LUGUBULO 19 - Lagano da Isambi

Nhogo kuulanga; arusi ya Mwana-Nghondolo

¹ Imala mhulika kidinhilo kikulu kamba cha madale bwando ga wanhu wali kuulanga, walonga, “Yatunilwe Magana! Nghombolwa na iyenzi na mhiko zizo za Mulungu wetu!

² Kilumbo nhaguso zake zizo za ihoko, zigoloke; kilumbo kamtagusa yuja mtwanzi mgoni mkulu, yabanange iisi kwa ugoni wake; kamulihila mulopa wa watumwa wake wafile kwa mkono wake!”

³ Walonga mwanza wekabili, Yatunilwe Magana! na yosi da wambo kulu jokwela uchana digunge kwa digunge.

⁴ Baho waja Wavyele 24 na vija Viyumbe vine wagwa hasi na kumfugamila Mulungu Mwenekukala mkigoda cha Yenzi, kuno wolonga, “Amina, Yatunilwe Magana!”

⁵ Na dizwi dilawa mkigoda cha Yenzi dilonga, “Mtunizeni Mulungu wetu, mweye watumwa wake mose wene kumdumba Heyo, wadodo na wakulu!”

⁶ Mhulika na kidinhilo kamba cha madale bwando, kamba ndinhilo ya mazi bwando, igambile mvumo wa ngholomo yene mhiko, ilonga, “Yatunilwe Magana! kilumbo yuyo Mndewa Mulungu wetu, Mwene iyenzi!

⁷ Natwimozemoze na kutowa nghenze na kumtuniza Heyo; kilumbo ihalusi ya Mwananghondolo ivika, na sano jake kainonoga goya!

⁸ Kagwelelwa nguwo za bafuta, zingʼalile zimelemeta, giladi yavale nguwo zija za bafuta, iyo nghombolwa ya Wangʼalile.”

⁹ Imala kanongela, “Yandika, wamota waja wagonekwe hana gamandiya ga alusi ya Mwananghondolo!” Kanongela, “Malonga gano gago ga Mulungu senhambo.”

¹⁰ Nimana kumgwila hamagulu gake yuja malaika, nimfugamile, bali heyo kanongela, “Lola sikuunigwile; niye namtumwa miyenu gweye na ndugu zako wagogile usindi wa Yesu; komu umgwile Mulungu!” Avo usindi wa Yesu uwo uwengha watulandagu loho ya kufambula.

Yesu kokwiza mkwela nyumbu mzelu; Imnyama na mtowa mbizi wake wangamila

¹¹ Vinghalile nilola, niwona ulanga ugubuka, nimona nyumbu mzelu, na Mwene kumkwela kokemigwa Mtamanilwa na Kweli, Yuyo yatagusaga ihoko na kutenda nghondo ya ihoko.

¹² Meso gake gagalamka kamba moto ukwaka, na mditwi jake mna milufiya bwando; na Heyo kanajo twaga diyandikigwe, kuduhu munhu yodimanya bali heyo mwenyecho.

¹³ Na heyo kavazigwa nguwo ichufikwe mulopa, na twaga jake dokemigwa Longa da Mulungu.

¹⁴ Na madale ga kuulanga weilongoza nayo, kuno wakwelile nyumbu wazelu, wavazigwe nguwo za bafuta nzelu zimelemeta.

¹⁵ Na mmulomo wake mulawa sime ikutwa, giladi yawatowe walumwengu wose; na heyo kowachunga kwa mkongoja wa chuma; na heyo kokama mdikamulilo ja ugimbi uli usungu wa lusango lwa Mulungu Mwene kutawala hohose.

¹⁶ Na muna inguwo yake hana ikigudi kandikilwa twaga dino, “Mtawala wa watawala, na Mndewa wa Wandewa.”

¹⁷ Vinghalile nilola, nimona malaika imonga yemile muna dizuwa, kaguta dizwi kulu, kawakema ndege wose wene kuguluka hagati ya ulanga, “Izoni mmemelele vyakuja bwando vya Mulungu!

¹⁸ Muje nghuli za watawala, na nghuli za wakulu wa asikali, na nghuli za wagaga, na nyama za nyumbu, na nghuli za waja wawakwelile, na nghuli za walungwana na za watumwa na za wanhu wose!”

¹⁹ Vinghalile nilola, nimona yuja Imnyama na watawala wa isi na madale gawo wailundiza, giladi wamgalile nghondo Yuja yakwelile nyumbu mzelu na madale gake.

²⁰ Bali yuja Imnyama kagogigwa hamonga na mtowa mbizi wa utungulu, ayo yuyo yatendile vilolomboto hamwake kuwakonga waja waigelile utango wa Imnyama na kufugamila kinyago chake; hiwo iwabili wasigwa wahali wagima mdilamba ja moto ukwaka kwa lukwatulo (kibiliti).

²¹ Na hewo wasigale wakomigwa kwa sime ilawile mmulomo wake Heyo yamkwelile yuja nyumbu, na waja wandege wose weguta nyama za nghuli zawo.