marta ima yagaduke na sanghana bwando; kamgendela kalonga, “Mndewa, huvona kamba viha vino, ayuno mdodo wangu vyonileka nigaduke niiyeka? Mulongele yanhaze!”

⁴¹ Mndewa kamwidika yolonga, “Marta, Marta, kogaduka na kiyakiyaki kilumbo cha vinhu bwando.

⁴² Amba kigesigwa kinhu kimonga. Maria kadizahila vunge dinogile, vilema honda yabokwe.”