LUGUBULO 3 - Lagano da Isambi

Lupwilili lwa didale ja Sarde

¹ Mwandikile malaika wa didale dili hiko Sarde, Vivo vyolonga Heyo yali nazo zija Loho saba za Mulungu, Mwene zija zinhondo saba: nizitanga sanghano zako, kunajo twaga kamba kwamgima, bali kudanganika.

² Lamuka, uwagangamaze wasigale, na hewo wolonda kudanganika; kilumbo siziwene sanghano zako kamba ziiduganye hakihanga cha Mulungu wangu.

³ Gakumbukile gaubokele na gauhulike; gagoge giladi wikonhole; na kamba hukalile mangweda, kwiza nokwizila kamba mbavi, hondaukitange kipigiti chondanikwizile.

⁴ Komu kunago matwaga madodo hiko Sarde, walekile kuzinanga nguwo zawo, iwo wondawachole hamonga na niye wene nguwo nzelu, kilumbo ziwandakana.

⁵ Mwene kuhuma kovazigwa nguwo nzelu, na twaga jake hondanidisegeze muna ikitabu cha upile; na niye nodisindila twaga jake hakihanga cha Tata wangu na cha malaika zake.

⁶ Mwene magutwi nayahulike mbuli ino, Loho iyowalongela madale!

Lupwilili lwa didale ja Filadelfia

⁷ Mwandikile malaika wa didale dili hiko Filadelfia, Vivo yolonga Heyo Yangʼalile, Mwene ihoko, yali na luja lufungulo lwa Daudi; Heyo yondayafungule, haduhu yondayafunge kabili; Heyo yofunga, haduhu wa kufungula.

⁸ Nizimanya sanghano zako; lola kuulongozi wako nikugwelela mulango uvuguligwe, vyemela haduhu yodaha kuuhinda; kilumbo mhiko zuuli nazo izo ndodo, bali kudigoga Longa jangu, hudibelile twaga jangu.

⁹ Lola wokwiza wanahina wa Mwenembago, wokilonga kamba Wayuda, kumbe siwo, bali wolonga uvwizi; lola nowagala hiwo, weze wakugwile hamagulu gako, wavitange kamba niye nikunogela gweye.

¹⁰ Kwa mzoko kudigoga Longa jangu da mwazaganyo, niye nokwimiliza nikuhonye, kipigiti cha kugezigwa, kigambile chondakivike mulumwengu, giladi wagezigwe wose uchana muli iisi.

¹¹ Nokwiza chambwisa; gagoge goya gauli nago, munhu sukuyausole mulufiya wako!

¹² Mwene kuhuma nomtenda yawe mhanda muna ingʼanda ya Mulungu wangu, viyemela hondayalawe himo ngʼwene; na niye nomwandikila hachana hamwake Twaga ja Mulungu wangu, na twaga ja Wambo da Mulungu wangu, dijo Yerusalemu da sambi, jonda dihulumuke kulawa kuulanga kumwake Mulungu wangu, kabili nomwandikila na Twaga jangu mwenyecho ja isambi.

¹³ Mwene magutwi nayahulike mbuli ino, Loho iyowalongela madale!

Lupwilili lwa didale ja Laodikia

¹⁴ Mwandikile malaika wa didale dili hiko Laodikia, Vivo yolonga Heyo yokemigwa Amina, Msindi Mtamanilwa na wa ihoko, yali Ichanduso cha kuumba vinhu vyose kwa Mulungu.

¹⁵ Nizimanya sanghano zako: gweye huzizima hebu hulukuza; vihanogile kamba uzizime hebu ulukuze!

¹⁶ Bali sambi kwa lufufunhende, huzizima hebu hulukuza, avo niye nokudeka mmulomo wangu.

¹⁷ Kwa mzoko kolonga, Niye nina mali bwando, mabikilo gangu gamema, sisulukila kinhu; bali huvimanya kamba kunyeka, ikwandama wonelwe bazi, kilumbo kwa mkiwa, wabule meso, kwa ukulunge.

¹⁸ Avo nokulagila nzila inogile, Gula kumwangu zahabu ingʼazigwe na moto, ugalamke mwene mali bwando; gula na nguwo nzelu kumwangu, uvale, ukulunge wako sikuwoneke, giladi sukuugwe kinyala; gula na nhumba ya gameso, ubakaze mmeso gako, giladi ulole!

¹⁹ Wose niwanogele niye, nowazuma na kuwasuna, avo wiyohe kwikonhola!

²⁰ Lola nima wima hamulango, nokemelela; munhu yonda yamhulike dizwi jangu na kuvugula ulwivi, nokwingila kumwake, ndiye hamonga na heyo, na heyo yaje hamonga na niye.

²¹ Mwene kuhuma nomwingha kigoda changu yakale hamonga na niye, kamba niye vimhumile, vinikala hamonga na Tata wangu hali kigoda chake.

²² Mwene magutwi nayahulike mbuli ino, Loho iyowalongela madale!