LUGUBULO 8 - Lagano da Isambi

Utango wa 7

¹ Na viyafungule utango wa saba, kukala pozii kuulanga kipigiti vivo.

² Na niye niwona waja malaika saba wemaga behi ya Mulungu, wagwelelwa mhalati saba.

³ Imalabaho keza malaika iyagwe, kema behi ya upango wa nhambiko, kakala na kikungu cha zahabu, kagwelelwa uvumba bwando, giladi yavukize hamonga na nhambiko za wangʼalile wose uchana ha upango wa zahabu, uli habehi na ikigoda cha Yenzi.

⁴ Diyosi ja uja uvumba dikwela hakihanga cha Mulungu hamonga na zija nhambiko za wangʼalile, kulawa mumkono wa hiyo malaika.

⁵ Imalabaho ija malaika kakisola kija kikungu cha kuvukizila, kakimemeza moto muna upango wa nhambiko; yomana kukibwanha hasi; ilawa minghuwa na mazwi na mimwemwe na kingudemo muisi.

⁶ Baho waja malaika saba wakalile na zija mhalati saba, waika goya giladi wazitatalise.

Mhalati 4 zitowa isi, bahali, nyanda, zuwa

⁷ Waichanduso viyatatalise mhalati yake, mvula ya mabwe na moto ihanganywe na mulopa, imana kugwa hasi, na fungu daikadatu ja isi disakala, na fungu daikadatu ja mibiki disakala, na milolo mibisi yose isakala.

⁸ Na malaika wekabili viyatatalise mhalati yake, kinhu kigambile gongo kulu dikwaka moto, jasigwa mwibahali, na fungu daikadatu ja bahali digalamka mulopa.

⁹ Na fungu daikadatu ja viumbe vya mbahali vikalile na ugima, vidanganika, na fungu daikadatu ja mimeli ya mbahali ibanangika.

¹⁰ Na malaika waikadatu viyatatalise mhalati yake, ibwanhika nhondo nghulu kulawa kuulanga, ikalile ikwaka moto kamba wenge, digwa hana difungu daikadatu ja nyanda zose na zinzokwe za mazi.

¹¹ Nhondo hiyo twaga jake ikemagwa Usungu; na wanhu bwando wadanganika kilumbo cha mazi gaja gageligwe usungu.

¹² Malaika waikane viyatatalise mhalati yake, ditowigwa fungu jekadatu ja zuwa na fungu jekadatu ja mbalamwezi, na fungu jekadatu ja nhondo, giladi muna gamafungu gawo gaikadatu gageligwe ziza, imisi fungu jekadatu jake sukudilangaze, hebu ikilo vivija.

¹³ Imalabaho vinghalile nilola, nihulika kimhanga yumwe yoguluka hagatigati ya kuulanga, kuno yolonga, “Wojona, wojona, wojona waja wokala muisi, kwa kilumbo cha dizwi ja mhalati zisigale za waja malaika wadatu wemile goya kutatalisa!”