LUGUBULO 6 - Lagano da Isambi

Nhango sita zilongole zifunguligwa

¹ Ilawabaho nimona mwana-nghondolo viyafungule utango wa ichanduso wa zija saba; mhulika imonga wa vija Viyumbe vine kalonga kwa dizwi ja kutongoloma, “Izo!”

² Vinghalile nilola, kalawilila nyumbu mzelu, na yuja yamkwelile, kakala na upinde, kagwelelwa mulufiya; kalawa giladi yahume, na heyo kahuma.

³ Viyafungule utango waikabili, mhulika kija Kiyumbe chaikabili yolonga, “Izo!”

⁴ Halawilila nyumbu iyagwe, mdunghu nghani, na yuja yamkwelile, kenghigwa mhiko ya kusegeza tindiwalo muna iisi, giladi wanhu waikome wawo kwa wawo, na heyo kagolelwa sime nghulu.

⁵ Na viyaufungule utango wekadatu, mhulika kija Kiyumbe chekadatu yolonga, Izo! Nilola nimona nyumbu mtitu na yuja yamkwelile, kagoga kilingilo mumkono wake.

⁶ Mhulika dizwi dilawile hagatigati ya vija Viyumbe vine, dilonga, “Kisaga cha mhunga kigulagwa kwa mhiya bwando, na visaga vya uhemba vivija; komu mavuta na ugimbi vyobwagala.”

⁷ Na viyaufungule utango wa ikane, mhulika kija Kiyumbe chekane yolonga, “Izo!”

⁸ Nilola vino, nimona nyumbu wa kiivuivu, na yuja yamkwelile, twaga jake kifo, na kuzimu welongoza nayo, wagwelelwa mhiko za kukoma fungu jekane ja isi kwa sime na nzala na nyuguzi na mingʼonyo migaga.

⁹ Na viyafungule utango wainhano, nyona hauvungu wa upango wa nhambiko loho za wanhu wakomigwe kwa kilumbo cha Longa da Mulungu, na kilumbo cha usindi uwasindile.

¹⁰ Walila na dizwi kulu, walonga, “Go Magana Ungʼalile, Mwene ihoko, mbona kokawaze kuwatagusa waja wokala muisi, giladi ulihile mulopa wetu?”

¹¹ Imala wagwelelwa kila imonga nghanzu nzelu, walongelwa waituze tanhu hasigala siku ndodo, vondauduganye mpeto wa watumwa wayawo na ndugu zawo, wondawakomigwe vivija kamba wawo wenyego.

¹² Na niye nimona viyafungule utango wa sita, hakala na kingudemo kikulu cha isi; zuwa digalamka titu kamba guniya ja misizi, na mbalamwezi ugalamka kamba mulopa.

¹³ Na nhondo za kuulanga zilagala haisi, kamba mnazi ulagaza mdondo wake, uhatigiswa na beho kulu.

¹⁴ Imala ulanga usegezwa kamba kalatasi viikunzigwe, na vigongo vyose na vibandasi vihamizwa kulawa hanhu hawo.

¹⁵ Baho watawala wa isi nawo wakulu na vilongozi na wene mali bwando na wene mhiko na iwatumwa wose na walungwana wose, waifisa muna imihango na hasi ya migema ya vigongo.

¹⁶ Kuno wovilongela vigongo na migema, “Tugwileni, mtufise hameso gake Yuja yokala mkigoda cha Yenzi, na hana lusango lwa Mwana-Nghondolo!

¹⁷ Kwa mzoko sikunghulu yawo ya lihizo ivika; yalihi yondayadahe kwisimikiza?”