LUGUBULO 9 - Lagano da Isambi

Mhalati ya 5: Yosi na nzige zilawile mkolongo da kuzimu

¹ Malaika wainhano viyaitatalise ija imhalati yake, niyona nhondo ikalile igwa hasi kulawa kuulanga, ayo inghigwa lufungulo lwa kolongo da kuzimu.

² Kadifungula kolongo da kuzimu, dimana kulawa yosi muja mkolongo kamba yosi da some kulu, na zuwa digeligwa ziza kwa kilumbo cha dija diyosi dilawile mkolongo.

³ Na muja muna diyosi mulawa nzigwe, wagubika iisi, wagolelwa mhiko kamba inge wa muisi vuwali na mhiko.

⁴ Walongelwa, Sikumbanange milolo ya muisi hebu kinhu chochose kili kibisi, hebu mibiki yoyose, bali mbanange wanhu waja wayeka walibule utango wa Mulungu mvihanga vyao.

⁵ Hawalagizwe kuwakoma, bali wawagaduse miyezi mitano; na usungu hiwo ugamba kamba usungu wa inge yahamuluma munhu.

⁶ Mazuwa higo wanhu wozahila kudanganika, hondawakupate ngʼwene; na hewo wosulukila kufa, bali kifo chowakimbila.

⁷ Na umbo ja nzige hiwo dikala kamba nyumbu weikigwa goya kugwisa nghondo; hachana ha matwi gawo hakala kamba mulufiya wa zahabu, na vihanga vyawo vikala kamba vihanga va wanhu.

⁸ Na mvili ziwali nazo, zikala kamba mvili za kitwanzi, na meno gawo gakala kamba meno ga Mnyamasongo.

⁹ Nawo wakala na lukumbulu mmhambaga kamba lwa chuma, na kidinhilo cha mabawa gawo kikala kamba kidinhilo cha magadi gobululwa mbwisa na nyumbu bwando, wochola kuli inghondo.

¹⁰ Na hewo mikila yawo isongoka kamba ya inge, na himo mmikila yawo mumo mhiko zawo muzili za kuwagaza wanhu miyezi mitano.

¹¹ Na hewo wana mndewa wawo, yuyo malaika wa kuzimu, twaga jake Abadoni kwa Kiebrania, na kwa Kigriki kokemagwa Apolioni kihindukizo chake, Mbananzi.

¹² Gumbilo da ichanduso da nghondo dibita; lola gasigala tanhu mabili, na higo kwiza gokwiza.

Mhalati ya 6: Fungu jekadatu dikomigwa

¹³ Viyatatalise malaika wa sita mhalati yake, mhulika dizwi dilawile muna zimhembe za upango wa nhambiko wa zahabu, ukalile kuja behi ya Mulungu.

¹⁴ Dimulongela yuja malaika wa sita yakalile na imhalati, “Wadohole waja malaika wanne, wadazigwe kuna ulwanda ulukulu lwa Eufrati!”

¹⁵ Baho waja malaika wane wadoholigwa, wakalile wekigwe kwa ija isaa na siku na mwezi na mwaka, giladi wadikome fungu jekadatu ja wanhu.

¹⁶ Na mpeto wa madale wakwelile nyumbu ukala elfu ishilini miyanza elfu kumi; niuhulika mpeto wawo.

¹⁷ Avo vivo viniwawene muna zinzozi zangu waja nyumbu na waja wawakwelile, wakotela lukumbulu mmhambaga zawo kamba lwa moto na kibuluwi na nzamo; na matwi ga nyumbu waja gakala kamba ga mnyamasongo, na muna imilomo yawo mulawaga moto na yosi na vikwatulo.

¹⁸ Na fungu jekadatu ja wanhu wakomigwa na maliho gano madatu, moto, yosi na vikwatulo, vilawile mmilomo yawo.

¹⁹ Kilumbo mhiko za waja nyumbu zamumo muna imilomo yawo na imikila yawo; kwa mzoko mikila yawo iigamba na nyoka wene matwi; igo gawalumilaga nago.

²⁰ Komu wanhu wasigale, walekile kukomigwa na maliho gaja, hawaikonhole kuzileka sanghano za makono gawo; hawalekile kutambikila vinyamkela na vinyago vya zahabu na feza na shaba na mabwe hebu vya mibiki, navyo havidaha kulola, kuhulika hebu kuchola.

²¹ Kabili hawaikonhole waleke kukoma wayawo hebu uhawi na ugoni wawo, hebu ubavi wawo.