Luka 1 - Lagano da Isambi

Luka viyomulamusa Teofilo

¹ Kwa kilamso wanhu bwando walongola kwandika kwa ugaluga mbuli zija zitendeke kumwetu,

² vilema hizo zitwinghigwe na waja wakalile wazilola na meso gawo, kileka wagalamke wasanghani wa Longa didi;

³ kileka na niye diningila mmoyo, gwe Teofilo wa nhogolwa, nikupetele goya zose zinghalile nizizahila zigambile kulawa ikilongozi,

⁴ giladi gweye umanye magambo ga mbuli zino zuufundigwe.

Zakaria na Elisabeti walagusilwa mwana

⁵ Aiho milongo ya Herode Mndewa wa Uyuda kukala na mtambika imonga, tagwa jake Zekaria, kakala yokwaliza ibiya ya Abiya, na sano jake kalawa lukolo lwa Aroni, tagwa jake Elisabeti.

⁶ Hewo wose wabili wakala na nhogolwa kwa Mulungu, wokoleleza muna zindagizo zose za Mulungu na kuzitogola sikuwabezwe.

⁷ Na hewo wakala bule mwana, kilumbo Elisabeti kakala fulwe, na hewo wose wabili wavyele nghani vuwakalile.

⁸ Basi viyakalile yosanghana kwa ugaluga wa ibiya yake kukihanga cha Mulungu,

⁹ dimgwila siku ja ukwingila heyo mdingʼanda da Mulungu na kuvukiza uvumba kwa luto lwa kutambika.

¹⁰ Na didale da wanhu wakala wopula kunze kidami kija cha ukuvukiza.

¹¹ Kalawililwa na malaika wa Mulungu, kema lwenza lwa ukulume lwa hanhu ha ukuvukizila.

¹² Kagudema Zekaria viyamuwene, woga dimwingila.

¹³ Malaika kamulongela, “Sikuudumbe, Zekaria, kilumbo kupula kwako kuhulikwa, sano jako Elisabeti kokulelela mwana, na tagwa komkema Yohana.

¹⁴ Na gweye kodengha na samhuko kilumbo chake, na bwando wonda wadenghelele kwa kuleligwa kwake.

¹⁵ Heyo kokuwa mkulu haulongozi wa Bwana, kabili honda yangʼwe ugimbi ao ngholwa, komu komemezwa Loho Yangalile yahali muiinda ya mamo wake.

¹⁶ Na bwando mumo mwa Wana Israeli kowabweza kwa Mulungu wao.

¹⁷ Kolongola kumwake, yali na loho na mhiko za Eliya, kwidohola imioyo ya tata kwa iwana, kuwengha walemile fiyuko za watogolwa na kumwikila Mndewa lukolo lutendigwe goya.”

¹⁸ Zekaria kamulongela malaika, “Nozitangaze hizo, kilumbo niye mvyele, na sano jangu kivyele muna imilongo yake?”

¹⁹ Kedika malaika kamulongela, “Nene Gaburieli, nimaga hamwake Mulungu, na niye nhumigwa kulonga nagwe na kukupetela mbuli zino zinogile.

²⁰ Na gweye tegeleza hudaha kulonga konyamala mbaka disiku jonda gawe gano, kilumbo hutogole malonga gangu, gago gonda gavikizwe kikomo chake.”

²¹ Na didale dikala dimbeta Zekaria na kukanganya vyokawa mdihekalu.

²² Aluja luyalawile kalemelwa kulonga mbuli, aho wamtambula kamba kalawililwa na nhuko mdihekalu. Yomana kuwahungila mkono kilumbo kagalamka bubuwi.

²³ Imala viyamalile mazuwa ga sanghana yake, kachola ukaye kumwake.

²⁴ Avo hazibitile siku bwando sano jake Elisabeti kasola inda, kefisa miyezi mitano yolonga,

²⁵ “Avo Bwana viyanhendele milongo iija viyandolese giladi yakisegeze kinyala changu kwa iwanhu.”

Malaika Gabrieli kandawilila Maria

²⁶ Mwezi wa inhandatu Malaika Gaburieli katumigwa na Mulungu yagende kukiwambo cha Galilea, tagwa jake Nazareti;

²⁷ kwa mwanamwali yakalile yasoligwe na mbigalo tagwa jake Yosefu, yali wa lukolo lwa Daudi, na mwali ija kakemigwa Maria.

²⁸ Ija malaika kengila mngʼanda yake kalonga, “Hongelaga Ugwelelwe imhome, Mulungu ka hamonga nagwe!”

²⁹ Na heyo kasinhuka nghani kwa malonga gake, kagelegeza, Lamuso gani dino?

³⁰ Malaika kamulongela, “Sikuu-dumbe Maria, gweye kumota hakihanga cha Mulungu.

³¹ Lola kosola inda, kolela mwana mbigalo, komkema tagwa jake Yesu.

³² Ino kokuwa mkulu, kokemigwa Mwanage Yali Uchana nghani, na Mndewa Mulungu komwingha kigoda cha undewa cha tata wake Daudi;

³³ yaidawale ngʼanda ya Yakobo digunge na digunge, na mdawalo wake honda uzige.”

³⁴ Maria kamulongela malaika, “Dokuwaze buli dino, na niye simtangile mbigalo?”

³⁵ Malaika kedika kamulongela, “Loho Yangʼalile kokwizila, na Mhiko zake Yali Uchana nghani zokugela kimvuli, kilumbo hicho yuja yonda yaleligwe nagwe kokemigwa Mwana wa Mulungu.

³⁶ Tegeleza avo Elisabeti mbwiga wako na heyo kana inda ya mwana mbigano muvyele wake, na mwezi uno wa inhandatu heyo yakemigwe fulwe.

³⁷ Chanduso haduhu mbuli ilekile kudahika kwa Mulungu.”

³⁸ Maria kalonga, “Lola niye hano, niye na mtumwa wa Bwana, gamhate higo kamba vuutangile.” Ilawa baho ija malaika kahalawa.

Maria kamkagula Elisabeti mvigongo vya Uyuda

³⁹ Baho mazuwa gaja Maria kagenda chambwisa kuvigongo kukiwambo kimonga cha Uyuda.

⁴⁰ Kengila mngʼanda ya Zakaria, kamulamusa Elisabeti.

⁴¹ Avija viyahulike Elisabeti kilamuso cha Maria, kazumha imwana ikinghele munda mmwake, kamemezwa Loho Ingʼalile Elisabeti.

⁴² Kalava dizi na mhiko yolonga, “Kunogelwa gweye mulukolo lwa iwatwanzi, nawo unogelwa uleligwa wa inda yako!

⁴³ Kabili dilawa kwahi nzonza dino dimhatile, mamo wa Mndewa wangu yanizile niye?

⁴⁴ Lola vidiningile mgutwi dizwi ja kundamusa kwako, kazumha mwana kinghele munda mmwangu kwa kudengha.

⁴⁵ Kumota gweye utogole kamba govikizwa higo gaulongelwe na Bwana!”

Lwila lwa denghelelo lwa Maria

⁴⁶ Maria katanga, “moyo wangu womtogola bwana,

⁴⁷ Na loho yangu yomdenghelela Mulungu Muhonya wangu.

⁴⁸ Kilumbo kaulolesa goya udodo wa kitumwa chake; lulawile dilelo ngholo zose wonhambula nimota.

⁴⁹ Kilumbo Heyo Yali imgaga kanhendela makulu, na tagwa jake dingʼala.

⁵⁰ Na bazi jake dikala mumo lukolo na lukolo kumwao womdumba.

⁵¹ Katenda mihiko na mkono wake, kawapwililisa wali na ichodo muna gamagelegeza ga mioyo yao.

⁵² Kagedebula iwakulu muna ivigoda vyao, kawatuniza iwadodo.

⁵³ Wali na inzala kawegusa vinhu vinogile; wali na gamali kawasegeza mikono ili bule.

⁵⁴ Kamtaza Isiraeli mtumigwa wake, yakumbukile unogelwa.

⁵⁵ Kamba viyawalongele tatazetu, Aburahamu na ulelwa wake milongo yose.”

⁵⁶ Maria kakala kumwake kamba miyezi midatu, kabwela kungʼanda yake.

Yohana mlaguzi viyaleligwe

⁵⁷ Elisabeti kavikiza milongo ya kulela, kalela mwana mbigano.

⁵⁸ Wahulika iwambwiga na wayage vuwakalaga, Miyenu kamemezelwa unozi wa Bwana; wadenghelela hamonga na heyo.

⁵⁹ Vidivikile siku denane, weza kumwingiza kumbi imwana, walonda kumkema tagwa ja tata wake Zakaria.

⁶⁰ Kedika mamo wake kalonga, “Si vivo, komu kokemigwa Yohana.”

⁶¹ Wamulongela, “Kuduhu munhu mulukolo lwako yokemigwa tagwa hijo!”

⁶² Wamgendela tataake kumuuza, Kolonda yakemigwe nani?

⁶³ Kalonda kibao kandika, “Yohana dijo tagwa jake.” Wakanganya wose.

⁶⁴ Mhunde kadoholelwa mulomo na lulimi lwake, yolonga na kumtogola Mulungu.

⁶⁵ Woga diwengila wose wakalile behibehi na hewo; gabwililika malonga gano bwilili mmigongo mose ya Uyuda.

⁶⁶ Wose wagahulike wageka mmioyo mmwao walonga, “Mwana ino kogamba mwana waki?” Kilumbo mkono wa Mulungu wahamonga na heyo.

Lwila lwa ndagu lwa Zakaria

⁶⁷ Imala baho tataake Zakaria kamemezwa Loho Ingʼalile, kalonga kindagu:

⁶⁸ “Yatunizwe Bwana, Mulungu wa Israeli, kwa kilamso kawalolesa na kuwatendela kihonyezi lukolo lwake.

⁶⁹ Katusimikila mhembe ya honelo mngʼanda ya Daudi mtumigwa wake.

⁷⁰ Kamba viyalongile aho ichanduso kwa milomo ya Walaguzi wake wangʼalile:

⁷¹ Giladi tudoholwe mmikono ya wandumu zetu na muna wose watwihile.

⁷² Vilema yawonele bazi tatazetu na kukumbukila lagano jake dingʼalile;

⁷³ kiduwilo kiyamduwilile Aburahamu tata wetu;

⁷⁴ Kamba kotwingha tweye tuhehulwa mmikono yawo watwihile,

⁷⁵ Tumsanghanile haduhu kingwaya, muna ukungʼala na mwikweli hakihanga chake siku zetu zose.

⁷⁶ Na gweye gomwana kokemigwa Mlaguzi wake Yali Uchana nghani, ulongole kulongozi wa Bwana kuzitenda nzila zake.

⁷⁷ Avo kowatambulila wanhu wake uhonelo kwa kusegezelwa matozo gawo.

⁷⁸ Kilumbo cha dibazi diyatwonele Mulungu wetu, uzelu ulawa uchana utuvikila.

⁷⁹ Vivo uwamulikila wokala mdiziza na muna kimvuli cha kudanganika, na kuilongoza migulu yetu muna inzila iholile.”

⁸⁰ Ija imwana kakula, kongezeka mihiko mwiloho, kakala kuluwala mbaka aho honda yalawilile Waisraeli.