LUGUBULO 16 - Lagano da Isambi

Nyungo 5 zitowa isi, bahali, nyanda, zuwa, kigoda cha Mnyama

¹ Nimana kuhulika dizwi kulu mdingʼanda ja Mulungu, diwalongela waja malaika saba, “Gendeni mkazikutule hasi zija zinyungo saba za lusango lwa Mulungu!”

² Yomana kwinuka waichanduso, kalukutula lungo lwake hasi; halawilila mapute gehile gana usungu mwa waja wanhu, wabokele utango wa yuja Imnyama, na waja wene kukifugamila kinyago chake.

³ Malaika wekabili viyakutule lungo lwake mbahali, igalamka mulopa kamba mulopa wa munhu yafile, na vinhu vyose vyene ugima vili mbahali, vidanganika.

⁴ Na yuja wekadatu viyakutule lungo lwake muna zinyanda na zinzokwe za gamazi, zigaluka mulopa.

⁵ Imala nimuhulika malaika wa igamazi yolonga, “Gweye gwegwe wa ihoko Ulibaho na Ukalile baho; Gweye ungʼalile kwa mzoko kutagusa vino.

⁶ Kilumbo wawita mulopa wa wangʼalile na watula-ndagu, na Gweye kuwengha mulopa waungʼwe; avo vi-wandama.”

⁷ Imala mhulika upango wa nhambiko ulonga, “Ihoko Magana Mulungu Mwene mhiko zose, kitala chako kicho chene ihoko, kigoloke!”

⁸ Na malaika wekane viyakutule lungo lwake hazuwa, baho zuwa jongezelwe kulukuza, dilukuza wanhu kwa moto.

⁹ Bali wanhu vuwalukule kwa ukali wa zuwa, womana kudiliga twaga ja Mulungu Yali na zimhiko za kuwatowa manghulubu ago; walema kwikonhola na kumtunila.

¹⁰ Malaika wainhano viyakutule lungo lwake hakigoda cha yuja Imnyama, baho undewa wake ugeligwa ziza na hewo wailuma milimi yawo, walumila nghani.

¹¹ Womana kumliga Mulungu wa kuulanga kwa kilumbo cha kulumila kwawo, na kwa mapute gawo, walema kwikonhola na kuleka masanghano gawo.

Nyungo za 6 na 7: Mabula ga Harmagedoni, na kingudemo

¹² Yuja malaika wa sita viyakutule lungo lwake muna ulwanda ulukulu lwa Eufrati, baho mazi gake ganyala, giladi nzila ifunguke, kwiza waibite watawala wolawa mwambu wa uulawilo wa idizuwa.

¹³ Niyona mizuka midatu ya ubweto ilawile mmulomo wa dija dizoka, na mmulomo wa yuja Imnyama, na mmulomo wa yuja mulaguzi wa utungulu, igalamka kamba mabula.

¹⁴ Kilumbo ayo iyo mizuka ya Mwenembago, isanghanaga vinzonza na kuwagendela watawala wa ulumwengu wose, giladi iwalundize kwa kutenda nghondo siku ija nghulu ya Mulungu Mwene yenzi, vondaivike.

¹⁵ “Lola nokwiza kamba mbavi; kamota yondayakale mangweda yoteganya nguwo zake, giladi sikuyachole ukulunge, na wanhu sukuwachone kinyala chake!”

¹⁶ Bali ija mizuka iwalundiza waja watawala hanhu hakemagwa Harmagedoni kwa kiebrania.

¹⁷ Na yuja malaika waisaba viyakutule lungo lwake hali ichembela, baho dizwi kulu dilawa mdingʼanda da Mulungu mumuja muna ikigoda cha yenzi, dilonga, “Gasanghanwa gamala!”

¹⁸ Kulawilila lumwemwe na dizwi da nghuwa, imala kukala na kingudemo kikulu cha isi, hakinakoneka kulawa iisi viiumbigwe.

¹⁹ Baho dija diwambo dikulu diigola mafungu madatu, na viwambo vya ngholo zose vigwa; baho diwambo dikulu ja Babeli dikumbukwa behi ya Mulungu, giladi digolelwe kikonha cha ugimbi wa lusango wa Mulungu.

²⁰ Na vibandasi vyose viyangayuka, na migongo hayoneke kabili.

²¹ Imala mvula mkulu wa mabwe mazito nghani kamba kilo hamsini, kawatowela wanhu kulawa kuulanga; komu wanhu wamuliga Mulungu kwa kilumbo cha kusunwa hakulu na mvula ya mabwe, kwa mzoko msuno wake ukala mkulu nghani.