LUGUBULO 17 - Lagano da Isambi

Mtwanzi mgoni (Babeli) yokwela mnyama mdunghu; Mzungu wa matwi 7 na mhembe 10, iwo watawala

¹ Keza imonga wa waja malaika saba wene nyungo saba zija, kalonga na niye, “Izo nokulagila lihizo jake yuja Imgoni mkulu wa kitwanzi, mwene kukala hana zinyanda bwando.

² Heyo iyo yuyo yatendile ugoni na watawala wa muisi, kabili wakalile muisi wakoligwa na ugimbi wa ugoni wake.”

³ Imalabaho kangala kwa mhiko za kiloho kuluwala, nimona yuja mtwanzi mgoni yakwelile mnyama mdunghu yandikilwe matwaga gene maligo mulukuli lwake, kana matwi saba na mhembe mulongo umwe.

⁴ Ayuja mtwanzi kakala yavalile nguwo ndunghu za undewa, kabili kakala yaihambile na zahabu na kigwe chene mali bwando, na ushanga wa lulu; na mumkono wake kagoga kikonha cha zahabu kimemile wiho na ubweto wa ugoni wake.

⁵ Na hali ikihanga chake hakala handikilwe twaga da mvumvuiko, dilonga, “Wambo dikulu ja Babeli, mamo wa wagoni wose na wa ubananzi wose muisi.”

⁶ Aho vinghalile nilola, nimona yuja mtwanzi kakoligwa kwa mulopa wa wangʼalile na kwa mulopa wa iwasindi wa Yesu; na niye vinimuwene, nigwa mkanganyo mkulu nghani.

⁷ Imala malaika kanilongela, “Vilihi vuukanganya? nokupetela uja mzungu wa mtwanzi yuno, na wa mnyama wake mwene matwi saba na mhembe mulongo umwe, yamkwelile.

⁸ Yuja mnyama yumonile na heyo kakala umwaka, kabili vino sambi kakuduhu, bali kwiza kolawa kuzimu yochola kwangamila: awaja wakalile muisi walekigwe kwandikwa matwaga gawo mkitabu cha upile lulawile haja ulumwengu vuumbigwe, wose womkanganya vondawamone yuja Mnyama, yakalile kuko, vyemela sambi kahaduhu, komu kwiza kokuwa baho chusa.

⁹ Aho baho holondwa ukalagavu wa ihoko: gaja gamatwi saba iyo imigongo saba, hiko uchana yuja imtwanzi kuko yokala; na migongo hiyo iwo watawala saba.

¹⁰ Watawala watano waziga kugwa; yuja wa sita yahali baho, na iyagwe hanakwiza tanhu; na heyo vondayeze, kwiza kokala mhunde.

¹¹ Ayuja Mnyama yakalile kuko, yayangayuke sambi, iyo yuyo wainane; na heyo yuyo miyawo waja saba, na heyo kochola kwangamila.

¹² Na zija zimhembe umulongo umwe ziuwene, iwo watawala mulongo umwe, hawanagolelwa tanhu undewa, bali wogwelelwa mhiko kamba za watawala saa imwe imwe hamonga na yuja Imnyama.

¹³ Na hewo mbuli yawo iyo imwe, ya kumwingha yuja Imnyama ugalu wawo na ndagizi zawo.

¹⁴ Vivo vondawahome nghondo na Mwana-Nghondolo, komu Mwananghondolo kowahuma, kilumbo Heyo yuyo Mndewa wa wandewa na Mtawala wa watawala, kabili wakuko wali hamonga nayo, iwo waja wakemigwe, wasagulwe na womtamanila.”

¹⁵ Imala kanongela, “Zija zinyanda za mazi, ziuwene kuyakalile yuja Imgoni wa kitwanzi, iwo walumwengu na ngholo na madale na ulonzi.

¹⁶ Na zija zimhembe mulongo umwe ziuwene, na mnyama mwenyecho, hiwo womwihila yuja mtwanzi mgoni, womboka vyose, yakale ukulunge, ilawabaho wozija nyama za lukuli lwake, imala womsoma hamoto.

¹⁷ Kilumbo Mulungu kawagela mmiyoyo yawo kugatenda manogelwa gake; waigondanye giladi wamwinghe yuja Imnyama utawala wawo, kikomo malonga ga Mulungu vonda gavikilizwe.

¹⁸ Na yuja imtwanzi yuwene, dijo wambo kulu ja utawala wa watawala wa muisi.”