LUGUBULO 18 - Lagano da Isambi

Dumilizo ja Babeli, utawala wa imbago

¹ Imala nimona malaika iyagwe, yohulumuka kulawa kuulanga, mwene kudumbiza nghani, na isi ingʼazuka kwa iyenzi yake.

² Kalava dizwi kulu yolonga, “Digwa, digwa wambo kulu da Babeli; digalamka ukazi wa vinyamkela na mhongono ya mizuka yose michapalisi, na ya midege ya ubweto ihilagwa yose.

³ Kilumbo ngholo zose wangʼwa ugimbi mkali wa ugoni wake; na watawala wa isi watenda ugoni nayo, na wachuluzi wa isi walundiza mali bwando kwa kudigalila wambo dija vinhu vyose vya uhondo.”

⁴ Imala mhulika dizwi diyagwe dilawile kuulanga, dilonga, “Mweye muli wanhu wangu, laweni kumwake, kwa mzoko sukumkole ubananzi wake, giladi sukumgolelwe maliho gake!

⁵ Kilumbo matozo gake gamnanahila, gavika kuulanga, na Mulungu kaukumbukila uchapalisi wake.

⁶ Muliheni kamba viyalihile mwenyego; muliheni miyanza mibili kamba sanghano zake vizili; kikonha kikija chayamwinghileni mweye, mwingheni na heyo miyanza mibili!

⁷ Na heyo viyaidundule na kuja uhondo wake, yongezeni nghani kumgaza na kumulumiza! kwa mzoko kakala yolonga munda na kitupe, Nogendelela kuwa mndewa wa kitwanzi, sili mgane mbee, na niye hondanyone minyululuko!

⁸ Avo malihilo gake gose gomwizila siku dimwe, kudanganika, kunyululuka, kulumizwa na nzala, imala kosakala hamoto; kilumbo Magana Mulungu Mwene mhiko yuyo yondayamtaguse.”

Wanhu wokwiyalalela Babeli; denghelelo kuulanga

⁹ Baho watawala wa isi watendile ugoni nayo, kuno woja uhondo hamonga nayo, womulilila na kumuyalalila, vondawone diyosi ja kusakala kwake.

¹⁰ Na hewo wokwima kutali kwa kilumbo cha kudumba mgaduko wake, wolonga, “Mamo gwe, mamo gwe! wambo dino kulu ja Babeli; wambo dino dina mhiko!”

¹¹ Kwa kipigiti kimwe uziga kutaguswa! Na waja wachuluzi wa muisi wolila na kwiyalala kwa kilumbo chake, kwa mzoko kabili kuduhu munhu yondayagule vinhu vyawo:

¹² zahabu, feza, vigwe, ushanga, nguwo za bafuta, za undewa, na za kumelemeta, nguwo za langi zinogile, mibiki yose ya kuvukiza, na viya vyose vya mhembe na vya muhingo, vya shaba na vya chuma na vya mabwe mazelu nghani;

¹³ ndalasini na kalafulu, manukato, uvumba na ubane, mvinyo na mavuta, usage unogile na ngano, ngʼombe na nghondolo, nyumbu na magadi, watumwa na nzewele za wanhu.

¹⁴ Viyemela mujo uusulukila mwiloho yako, ukulawa, na vyose vikugelaga unene hebu kunogeza lukuli, vyose vikwagila, honda uvone kabili.

¹⁵ Na wachuluzi wa vinhu hivo wakalile wolundiza mali bwando kulawa mdiwambo, wokwima kutali kwa kilumbo cha kudumba mgaduko wake, wolila na kwiyalala,

¹⁶ kuno wolonga, “Mamo gwe, mamo gwe! wambo dino kulu divalile nguwo za bafuta na za undewa za langi zinogile, diihamba zahabu na vigwe na ushanga!

¹⁷ Kipigiti kimwe unovu uno ukalile bwando, vilihi ubanangika wose!” Na hewo iwakulu wa mimeli, na waja wene viya ividodo na mabahaliya wose wosanghana mbahali, wema kutali;

¹⁸ watowa mizangi vuwadiwene yosi ja kusakala kwake, walonga, “Jakwahi wambo digambile wambo kulu kamba dino?

¹⁹ Waigela timbwisi mmatwi gawo na kutowa nyangi, kuno wolila na kwiyalala, wolonga, Mamo gwe, mamo gwe, wambo kulu! muna zisiga zako mumo, wose wene iviya vya mbahali muwapatile gamali bwando; na kwa kipigiti kimwe digwa!”

²⁰ Dengheni kwa kilumbo chake, mweye ulanga hamonga na wangʼalile na iwatumigwa na watulandagu, kilumbo Mulungu kalihiza migazo yenu!

²¹ Imala malaika imonga, ayo yuyo mgaga, kenula dibwe kulu dilingane na dibwe da kusagila, kajasa mbahali, kalonga, “Kwa mhiko bwando kamba zino, wambo kulu ja Babeli jokwasigwa chambwisa; hondajoneke kabili!

²² Na himo honda muhulikwe kabili dizwi ja wene kutowa vingʼwengʼwe na mzumali, filimbi na mhalati; hebu hondayoneke fundi wa sanghana zozose, hebu honda muhulikwe kabili mmwako sindo ya kutwanga.

²³ Hebu kiwenge cha taa hondachake kabili mmwako, hebu dizwi ja msola mhambe na mhambe wake hondadihulikwe kabili mmwako; kwa mzoko wachuluzi wako wakala wakulu wa isi, komu ngholo zose zikongigwa kwa uhawi wako.”

²⁴ Na mulopa wa watulandagu na wa wangʼalile, na wa waja wose wakomigwe muisi, woneka mgati mmwako.