LUGUBULO 7 - Lagano da Isambi

Waisraeli 144 elfu wageligwa utango

¹ Imala niwona malaika wane, wemile nzugayuga muna zinyenza nne za isi kuzigoga mbeho nne za isi, giladi beho sikudikunghuse muisi hebu mbahali, hebu hali biki jojose.

² Mhunde nimona malaika iyagwe yakwelile kulawa malawilo ga zuwa, kakala na utango wa Mulungu Mwene Upile; kawakema na dizwi kulu waja malaika wane, wagolelwe kwibananga iisi na bahali.

³ Komu kalonga, “Sikumbanange tanhu isi hebu bahali hebu mibiki, kikomo tuhamala kuwagela utango watumwa wa Mulungu wetu muna ivihanga vyawo!”

⁴ Kabili niuhulika mpeto wawo wageligwe utango, wanhu miya na arbaini na nne elfu, walawile muna zingholo za Wana Waisraeli.

⁵ Wa lukolo lwa Yuda wanhu mulongo umwe na wabili elfu; wa lukolo lwa Rubeni wanhu mulongo umwe na wabili elfu; wa lukolo lwa Gadi wanhu mulongo umwe na wabili elfu;

⁶ wa lukolo lwa Aseri wanhu mulongo umwe na wabili elfu; wa lukolo lwa Naftali wanhu mulongo umwe na wabili elfu; wa lukolo lwa Manase wanhu mulongo umwe na wabili elfu;

⁷ wa lukolo lwa Simeoni wanhu mulongo umwe na wabili elfu; wa lukolo lwa Lawi mulongo umwe na wabili elfu; wa lukolo lwa Isakari wanhu mulongo umwe na wabili elfu;

⁸ wa lukolo wa Zebuloni wanhu mulongo umwe na wabili elfu; wa lukolo wa Yosefu wanhu mulongo umwe na wabili elfu; wa lukolo lwa Benyamini wanhu mulongo umwe na wabili elfu.

Mtinghano wawo wakomboligwe wabule mheto

⁹ Imala vinghalile nilola, mhunde niwona mtinghano bwando, haudahika kupetigwa na munhu wowose; wanhu wa isi zose, ngholo zose, vilagwa vyose na ulonzi wose, wema nzugayuga behi ya kigoda cha Yenzi na behi ya Mwana-Nghondolo, wavazigwe nghanju nzelu, na mmakono gawo wagoga matambi ga mitende.

¹⁰ Na hewo walava mazwi makulu walonga, “Honelo jetu dilawa kwa Mulungu wetu Yakalile muna ikigoda cha Yenzi, na kwa Mwana-Nghondolo!”

¹¹ Baho malaika wose wakalile wima kuzunguluka kija ikigoda cha Yenzi hamonga na waja Wavyele na vija Viyumbe vine, wagwa kingubanguba behi ya ikigoda cha Yenzi, wamtambikila Mulungu,

¹² wolonga, “Amina, motelo na nhunizo na iyenzi na nghungwe, nhogolwa na ugaga na mhiko kanazo Mulungu wetu digunge na digunge! Amina.”

¹³ Yomana kwidika imonga wa waja Wavyele, kaniuza yolonga, “Wanhu wano wavazigwe nghanju zinzelu iwo walihi, kabili walawa kulihi?”

¹⁴ Nimulongela, “Mndewa wangu, gweye kuvimanya.” Kanilongela, “Wano iwo waja walawile muna imigazo mikulu, wazisunhile nguwo zawo na kuzingʼaza na mulopa wa Mwana-Nghondolo.

¹⁵ Avo wabaha hakihanga cha kigoda cha Yenzi cha Mulungu, na hewo womsanghanikila imisi na ikilo mdingʼanda jake; na Heyo yakalile mkigoda cha Yenzi kowasimikila hema jake.

¹⁶ Hondawayone nzala hebu nghilu, na zuwa hondadiwasome hebu kulawa vuke.

¹⁷ Kilumbo Mwana-Nghondolo yali hagatigati ya kigoda cha Yenzi, kowachunga na kuwalongoza kuna zinzokwe za mazi ga upile, na Heyo Mulungu kogahangusa mahozi gose mmeso gawo.”