LUGUBULO 22 - Lagano da Isambi

Lwanda lwa mazi ga upile

¹ Imala kandagila lwanda lwa mazi ga ugima gamelukaga kamba kiwowo, lulawile hana ikigoda cha Yenzi cha Mulungu na cha Mwana-Nghondolo.

² Lwanda luja lubita hagatigati ya ulubuga, na lwenza luno na luno kukala na mibiki ya ugima, ilelaga mujo miyanza kumi na mibili, mwezi kwa mwezi ilavaga mujo wawo, na imitepo ya imibiki ija iyo ihonyaga izingholo.

³ Hondadiwe baho duwilo jojose kabili; na kigoda cha Yenzi cha Mulungu na cha Mwana-Nghondolo chokuwa mumo mgati mmwake, na watumwa wake womsanghanila.

⁴ Na hewo wochona kihanga chake, na twaga jake jokuwa mvihanga vyawo.

⁵ Viyemela kilo hondaiwe baho kabili, vivo honda wasulukile mulangaza wa kiwenge hebu mulangaza wa zuwa, kilumbo Mulungu Magana kowamwemwesela, na hewo wotawala digunge kwa digunge.

Umgwile Mulungu yaiyeka; Umbwelo wa Kristo wahabehi

⁶ Imala kanongela, “Malonga gano gago gene kutamanilwa na ga ihoko. Na heyo Mulungu Magana yawenghaga watulandagu loho yake, kamtuma malaika wake, yawalagile watumwa wake gonda gasanghanwe chambwisa.”

⁷ “Lola nokwiza mbwisa.” Kamota munhu mwenekugoga malonga ga ndagu ga kitabu kino!

⁸ Niye Yohana nigahulika na kugalola magweka gano gose. Na vinimalile kuhulika na kugalola, nimana kumgwila giladi nimfugamile hamagulu ga yuja malaika, yandagile gamagweka gaja.

⁹ Kanongela, “Lola, sivivo. Niye namtumwa miyenu gweye na ndugu zako walaguzi na wenekugoga malonga ga kitabu kino. Avo umgwile Mulungu!”

¹⁰ Imala kanongela, “Sikuugafise malonga ga lugubulo lwa kitabu kino, hebu kukifunga na fundo, kilumbo mazuwa gake gahabehi.

¹¹ Mwene kubananga nayagendese kubananga, na mwene ubweto nayagendese ubweto, bali mwene ihoko nayagendese kutenda ihoko, na heyo mwene kungʼala nayagendese kuingʼaza.”

¹² “Lola nokwiza mbwisa, na miyawi yangu yahamonga na niye, nimulihe kila munhu kamba sanghano zake vizili.

¹³ Niye iyo Alfa na Omega, Waichanduso na Waikimambukizo, kusongela na kuzigilila.”

¹⁴ Wamota waja wasunhile nguwo zawo, giladi wagwelelwe ndagizi ya kuja mujo wa biki da ugima, na kwingila imilango ya dija diwambo!

¹⁵ Kuja kunze yabaho mibwa na wahawi, wagoni na wakoma wanhu, watambikila vinyago na waja wose wonogelwa na uvwizi na kuusanghana.

¹⁶ “Niye Yesu nimtuma malaika wangu yamsindileni mweye magweka gano muna gamadale ga kanisa. Niye nene sina da ulelwa wa Daudi, niye nene inhondo ya imitondo imelemeta.”

¹⁷ Loho hamonga na mtwanzi mhambe (dijo kanisa) walongaga, “Izo.” Na heyo mwenekuhulika nayalonge, “Izo.” Na heyo yokona nghilu nayeze, na heyo yolonda nayadehe yamba mazi ga ugima yangʼwe!

Sikumongeze mbuli muno bule kuhunguza

¹⁸ Niye nomsindila kila mwene kugahulika malonga ga lugubulo lwa kitabu kino: munhu kamba yahongeza malonga muno, Mulungu komongezela manghulubu gandikigwe mkitabu kino.

¹⁹ Na heyo yondayahunguze malonga ga kitabu cha lugubulo luno, Mulungu kodisegeza fungu jake hana dibiki ja ugima na muna diwambo dingʼalile, kamba vigandikigwe mkitabu kino.

²⁰ Mwene kugasindila gano kolonga, “Ihoko nokwiza mbwisa.” Amina – izo, Mndewa Yesu!

²¹ Uholo wa Mndewa Yesu umkalileni mweye mose. Amina.