LUGUBULO 21 - Lagano da Isambi

Ulanga wa sambi na isi ya sambi vizili

¹ Vinghalile nilola, niwona ulanga wa sambi na isi ya sambi; kilumbo ulanga wa ichanduso, na isi ya ikilongozi zikala zisegele, na bahali ikala haduhu.

² Nijona wambo dingʼalile da Yerusalemu wa sambi wohulumuka kulawa kuulanga kumwake Mulungu, ukala uhambigwa kamba mhambe viyahambilwe mkasano wake.

³ Mhulika na dizwi kulu, dilawile mkigoda cha undewa, dilonga, “Lola kaye ya Mulungu yabaho hamonga na wanhu; Heyo kokala hamonga nawo, na hewo wogalamka wanhu wake, na Heyo kogalamka Mulungu wawo.

⁴ Kogahangusa mahozi gose mmeso gawo; viyemela kifo hondakiwe baho kabili, hebu minyululuko hebu kililo hebu nyuguzi hondaziwe baho kabili, kilumbo magweka ga ichanduso gose gabita gamala.”

⁵ Na Yuja yakalile mkigoda cha Undewa kalonga, “Lola novigongomanya vinhu vyose vigalamke vya sambi!” Kalonga, “Yandika, kilumbo malonga gano gago gene kutamanilwa na ga ihoko.”

⁶ Kanilongela, “Gamala kusanghanwa; niye nene A, na O, kihindukizo chake, Waichanduso na Waikimambukizo; munhu yokona nghilu, nomgwelela mazi ga nzokwe ga upile yamba.

⁷ Mwene kuhuma kogahala gano gose, na niye nokuwa Mulungu wake, na heyo kokuwa mwanangu.

⁸ Bali waja wogwaya, wolema kunhamanila, wehile, wakoma wanhu, wagoni, wahawi, watambikila vinyago na watungulu wose, kitumetume chawo chamumo muna dilamba dikwaka umoto na kikwatulo; ako kuko kudanganika kwai-kabili.”

Iyenzi ya Yerusalemu wa sambi

⁹ Keza imonga wawo waja malaika saba, wazigogile zija nyungo saba zimemile manghulubu saba ga ikimambukizo, na heyo kalonga na niye, “Izo nikulagile mhambe, sano jake Mwananghondolo!”

¹⁰ Kanisola kwa mhiko za Loho, kangala kudigongo kulu tali, na kundagila dija diwambo dingʼalile, dijo Yerusalemu dihulumuka kulawa kuulanga kumwake Mulungu.

¹¹ Iyenzi yake iyo iija ya Mulungu, na kungʼala kwake kugamba kamba kigwe cha mali bwando, kibanzile vigwe viyagwe vyose, kifanile kamba kibwe cha Yaspi kimelukameluka.

¹² Ukala na mhongono nghulu nhali ya mabwe, na milango yake mulongo umwe na mibili, na muja muna imilango wema malaika mulungu umwe na wabili, na matagwa gandikigwa himo, gago ga zingholo umulongo umwe na mbili za ulelwa wa Israeli.

¹³ Mwambu wa malawilo ga zuwa kukala milango midatu, na hiko kaskasini milango midatu, na hiko kusini milango midatu, na hiko maswelo ga zuwa milango midatu.

¹⁴ Na hiyo imhongono ya diwambo ikala na nghingigo kumi na mbili, na muli zinghingigo mna matagwa kumi na mabili, gago ga watumigwa kumi na wabili wa Mwananghondolo.

¹⁵ Na yuja malaika yalongile na niye, kakala na mulanzi wa zahabu wa kulingila, giladi yalinge dija diwambo na milango yake na mhongono yake.

¹⁶ Dija diwambo dina milaba mine; utali wake ulingana na ugazi wake; kadilinga dija diwambo na uja umulanzi; ukala kamba uchozi wa maili elfu na miya nhano (1,500); utali wake na ugazi wake na utali wa uchana ulingana vivo.

¹⁷ Kalinga na dija dimhongono, dipata muzo umwe na milongo mine na mine (144) kwa ningo ya munhu igambile ya malaika yuja.

¹⁸ Na dimhongono dikala dizengigwe na mabwe ga Yaspi; na diwambo dikala ja zahabu, diloleka kamba kiwowo.

¹⁹ Na nghingigo za imhongono ya idiwambo zikala zihambigwe na vigwe vino na vino, vibanzile mali bwando: lukingigo lwa ichanduso lukala lwa Yaspi, lwekabili lukala lwa Safiro, lwekadatu lwa Kalkedoni, lwekane lwa Sumaradi;

²⁰ Lwainhano lukala lwa Sardoniki, lwaisita lwa Akiki, lwaisaba lwa Krisolito, lwainana lwa Berilo, lwaikenda lwa Topasio ya manjano, lwaikumi lwa Krisopraso, lwa kumi na imwe lwa Yakuti ya hiakinto, na lwa kumi na mbili lukala na Ametisto.

²¹ Na milango yake kumi na mibili izo lulu kumi na mbili; kila lango dimwe dikala digongomanywe na lulu imwe; viyemela na lubuga lukulu lwa diwambo lukala lwa zahabu, iloleka kamba kiwowo kingʼalile.

²² Komu ngʼanda ya Mulungu sidiwene himo aka, kilumbo Magana Mulungu Mtawalagose na Mwananghondolo iyo nhambikilo yawo.

²³ Vivija idiwambo hadilonda zuwa hebu mbalamwezi kumulikwa, kilumbo iyenzi ya Mulungu iyo idilangaza, na Heyo Mwananghondolo icho kiwenge chake.

²⁴ Na zingholo zose wotembela muna umulangaza wake, na watawala wa muisi wogala yenzi zawo mumuja.

²⁵ Viyemela milango yake haifungagwa imisi yose mbee, na ikilo kuja kuduhu.

²⁶ Walumwengu wokwingiza mumuja ukulu, unovu na mali za ngholo zose.

²⁷ Komu kihile chochose hondakingile ngʼwene, hebu mwene kutenda gehile na uvwizi, bali waja wayeka wandikigwe muna ikitabu cha upile cha Mwana-Nghondolo.